“Unsaon Nako Pagtuo sa Unsay Wala Gayod Nako Makita?,” Liahona, Abr. 2023.
Mga Young Adult
Unsaon Nako Pagtuo sa Unsay Wala Gayod Nako Makita?
Bisan kon ang ebanghelyo ingon og dili makita, makapili kita nga magbaton gihapon og hugot nga pagtuo.
“Dili lang gayod ko makasabot kon unsaon nimo pagtuo sa unsay wala gayod nimo makita. Dili ko kahibalo unsaon nga makabaton niana nga matang sa hugot nga pagtuo.”
Nakalitan ko sa pamahayag sa akong igsoon nga lalaki. Kami adunay nindot kaayo nga relasyon, ug siya mitug-an kanako mahitungod sa pipila ka hagit nga iyang giatubang. Siya wala mahimong aktibo diha sa Simbahan sa katuigan, mao nga mipaambit ko sa akong mga tinguha alang kaniya nga motuo sa usa ka butang—bisan unsa nga butang, sa pagkatinuod—kabahin sa usa ka mahigugmaon nga Langitnong Amahan ug sa usa ka mas taas nga katuyoan alang sa mortalidad.
Apan ang iyang mga pulong nakapahimo kanako nga namalandong: Ngano nga ako nagtuo man ni Kristo ug sa tanan mahitungod sa ebanghelyo kon ang kadaghanan niini dili man makita?
Ang Hugot nga Pagtuo Mao ang Kinadak-an nga Gahom
Si Presidente Russell M. Nelson padayon nga nag-awhag kanato sa pagpalawom sa atong hugot nga pagtuo, aron kita makabatok sa mga atake sa kaaway sa umaabot nga mga adlaw. Mahinungdanon alang kanako nga siya makapili sa pagtudlo kanato mahitungod sa bisan unsa kabahin sa ebanghelyo, apan siya makanunayong nagtudlo mahitungod sa labing sukaranan nga baroganan sa ebanghelyo—hugot nga pagtuo—pinaagi sa pag-awhag kanato sa pagpalig-on sa atong espirituwal nga mga pundasyon,1 pagpadayon sa kadasig sa espirituhanong paglambo,2 ug pagpakita og hugot nga pagtuo nga makabalhin og mga bukid.3
Ang hugot nga pagtuo mao ang labing gamhanan nga tubag ngadto sa mga pangutana mahitungod sa ebanghelyo. Sumala ni Alma, ang usa ka “pagtinguha sa pagtuo” (Alma 32:27) mao ang yano nga sinugdanan ngadto sa tibuok ebanghelyo ni Jesukristo, apan ang hugot nga pagtuo mamahimong “ang kinadak-ang gahom nga atong magamit niini nga kinabuhi”4 alang sa pagpangita og mga tubag ug pagpabilin diha sa paglaom.
Mga paghulagway pinaagi ni Emily Jones
Makita o Dili Makita, ang Hugot nga Pagtuo Usa ka Pagpili
Samtang gitun-an nako ang Daang Tugon sa miaging tuig, duna koy pipila ka naamgohan mahitungod sa pagbaton og hugot nga pagtuo. Nabasa nako ang mahitungod sa mga Israelihanon nga gipalingkawas sa Dios gikan sa pagkaulipon sa Ehipto, ug naghunahuna ko kon unsa kaha ang pamati nga makasaksi sa dayag kaayo, hapit dili katuohan, nga mga milagro nga ilang nakita atol sa ilang kinabuhi.
Apan anam-anam akong nasagmuyo samtang nakita nako ang ilang hugot nga pagtuo nga nag-usab-usab—makakita sila og mga milagro ug dayegon ang Dios, ug dayon mawad-an og hugot nga pagtuo ug magbagulbol batok Kaniya kon sila mag-atubang og mga pagsulay o mga kalisod. Ang Ginoo mipalingkawas kanila gikan sa Ehipto, mibahin sa Pulang Dagat aron sila makatabok diha sa uga nga yuta, ug mipahinabo sa pag-ulan sa “pan gikan sa langit” (Exodus 16:4) (isip usa ka tawo nga ganahan kaayo og pan, pagkanindot hunahunaon!), ug bisan human niining tanan, ang mga anak sa Israel walay hugot nga pagtuo nga miingon, “Ngano man nga gipatungas ninyo kami gikan sa Ehipto aron mangamatay kami niining kamingawan?” (Numeros 21:5).
