2023
Paghimo sa Pasko sa Pagkabanhaw nga usa ka Panahon sa Paghinumdom sa Manluluwas
Abril 2023

“Paghimo sa Pasko sa Pagkabanhaw nga usa ka Panahon sa Paghinumdom sa Manluluwas,” Liahona, Abr. 2023.

Paghimo sa Pasko sa Pagkabanhaw nga usa ka Panahon sa Paghinumdom sa Manluluwas

Ni Eric D. Huntsman ug Trevan G. Hatch

Faculty, Brigham Young University

Ania ang pipila ka inadlaw nga mga debosyonal—gisugyot nga mga kasulatan, art, ug musika—aron sa pagtabang kaninyo nga maandam sa espirituhanong paagi alang sa Pasko sa Pagkabanhaw.

Imahe
ang nabanhaw nga Kristo uban sa mga disipulo

Christ the Consolator [Si Kristo ang Tighupay], ni Carl Bloch

Alang sa kadaghanan nato, ang pagsaulog sa pagkatawo ni Jesus atol sa Pasko mas natural nga buhaton kay sa pagsaulog sa Iyang pag-antos, kamatayon, ug Pagkabanhaw atol sa Pasko sa Pagkabanhaw. Ang pamilyar ug makalingaw nga mga tradisyon sa Pasko magsugod sa sayong bahin sa Disyembre. Apan kinahanglan natong hinumdoman unsa ang gitudlo ni Presidente Gordon B. Hinckley (1910–2008): “Walay Pasko kon wala pa ang Pasko sa Pagkabanhaw. Ang batang masuso nga si Jesus sa Betlehem mahisama ra unta sa laing batang masuso kon wala pa ang matubsanon nga Kristo sa Getsemani ug sa Kalbaryo, ug ang madaugon nga kamatuoran sa Pagkabanhaw.”1

Bag-ohay lang, sa Dominggo sa Lukay niadtong 2021, si Presidente Russell M. Nelson midapit nato sa paghimo sa semana sa Pasko sa Pagkabanhaw nga mas balaan:

“Human sa tanan nga mga butang nga gihimo ni Jesukristo alang kaninyo, ako modapit kaninyo sa pagbuhat og butang niini nga semana sa pagsunod sa Iyang mga pagtulon-an. …

“Niining Pasko sa Pagkabanhaw, moawhag ako ninyo sa pagtutok diha sa Manluluwas.”2

Ang mosunod mao ang pipila ka sugyot aron sa pagtabang kaninyo nga motutok diha sa Manluluwas atol sa semana sa dili pa ang Pasko sa Pagkabanhaw. Samtang ang mga eskolar sa sulod o gawas sa Simbahan nakahibalo nga kita dili gayod kanunay makasiguro unsa ang eksakto nga mga adlaw kini nga mga panghitabo nahitabo, unsa ang among gihatag mao ang inadlaw nga eskedyol sa debosyonal.3 Kini naghatag sa mga indibidwal ug mga pamilya og usa ka butang nga angayng tun-an ug hinumdoman alang sa matag adlaw sa semana padulong ngadto sa Pasko sa Pagkabanhaw.

Kami migamit niini nga mga ideya uban sa among kaugalingon nga mga pamilya sulod sa daghan nga tuig ug nakita nga makatabang kini. Kini dili usa ka opisyal nga programa sa Simbahan, apan gibati namo nga ang tinuyo nga pagpangandam alang sa Pasko sa Pagkabanhaw makatabang nato sa pagpalig-on sa atong hugot nga pagtuo ug pagbutang ni Kristo sa sentro sa holiday. Ang paghiusa sa inadlaw nga pagtuon sa mga kasulatan mahitungod sa kataposang semana sa kinabuhi sa Manluluwas uban sa pagpamalandong, pag-ampo, musika, art, ug makahuluganon nga mga tradisyon mahimong usa ka makadasig nga personal ug pamilya nga tradisyon.

Imahe
Si Kristo nga nagsakay og asno padulong sa Jerusalem samtang ang mga sumusunod nagsaulog

Christ’s Triumphal Entry into Jerusalem [Ang Madaugong Pagsulod ni Kristo sa Jerusalem], ni Harry Anderson

Dominggo sa Lukay

Ang Dominggo sa dili pa ang Pasko sa Pagkabanhaw nag-abli sa kataposan nga semana sa kinabuhi sa Manluluwas pinaagi sa pagsaulog sa pagsulod ni Jesus ngadto sa Jerusalem sa dihang ang Iyang mga sumusunod mikaway-kaway og mga sanga sa lukay ug mipahayag Kaniya nga Hari.

