Digital Lamang: Mga Young Adult
Angayan nga mga Manununod
Kon nasabtan lang gyod nato nga ang matag usa kanato nagbansay aron mas mahisama sa Langitnong Amahan, ang pagkausab mahimo nga posible.
Samtang nagdako, nahinumdom ko nga gitudloan nga ako anak sa Dios—didto man kini sa pagpanganta sa himno sa Primary, pagpamati niini gikan sa balay sa akong mga ginikanan, o pagpamati sa mga lider nga nagsangyaw niini gikan sa pulpito. Usa kini ka punto sa doktrina nga dili gyod nato undangan sa pagpamati. Sama sa gitudlo ni Presidente Russell M. Nelson sa mga young adult sa Simbahan, “Hinigugma kong mga higala, kamo literal nga espiritu nga mga anak sa Dios.”1
Bisan og doktrina kini nga kanunay nakong gituohan, wa ko maghunahuna nga kanunay ko kining masabtan. Sigon sa gipamahayag ni Presidente Boyd K. Packer (1924–2015), “Ang tinuod nga doktrina, kon nasabtan, makapausab sa mga kinaiya ug pamatasan.”2
Pinaagi sa doktrina sa balaan nga pagkatawo, akong namatikdan nga ako anak sa langitnong mga ginikanan, apan ang akong mga kinaiya wala mausab tungod niana nga kahibalo. Alang nako, ang pagkahimong anak sa Dios nagpasabot nga dunay tawo nga nahigugma ug nagpangga kanako alang sa akong kaayohan. Ug samtang tinuod kini, wala nako sabta og maayo ang aspeto niana nga pagkatawo nga magdasig kanako sa pag-usab.
Apan usa ka adlaw gitabangan ako sa Dios nga mapalawman ang akong panabot. Samtang nagtuon sa akong mga kasulatan usa ka sayo sa buntag, gigiyahan ako sa Espiritu ngadto sa pipila ka bersikulo nga makita diha sa Mga Taga-Roma 8. Ang mga bersikulo 16–17 nag-ingon nga, “Makighiusa ang maong Espiritu sa atong espiritu aron pagmatuod nga kita mga anak sa Dios.” Nakadungog na ko niana kaniadto. Apan mipadayon ko ug gibasa ang sunod nga bersikulo nga nagpasabot, “Ug kay mga anak man kita niya, madawat nato ang mga panalangin nga gitagana sa Dios ug madawat nato kini uban kang Kristo”. Human nga nabasa nako kini nga mga pulong, ang Espiritu mipamatuod ngari nako nga Ako anak sa Dios nga adunay balaanong katuyoan dinhi sa yuta. Mituhop kana nga mas lawom pa kay sa kaniadto. Niana nga gutlo nabatyagan kini nga daw nagpas-an ko og usa ka sulo nga bag-o pa lang nadagkotan. Makita nako sa tin-aw nga paagi karon nga isip mga anak sa Dios, anaa kita sa dalan nga wala lamang mogiya kanato balik sa Langitnong Amahan apan nagtabang usab nato nga mas mahisama Kaniya. Kining bag-o nga panabot nagsugod sa paghatag kanako og kainit ingon man usab sa pagdan-ag sa akong agianan.
Ang pagkahibalo nga ako anak sa Dios ug nga ako gitagana nga mas mahisama Kaniya adunay dako kaayo nga epekto sa akong kinabuhi. Nakapausab kini sa paagi sa akong panghunahuna ug paglihok sa matag adlaw nga mga sitwasyon. Sa tibuok mortalidad dunay nagtipun-og nga mga buluhaton nga gisangon kanato—gikan sa pagpanginabuhi ngadto sa pag-angkon og maayong mga grado sa eskwelahan ngadto sa pagtabang sa may sakit nga mga sakop sa pamilya ug ngadto sa pag-andam sa inadlaw-adlaw nga mga pagkaon. Ang kinabuhi posibling makaluya gayod. Apan kay nakasabot man ko sa akong pagkatawo isip anak sa Dios, matan-aw nako ang akong mga hagit isip oportunidad sa pagtubo. Ang Dios wala mosulay sa pagsilot kanako o naghimong mas lisod sa mga butang pinaagi sa pagbutang og daghang mga buluhaton nga akong atubangon. Kondili, Iya kong gitabangan nga mabansay sa pagkahimong angayan nga manununod.
Dihang gipalawman nako ang akong panabot bahin niini nga doktrina, sa natural nga paagi nagsugod ko nga mausab ang akong mga kinaiya mahitungod sa yanong mga butang sa akong kinabuhi. Sama pananglit, nagsugod ko sa pag-atiman sa akong higdaanan ug paglimpyo sa akong kwarto matag buntag, dili tungod kay dunay moanha aron mosusi kon gibuhat ba nako ang akong buluhaton, apan tungod kay nasayod ko nga ang Dios limpyo ug organisado. Nakaamgo ko nga kon makahimo ko sa paghupot sama sa Iyang katungdanan ugma damlag, nagkinahanglan ko nga limpyo ug organisado usab. Nagsugod ko sa pagtan-aw niini nga mga tahas isip mga oportunidad sa paghinulsol ug pagtubo aron mahimong mas mahisama sa Dios.
Ang pagsabot niining halawom nga doktrina nakapausab nako ngadto sa mas maayo. Nakagiya kini sa akong mga hunahuna ug mga buhat samtang naghimo ko og mga tumong ug nangandam alang sa umaabot. Nakatabang kini kanako nga makalikay sa daotan samtang akong giila nga ang pagpakasala ug pagnunot sa tintasyon makapugong kanako sa pagkab-ot sa akong hingpit nga potensyal. Labaw sa tanan, ang pagkahibalo niini nga kamatuoran nakadasig kanako sa pag-usab. Ako matinguhaon ug padayon nga nag-usab sa akong mga kinaiya aron mohaom kini niadtong adunay potensyal nga makapanunod sa gingharian sa Dios.