Sa sinugdanan, nalisang ko sa ilang mga reaksiyon. Nganong nagduda man sila sa Dios ug nahimong dili gayod mapasalamaton human sa tanan nga Iyang tataw nga gibuhat alang kanila?
“Kon nakasaksi pa ko niadto nga mga matang sa mga milagro, dili na gayod ako magduhaduha sa akong hugot nga pagtuo o mokwestiyon pag-usab sa Langitnong Amahan!” Naghunahuna ko. Apan samtang mas lawom akong namalandong, nakaamgo ko nga ako usab nahimong sad-an niining sama nga taphaw nga pagtuo.
Kon mag-atubang og mga hagit, ako usahay mokwestiyon kon ang Langitnong Amahan anaa ba gayod uban kanako, bisan og Siya mipadayag na sa Iyang presensya sa dili maihap nga mga panahon kaniadto. Makahinumdom ko sa mga higayon sa dihang ako adunay mga pangutana mahitungod sa ebanghelyo o sa mga panahon diin gibati nako nga nakalimtan tungod kay ang akong pagkamasulundon wala makapugong sa pagkadili makiangayon o nakapahinabo sa mga milagro dihadiha dayon sumala sa akong gusto.
Apan akong nakat-onan nga ang mahinungdanon aron magpabilin ang akong hugot nga pagtuo niini nga mga higayon sa pagkwestiyon mao ang dili paghulat sa pan nga mahulog gikan sa langit apan pinaagi lang sa paghimo og usa ka pagpili:
Ang pagpili nga motuo.
Paghimo sa Pagpili nga Motuo
Ang kalibotan moawhag kanato sa pagpangita og kapamatud-an o pangatarongan alang sa atong mga pagduhaduha o mga pangutana gikan sa paspas nga pagpangita diha sa Google o gani pinaagi sa mga kaila. Apan ang pagpakita og hugot nga pagtuo ug pagdapit sa Espiritu sa paggiya kanato mao ang bugtong nga paagi nga makakaplag og lunsay, hingpit nga mga kamatuoran.
Kon ako mag-atubang og pagpili nga motuo o dili, akong tinguhaon ang Espiritu bisan kon lisod kini; akong hinumdoman ang mga higayon sa dihang nabati nako ang Espiritu Santo nga mihunghong og kamatuoran sa akong kahiladman; akong pamalandongan kon unsay nahibaloan nga tinuod sa akong kalag; akong hunahunaon ang panahon nga nabati nako ang hingpit nga gugma sa Langitnong Amahan; ug akong tutokan ang kada adlaw nga mga kaluoy ug mga milagro nga akong nakita sa akong kinabuhi, sama sa abilidad nga mobati og kalinaw taliwala sa mga panglimbasog o ang hingpit nga kalipay sa paghinulsol pinaagi ni Kristo.
Ako nasayod nga tinuod ang ebanghelyo ni Jesukristo tungod kay ang Espiritu kanunay nga nagpadayag niana nga kamatuoran ngari kanako kon akong himoon kana nga pagpili sa pagtinguha Kaniya kay sa mangita sa laing dapit alang sa mga tubag—kon ako motinguha ug mopili nga motuo.
Tinuod, sayon lang nga makabaton og hugot nga pagtuo sa Langitnong Amahan human makasaksi og mga milagro, apan ang mga milagro dili makamugna og hugot nga pagtuo—ang pagpakita og hugot nga pagtuo mao ang modapit og mga milagro (tan-awa sa Mateo 17:20). Ang hugot nga pagtuo dili bahin sa pagkakita ug pagtuo—bahin kini sa pagpili nga motuo sa wala pa kamo hingpit nga makasabot, pagtinguha sa mga kamatuoran uban sa kasingkasing, ug sa pag-amuma sa mga gituohan uban ang pagkamatarong (tan-awa sa Alma 32:40–43).