Sama sa naobserbahan ni Elder Dieter F. Uchtdorf sa Korum sa Napulog Duha ka Apostoles, “Kini tukma nga atol sa semana gikan sa Dominggo sa Lukay ngadto sa buntag sa Pasko sa Pagkabanhaw atong ipunting ang atong mga hunahuna ngadto kang Jesukristo, ang tinubdan sa kahayag, kinabuhi, ug gugma.”4 Pinaagi sa paghinumdom sa usa ka panahon sa Iyang pangalagad sa dihang daghan ang miila ni Jesus isip ang Hari ingon nga Siya mao gayod, kita makapaabot sa Iyang mahimayaong Ikaduhang Pag-anhi, sa higayon nga Siya moanhi sa pagmando ug paghari sa tibuok yuta.5

Mga Kasulatan

Hilisgotan alang sa Posible nga Panaghisgotan

  • Unsaon nato sa paggamit kini nga semana aron sa pagpangandam alang sa Pasko sa Pagkabanhaw?

Art

  • Minerva Teichert, Christ Entering Jerusalem [Si Kristo Misulod sa Jerusalem]

  • Walter Rane, Triumphal Entry [Madaugon nga Pagsulod]

Musika

  • “Tanan nga Pagdayeg ug Himaya” (Mga Himno, nu. 35)

  • “Hosanna” (Children’s Songbook, 66–67)

Imahe
Si Jesus nga naglakaw dapit sa kahoy nga igera

The Accursed Fig Tree [Ang Gitunglo nga Kahoy nga Igera], ni James Tissot

Lunes

Ang Marcos 11 nagrekord ni Jesus nga nagtunglo sa walay bunga nga kahoy nga igera. Pinaagi sa pagkonektar niini nga milagro uban sa paglimpyo sa templo, si Marcos tingali nagsugyot sa pagsalikway niadtong kinsa nangangkon nga mga katawhan sa Dios apan wala maghatag og bunga sa ilang kaugalingon nga mga kinabuhi. Ang pagpamalandong sa mga aksiyon ug mga pagtulon-an ni Jesus sa mosunod nga mga kasulatan nag-andam nato sa pagsaulog sa Iyang pagdaog sa sala ug kamatayon ug nagtudlo sa atong mga hunahuna ngadto sa Iyang mahimayaong pagbalik ug sa umaabot nga paghari.

Si Elder Neil L. Andersen sa Korum sa Napulog Duha ka Apostoles miingon: “Kita nagmaya uban sa mga Kristiyano sa tibuok kalibotan sa Iyang mahimayaon nga Pagkabanhaw ug sa atong kaugalingong gisaad nga pagkabanhaw. Hinaot nga mangandam kita sa Iyang pag-anhi pinaagi sa kanunay nga pagbalik-balik og hinumdom niining mahimayaong hitabo ug niadtong atong mga gimahal. … Mopamatuod ko nga Siya buhi. ‘Dali, O Hari sa mga Hari’ [Mga Himno, nu. 30].”6

Mga Kasulatan

Mga Hilisgotan alang sa Posible nga Panaghisgotan

  • Sa unsa nga mga paagi nga atong makita ang atong mga kinabuhi nga nagdala og maayo nga bunga?

  • Unsaon nato sa pagtuboy si Jesukristo isip usa ka kahayag ngadto sa kalibotan?

  • Unsa ang gitudlo sa paglimpyo sa templo kanato mahitungod sa kaimportante sa templo?

Art

  • James Tissot, Jesus Goes Out to Bethany in the Evening [Si Jesus Miadto sa Betania sa Gabii]

  • James Tissot, The Pharisees Question Jesus [Gipangutana sa mga Pariseo si Jesus]

Musika

  • “Dali, O Hari sa mga Hari” (Mga Himno, nu. 30)

  • “Beautiful Savior” (Children’s Songbook, 62‒63)

  • “We Love Thy House, O God” (Hymns, nu. 247)

  • “Gusto Ko nga Makita ang Templo” (Songbook sa mga Bata, 99)

Imahe
Si Jesus nga nagtan-aw sa siyudad sa Jerusalem

O Jerusalem, ni Greg K. Olsen

Martes

Ang relihiyoso ug politikanhon nga mga awtoridad sa Jerusalem nangutana ni Jesus, naningkamot sa pagpangita og sayop Kaniya. Sa sama nga takna, ang mga pari diha sa templo nangita og mga depekto sa mga nating karnero sa dili pa ang umaabot nga kasaulogan sa Pagpalabay. Si Jesus midala usab sa iyang pipila ka suod nga mga disipulo ngadto sa Bungtod sa mga Olibo, diin Siya nanagna sa umaabot nga kalaglagan sa Jerusalem ug sa kataposan nga kalaglagan sa mga daotan sa kataposan sa kalibotan.

