Digital Lamang: Mga Young Adult
Sa Unsang Paagi nga ang Makasagmuyo nga mga Hitabo sa Akong Edukasyon Nakausab sa Akong Pagtan-aw sa Kausaban
Unsay akong gihimo gikan sa pagbati nga naulahi ngadto sa pagbati og katagbawan sa akong panaw sa edukasyon.
Ako kana, nga nagtutok sa ubang artikulo nga dunay daghang komentaryo ug mga sugyot. Kadaghanan mga balido ug makatabang, apan kahugno gihapon ang akong gibati. Tungod kay usa man ko ka tigsulat, ang akong trabaho padayon nga mag-usab-usab. Sa kasagaran OK ra ko niini, apan niining higayona akong nakita nga nasagmuyo ko.
Kinahanglan ba nga ang tanang butang mag-usab-usab?
Ang akong mga artikulo dili lamang ang butang nga mag-usab-usab. Ang akong mga plano sa pagradwar sa unibersidad sa tukma nga panahon nag-usab-usab pod. Human makaserbisyo og misyon, ang pagbalhin-balhin og mga kurso ug ang COVID-19 nakapasagmuyo sa akong edukasyon. Samtang mogradwar na ang akong mga higala, ako katunga pa sa akong pag-eskwela. Sa kinatibuk-an, mibati ko nga naulahi. Ang mga butang nangausab sa hilabihan gikan sa unsay akong gilaoman nga mahitabo.
Niining panahona, nahimo ko nga intern sa edukasyon sa BYU–Pathway Worldwide.
Pinaagi sa trabaho, nakigsulti ko og mga estudyante sa tibuok kalibotan kinsa mga nag-inusarang ginikanan, nga mibalik sa pag-eskwela human sa dugay nang katuigan, o nagkalisod sa pinansiyal. Ang pipila nakasinati og mas labaw pa sa wala dahomang mga kausaban kay kanako, ug nagmauswagon sila.
Apan giunsa man?
Dihang naila-ila nako ang duha ka piho nga estudyante, si Darlyn ug Alexander, gihinumdoman nako ang duha ka leksiyon nga gitudlo nila kanako.
Ang Kausaban Dili Malikayan
Dihang mihimo ko og online nga interbiyo kang Darlyn ug giabli niya ang iyang camera, mihatag siya nako sa labing dako nga pahiyom. Buntag kadto sa Singapore, ug mibangon siya og sayo aron makighimamat kanako sa dili pa niya ihatod ang iyang tulo ka gagmayng anak sa eskwelahan ug siya sa iyang trabaho.
Si Darlyn gusto gayod nga makakuha og master’s degree, apan sa edad nga 36, nadayagnos siya nga dunay stage four nga kanser sa totoy. Nakahugno kini sa iyang mga plano sa pagpadayon sa edukasyon ug sa iyang mga plano sa kinabuhi.
Samtang naminaw ko sa iyang sugilanon, naghunahuna ko nga kon duna may tawo nga angayang masagmuyo sa lisod nga mga kausaban, kana mao si Darlyn. Apan gitutokan niya ang mga panalangin ug mga kalooy nga iyang nadawat ug ang mga tawo nga nakaserbisyo kaniya. Gidawat ni Darlyn ang kausaban sa mga plano uban sa grasya. Imbis nga magtutok kon unsay nawala kaniya, gitutokan niya ang mga kasinatian nga iyang naangkon. Sama sa gitudlo ni Presidente Russell M. Nelson, “Ang kalipay nga atong gibati dili kaayo konektado sa mga sirkumstansiya sa atong kinabuhi apan konektado kaayo sa gitutokan sa atong kinabuhi.”1
Sa kataposan, si Darlyn miapil sa BYU–Pathway Worldwide kay tuyo niya nga padayong abtik ang iyang hunahuna. Giingnan ko niya nga wala niya kasilagi ang pagkaadunay kanser—mapasalamaton siya nga kini migiya kaniya ngadto sa BYU–Pathway ug aron mapalawman ang iyang relasyon kang Jesukristo.
