“Giunsa sa Dios Paggiya Kanako sa Paghimo sa Iyang Buhat?,” Liahona, Hulyo 2023.
Dali, Sunod Kanako
Giunsa sa Dios Paggiya Kanako sa Paghimo sa Iyang Buhat?
On the Road to Damascus [Sa Dalan Paingon sa Damasco], Lifeway Collection / licensed gikan sa Goodsalt.com
Kon mobasa kita sa istorya sa pagkakabig ni Saulo, madasig kita sa iyang tubag ngadto sa Manluluwas: “[Ginoo, unsa ang buot nimong ipabuhat kanako?]” (Mga Buhat 9:6). Isip mga disipulo ni Jesukristo, kasagaran mangutana kita og susama samtang magtinguha kita sa pag-apil sa buhat sa Ginoo.
Apan unsay mahitabo human kita mangutana? Unsaon nato nga makadawat og giya aron mahibalo sa kabubut-on sa Dios alang sa atong mga paghago?
Andam sa Paglihok
Agig tubag sa pangutana ni Saulo mahitungod sa unsay angay niyang buhaton, ang Ginoo mitubag dayon uban sa mga instruksiyon alang kaniya nga moadto sa Damasco. Usahay naglaom kita nga ang Ginoo mohatag kanato og sama nga matang sa piho nga giya. Apan dili kita kinahanglang maghulat og anam-anam nga mga instruksiyon sa dili pa kita moapil diha sa buhat sa Dios.
Si Elder Dieter F. Uchtdorf sa Korum sa Napulog Duha ka Apostoles mitudlo, “Kasagaran, ang tubag sa atong pag-ampo dili moabot samtang kita nagluhod lang apan samtang kita naglihok [nga] nagserbisyo sa Ginoo ug nagserbisyo niadtong anaa sa atong palibot” (“Naghulat diha sa Dalan sa Damasco,” Liahona, Mayo 2011, 76).
Hunahunaa kon giunsa sa Ginoo paggiya niining duha ka tawo ngadto sa mga kahigayonan sa pagserbisyo tungod kay andam sila nga molihok:
-
Saulo diha sa Mga Buhat 9:20
-
Pedro diha sa Mga Buhat 9:32–42