Sau, Mulimuli Mai ia te A’u

Iaroma 1; Mosaea 3

E Pei ua Uma Ona Afio Mai le Faaola

Vaai Atu i le Afio Mai Muamua o le Alii

Sa faamalamalama atu e Iaroma e faapea sa aoaoina sa Nifaē i le faamoemoega o le tulafono a Mose: ina ia fesoasoani ia i latou e “tepa taulai i luma i le Mesia, ma talitonu o le a afio mai o ia e peiseai ua uma ona i ai o ia” (Iaroma 1:11; faaopoopo le faamamafa).

O le Tupu o Peniamina o loo lauga atu i tagata

O le Lauga a le Tupu o Peniamina, saunia e Jeremy Winborg, e le mafai ona kopiina

Pe tusa o le 275 tausaga mulimuli ane, na tuuina mai ai e le Tupu o Peniamina le savali lava lea e tasi—ia “talitonu o le a afio mai Keriso … e pei lava ua uma ona afio mai o ia i totonu o i latou” (Mosaea 3:13; faaopoopo le faamamafa).

O le talitonu i le Alii ma le mautinoa—i le ala atonu latou te ono oo i ai pe ana faapea ua uma ona afio mai o Ia ia i latou—o le a faateleina ai lo latou faatuatua e vaavaai atu ai ia te Ia mo se faamagaloga o a latou agasala (tagai i le 2 Nifae 25:24–27). Na aoao mai perofeta sa Nifaē e ui lava e lei fanau mai le Faaola i le olaga nei, ae e mafai lava ona aogā Lana Togiola i o latou olaga.

Afio Faalua Mai o Iesu Keriso

O le Afio Mai Faalua, saunia e Harry Anderson

Saunia mo le Afio Mai Faalua

E pei lava ona i ai i taimi o le Tusi a Mamona, o loo valaaulia pea i tatou e perofeta ia “tepa taulai i luma i le Mesia” (Iaroma 1:11) ma saunia mo Lona afio mai:

“E manaomia ona tatou faia o sauniuniga faaletino ma le faaleagaga mo mea na valoia i le taimi o le Afio Mai Faalua.”¹

“O se tasi o o outou tiutetauave taua o le fesoasoani lea e saunia le lalolagi mo le Afio Mai Faalua o le Faaola.”²

“O a ni mea e mafai ona tatou faia e saunia ai i le taimi nei mo lena aso? E mafai ona tatou sauinia i tatou lava o se nuu; e mafai ona tatou faapotopoto maia le nuu o le feagaiga a le Alii; ma e mafai ona tatou fesoasoani e toefuatai le folafolaga o le faaolataga ‘na faia i tamā,’ o tatou tuaa. O nei mea uma e tatau ona tupu i se fuataga maualuga atu a o le’i toe afio mai le Alii.”³

“Ma ua auina mai e le Alii le Atua ana perofeta paia i totonu o le fanauga uma a tagata, e taʼu atu nei mea i ituaiga uma, malo, ma gagana, ina ia mafai e soo se tasi o i latou lava ia o e e talitonu o le a afio mai Keriso, ona maua le faamagaloina o a latou agasala, ma olioli i le olioli tele, e pei lava ua uma ona afio mai o ia i totonu o i latou.” —Mosaea 3:13

Talanoaga

E mafai faapefea ona faamalosia ai lou faatuatua ma saunia ai oe mo le toe afio mai o Iesu Keriso pe afai e te talitonu ia Iesu Keriso ma le malosi e tasi e peiseai ua i ai o Ia iinei?

Faamatalaga

1. Dallin H. Oaks, “Sauniuniga mo le Afio Mai Faalua,” Liahona, Me 2004, 9.

2. Neil L. Andersen, “Sauniaina o le Lalolagi mo le Afio Mai Faalua,” Liahona, Me 2011, 49.

3. D. Todd Christofferson, “Saunia mo le Toe Afio Mai o le Alii,” Liahona, Me 2019, 82.