Gihuman nako kadto nga panagsultihanay nga gustong mag-usab sa akong panglangtaw bahin sa kausaban. Tungod kay gipadaplin ra ni Darlyn ang kapungot mahitungod sa iyang mga kahimtang, nahimo ra niya ang pagkontrolar sa iyang kinabuhi. Imbis nga ang mga hagit ug kausaban makapugong sa iyang paglambo, kini nakadasig hinoon kaniya sa pagpadayon.
Ang Langitnong Amahan Dili Gayod Mausab
Si Alexander naglingkod sa iyang sakyanan didto sa American Samoa dihang nag-istoryahay mi sa telepono. Natingala ko dihang gisultihan ko niya mahitungod sa kon giunsa niya sa pagbiya ang iyang tibuok nga pagka-eskolar sa eskwela aron moserbisyo og misyon. Human siya nauli, gibati niya ang giya nga motabang sa negosyo sa iyang pamilya ug pakaslan ang iyang hinigugma sulod sa templo. Dayon human lamang niadto gibati niya ang pag-aghat nga humanon ang iyang edukasyon, ug ang BYU–Pathway maoy hingpit nga sulbad para kaniya.
Dihang giingnan ko ni Alexander nga kaduha siyang nagpaenrol sa eskwelahan ug wala mopadayon tungod sa kusog kaayo nga bagyo ug dayon tungod sa pagkasunog sa balay, nakalitan ko. Gipili niya nga moserbisyo sa Ginoo sulod sa duha ka tuig sa wala pa mopadayon sa iyang edukasyon ug dayon nag-atubang og igo nga kalisdanan—apan nagpadayon siya. Dihang gipangutana nako siya kon giunsa niya sa pagpadayon, gihisgotan niya ang istorya bahin ni Nephi nga nagkuha sa mga palid gikan sa Jerusalem. Bisan og gibuhat ni Nephi unsay gihangyo sa Dios, gisagubang gihapon niya ug sa iyang mga igsoon ang tulo ka pagsulay aron molampos. Apan si Nephi wala gyod mawad-i og hugot nga pagtuo, kay misaad man ang Dios nga mohatag og paagi alang Kaniya (tan-awa sa 1 Nephi 3–4).
Natudloan ako ni Alexander nga ang tanan sa kinabuhi pwede nga mausab-usab gawas lang sa atong mapinanggaon nga Langitnong Amahan. Sigon usab sa gitudlo ni Presidente Nelson: “Ang Ginoo dili gayod magduka, o matulog [tan-awa sa Salmo 121:4]. Siya ‘sama kagahapon, karon, ug sa [ugma]’ [Mormon 9:9]. Dili Siya motalikod sa Iyang mga pakigsaad, sa Iyang mga saad, o sa Iyang gugma alang sa Iyang katawhan.”2
Sa tinuod nasayod ako karon nga bisan unsang kausaban ang akong atubangon, ang Iyang mga sugo, mga panalangin, ug gugma walay pagkausab ug mahangtoron. Si Alexander mitudlo kanako nga kon akong ihan-ay ang akong agianan padulong sa Dios ug ni Jesukristo ug mosalig Kanila, akong maatubang ang walay kasiguroan nga umaabot uban sa paglaom ug pinaagi sa hugot nga pagtuo.
Pagkaplag og Kalinaw sa Kaugalingon Nako nga Panaw
Salamat niining mga higala ug sa akong panahon sa BYU–Pathway, nakita nako ang kausaban sa usa ka bag-o nga kahayag! Sa paglingi sa nangagi, kon ang akong personal nga plano sa edukasyon wala mausab, wala unta ko makakita sa kurso nga akong ganahan o mahimamat ang talagsaong mga tawo sa akong kinabuhi. Karon nasayod na ko nga kon mosalig lang ko sa Langitnong Amahan ug magtutok sa akong kinabuhi diha ni Jesukristo, akong mabuntog ang bisan unsang kausaban nga moabot sa akong kinabuhi.