Kita Mapanalanginan Kon Kita Motuo
Balik ngadto sa panag-istoryahanay uban sa akong igsoon nga lalaki, wala ko kahibalo kon ang bisan unsa nga akong ikasulti makakombinser kaniya sa mga kamatuoran nga akong gimahal sa akong kasingkasing. Apan kalit lang, napahinumdoman ko sa istorya ni Apostol Tomas. Mao nga gipaambit nako kini kaniya.
Matinud-anon si Tomas ngadto sa Manluluwas atol sa Iyang pangalagad apan dili motuo nga nabuhi pag-usab ang iyang Agalon hangtod nga siya nakakita Kaniya nga mag-inatubangay. Sa dihang nabati niya ang mga lakra sa mga lansang diha sa Iyang mga kamot, siya sa kataposan mituo, ug ang Manluluwas misulti kaniya, “[Tomas,] mituo ka ba tungod kay nakakita ka kanako? Bulahan kadtong motuo bisan wala makakita kanako” (Juan 20:29).
Ug dayon ako mipaambit sa akong pagpamatuod: “Ako nakabuntog na og daghan kaayong mga hagit sa akong kinabuhi nga dili mahimong dili motuo sa usa ka Langitnong Amahan kinsa nahigugma kanako ug sa usa ka Manluluwas kinsa mitabang kanako nga makakaplag og hingpit nga kalipay ug kalinaw latas niining tanan. Mahimong wala nako Sila makita sa personal, apan nakita nako Sila pinaagi sa daghan kaayong mga higayon sa kamaayo dinhi sa kalibotan. Lisod ang kinabuhi, apan ang hugot nga pagtuo diha Kanila nagpahinumdom kanako kon kinsa ako ug unsa ang akong katuyoan, ug nakahinumdom ko sa mga panalangin nga Ilang gisaad kanako. Sa matag higayon nga mopili ko nga magbaton og hugot nga pagtuo, mabati nako sa akong kasingkasing nga nag-uban Sila kanako, ug nga tinuod ang ebanghelyo.”
Natapos namo ang among panag-istoryahanay sa maayo nga paagi. Wala ko kahibalo kon mopili siya nga mobalik sa ebanghelyo sa labing daling panahon, apan gidapit nako siya nga magsugod lang sa usa ka tinguha nga motuo.
Kini nga kalibotan dili mohimong sayon nga kanunayng magbaton og hugot nga pagtuo. Sa pagkatinuod, usahay mobati kita nga ingon og ang atong mga paningkamot nga magmatinud-anon kawang lang kon kita mag-atubang og mga hagit o kon ingon og ang mga langit sirado ngari kanato. Apan ang pagpalambo ug pagpatunhay sa atong hugot nga pagtuo usa ka makapalunsay nga proseso nga magkinahanglan og paglaom diha sa Manluluwas, pagsalig diha sa Langitnong Amahan, ug binuhatan diha sa atong bahin. Ug ang pagpadayon sa pagpili sa hugot nga pagtuo mahimong maghatag sa sangpotan nga gihulagway ni Elder L. Whitney Clayton, kanhi usa ka sakop sa Kapangulohan sa Seventy: “Moabot ang panahon nga inyong makita nga nahimo ninyo ang pinakamaayong pagpili. Ang inyong maisogong desisyon nga motuo Kaniya mopanalangin kaninyo sa walay sukod ug sa kahangtoran.”5
Kon mopili ko nga motuo, ilabi na sa panahon nga masabtan ra nga dili ko mopili nga motuo, ako gayod makadawat og mga panalangin, makasinati og mga milagro, ug makabati og halawom gayod nga kalipay sama sa gisaad sa Manluluwas ug sa propeta. Ug usahay, bisan pa man sa mga hagit nga akong giatubang ug sa wala matubag nga mga pangutana nga mahimong aduna ako, ang kinadak-an nga milagro sa akong kinabuhi mao nga kon ako mopili og hugot nga pagtuo diha ni Jesukristo, ako gayod makakita Kaniya. Ako makaila sa Iyang impluwensya, sa Iyang gahom, ug sa Iyang kahayag sa akong kinabuhi.
Nasayod ako nga kamo makabuhat sa samang butang.