Mga Baroganan sa Pagpangalagad

Pagpangalagad uban sa Gugmang Putli

Kita makahimo og dako nga kalainan pinaagi sa pagpakita og gugma sa natural nga mga paagi.

placeholder altText

How Dorcas Helped the Poor [Giunsa ni Dorcas Pagtabang ang mga Kabos], Classic Bible Art Collection / licensed from GoodSalt.com

Kita mas mahisama sa atong Manluluwas samtang kita magkat-on sa pagpangalagad sama sa Iyang gibuhat. Gamit ang mga ehemplo ni Kristo ug sa Iyang mga disipulo diha sa Bag-ong Tugon, atong makat-onan kon unsaon pagpalambo og Kristohanon nga mga kinaiya nga makatabang nato diha sa atong mga paningkamot sa pagpangalagad sama sa Manluluwas.

Usa ka Ehemplo sa Gugma nga Putli

Si Tabita (naila usab nga si Dorcas) usa ka disipulo ni Jesukristo nga nagpuyo sa Jopa. Naila siya isip usa ka babaye nga “nagbuhat og maayo ug nagtabang sa mga kabos” (Mga Buhat 9:36). Siya gihigugma tungod kay dako kaayo ang iyang nahimo aron sa paghigugma sa uban. Sama sa Manluluwas, iyang gigahin ang iyang kinabuhi sa pagserbisyo. Siya adunay mga kahanas ug mga talento nga iyang gigamit aron makahimo og kalainan.

Usa niadto nga mga kahanas mao ang paghimo og mga kupo ug mga bisti, diin ang pipila nahatag ngadto sa mga biyuda nga nanginahanglan. Alang niadto nga mga nakadawat sa iyang mga gasa, siya pinadala sa dios. Sa dihang miabot si Pedro aron sa pagtan-aw kaniya human siya mamatay, “gialirongan [siya] sa tanang biyuda nga naghilak, ug ilang gipakita kaniya ang mga bisti ug mga kupo nga gibuhat ni Dorcas, sa buhi pa siya” (Mga Buhat 9:39). Natandog kaayo siya nga siya [si Dorcas] iyang gibuhi og balik gikan sa pagkamatay, nga maoy hinungdan nga daghang tawo ang mituo sa Manluluwas (Mga Buhat 9:40–42).

Pagpangalagad uban sa Gugmang Putli

Ang gugmang putli mao ang gugma ni Jesus alang kanato ug ang gugma nga Iyang gilaoman nga anaa nato alang sa usag usa. Kini mao ang paghigugma sa atong isigkatawo sama sa atong kaugalingon (tan-awa sa Mateo 22:37–39), pagtagad nila uban sa sama nga kamanggiloloy-on, pailob, ug kaluoy nga atong gitinguha alang sa atong kaugalingon (tan-awa sa Mateo 7:12). Kini mao ang pagserbisyo kanila, sama ni Tabita, gamit ang mga gasa ug mga talento nga gihatag kanato.

Kita makahimo og dako nga kalainan pinaagi sa pagpakita sa atong gugma sa mga paagi nga natural kanato—bisan kon ang atong gibuhat yano. Kon ikaw adunay talento sa pagpanahi, kana pwede nga himoong paagi sa pagpangalagad, apan basin mas maayo ka sa pagpadagan og lawnmower kay sa makina sa pagpanahi. O tingali ang imong gasa mao ang pagkahibalo unsaon gayod sa pagpaminaw ug maanaa isip tinuod nga higala.

Pagpalambo sa Gugma nga Putli

Unsaon nga kita makapalambo og Kristohanon nga hiyas sa gugma nga putli?

• Ang gugma nga putli usa ka gasa nga gihatag sa Langitnong Amahan ngadto sa tanan kinsa tinuod nga mga sumusunod ni Jesukristo. “Mag-ampo ngadto sa Amahan uban sa tibuok kusog sa kasingkasing, nga kita unta mapuno niini nga gugma” (Moroni 7:48).

• Si Mormon nagtudlo kon unsa ang gugma nga putli: “Ang gugma nga putli mainantoson, ug mabination, ug dili masinahon, dili manghambog, dili mangita alang sa iyang kaugalingon, dili dali nga masuko, dili maghunahuna sa daotan, ug dili maglipay diha sa pagkadaotan apan maglipay diha sa kamatuoran, mainantoson sa tanan nga mga butang, matuohon sa tanan nga mga butang, molaom sa tanan nga mga butang, ug molahutay sa tanan nga mga butang” (Moroni 7:45). Dili lamang kini ang mga paagi nga makita nga ikaw napuno sa gugma; kini may kalabotan nga mga kinaiya nga makatampo ngadto sa nagkadugang nga kapasidad sa paghigugma samtang ato kining palamboon.

• Ang kamanggiloloy-on mosunod sa empatiya.¹ Samtang kita magtinguha sa pagsabot sa uban, atong gihatagan ang gugma nga putli og mas dako nga kahigayonan sa paglambo. Pagbansay sa pagpangutana sa matinabangon ug mahigugmaon nga paagi, ug dayon paminaw uban ang pagpailob ug pagsabot.

• Bansaya ang gugma nga putli. Ihatag ang imong oras ug uban nga kapanguhaan, lakip na ang imong pagpasaylo, niadtong nagkinahanglan niini. Si Presidente Thomas S. Monson (1927–2018) nagtudlo: “Ang pagpasaylo kanunay nga mag-uban sa gugma. … Ang pagpasangil makapaumido sa samad. Ang pagpasaylo lamang ang makaayo.”²

Pagdiskobre pa og Dugang

• Kat-oni kon sa unsang paagi nga ang pagkaadunay gugma nga putli makatabang nato nga masulbad ang mga problema diha sa “Agig Pagdayeg Niadtong Miluwas” ni Elder Dieter F. Uchtdorf sa Korum sa Napulog Duha ka Apostoles (Liahona, Mayo 2016, 77–80).

• Sa iyang Abril 2018 nga pakigpulong sa kinatibuk-ang komperensiya nga “Dinasig nga Pagpangalagad,” si Presidente Henry B. Eyring, Ikaduhang Magtatambag sa Unang Kapangulohan, mipakigbahin kon sa unsang paagi nga ang putli nga gugma ni Kristo makatabang nato nga magmalamposon sa pagpangalagad.

• Pagkat-on pa og dugang mahitungod sa gugma nga putli diha sa topics.ChurchofJesusChrist.org.

Mubo nga mga Sulat

1. Tan-awa sa “Pagpangalagad uban sa Kaluoy,” Liahona, Hunyo 2023, 20–21.

2. Thomas S. Monson, “Gugma—ang Kahulogan sa Ebanghelyo,” Liahona, Mayo 2014, 93.