Kabahin sa paghukom nianang adlawa, si Presidente Dallin H. Oaks, Unang Magtatambag sa Unang Kapangulohan, mitudlo: “Kon kita nasayod nga kon kita makigkita sa Ginoo ugma … unsay atong buhaton karon? … Ako mopamatuod nga Siya moanhi, sama sa Iyang gisaad. Ug ako nag-ampo nga kita makapangandam sa pagpakigkita Kaniya.”7

Mga Kasulatan

Mga Hilisgotan alang sa Posible nga Panaghisgotan

  • Unsa ang gitudlo ngari kanato sa mga sambingay bahin sa napulo ka dalaga ug bahin sa karnero ug sa mga kanding mahitungod sa mga butang nga atong gikinahanglan sa pagpangandam alang sa Ikaduhang Pag-anhi?

  • Unsaon nga kita makahatag sa tanan nato ngadto sa Ginoo samtang kita mohigugma ug moserbisyo sa uban?

Art

  • Liz Lemon Swindle, The Widow’s Mite [Ang Gagmayng Salapi sa Biyuda]

Musika

  • “Jehova, ang Ginoo sa Langit ug Yuta,” (Mga Himno, nu. 179)

  • “Kon Siya Moanhi Pag-usab” (Songbook sa mga Bata, 46)

Imahe
babaye nga nagtan-aw ni Jesus

For She Loved Much [Kay Siya Nahigugma Pag-ayo], ni Jeffrey Hein

Miyerkoles

Ang Marcos 14 nagrekord sa konspirasiya sa mga lider sa Jerusalem batok ni Jesus ug sa pag-uyon ni Judas Iscariote sa pagbudhi sa Manluluwas. Hinoon, tali niining duha ka asoy, mao ang maanindot nga talan-awon diin ang usa ka babaye misulod sa usa ka kasaulogan diha sa Betania ug midihog ni Jesus. Wala lamang siya mag-andam ni Jesus alang sa Iyang umaabot nga lubong, apan siya usab ingon og adunay pagpamatuod nga Siya mao ang dinihogan nga Hari ug ang Manluluwas sa kalibotan.

Kabahin sa buhat sa pagserbisyo niini nga babaye, si Presidente Linda K. Burton, kanhi Kinatibuk-ang Presidente sa Relief Society, miingon: “Hinaot kita … moduol nga maghiusa sa pagtabang niadtong kinsa nanginahanglan kutob sa atong mahimo ug gidasig sa paghimo sa ingon. Tingali adunay mosulti niini kabahin kanato, sama sa gisulti sa Manluluwas kabahin sa usa ka mahigugmaong sister nga nangalagad Kaniya: “Usa ka maayong buhat kining iyang gihimo. … Gihimo niya ang maarangan niya sa paghimo’ [Marcos 14:6, 8].”8

Mga Kasulatan

Mga Hilisgotan alang sa Posible nga Panaghisgotan

  • Sa unsa nga paagi kita magpabilin nga matinud-anon ngadto sa Manluluwas bisan pa sa oposisyon gikan sa kalibotan?

  • Unsa ang atong mabuhat sa pagserbisyo sa uban diha sa gagmay, ug makahuluganon nga mga paagi?

Musika

  • “Gugma nga Naghimaya sa Anak” (Mga Himno, nu. 185). Kini nga himno naglakip sa maanindot nga mga linya, “Gugmang nag-usas pamilya, / Gugmang kanako nagdala, / Putling gugmang di mawala— / Ang kalag ko pun-a.” Kining mga pakisayran nga himno sa paghigugma “nga naghimo sa mapait nga matam-is” ug nag-usab sa “kaaway ngadto sa higala” sukwahi kang Judas, kinsa mipahilayo gikan sa iyang higala nianang gabhiona.

Art

  • James Tissot, Conspiracy of the Jews [Konspirasiya sa mga Judeo]

  • James Tissot, The Meal in the House of the Pharisee [Ang Pagpangaon diha sa Balay sa Pariseo]

Imahe
Si Jesus nga nag-ampo diha sa Getsemani

Christ in Gethsemane [Si Kristo diha sa Getsemani], ni Dan Burr

Huwebes

Sa gabii nga wala pa Siya gilansang sa krus, si Jesus mipaambit sa Kataposan nga Panihapon uban sa Iyang mga disipulo. Niini nga pagpangaon, Siya mipasiugda sa sakramento, mihugas sa mga tiil sa Iyang mga higala, ug mihatag sa Iyang kataposan nga mga pagtulon-an. Dayon sa Tanaman sa Getsemani, Siya nag-ampo nga matinguhaon ngadto sa Amahan, nagtugyan ngadto sa Iyang kabubut-on ug nagdala diha Kaniya sa atong mga sala, mga kahuyang, mga konsimisyon, mga kasakit, ug mga kasubo. Human gibudhian ni Judas Iscariote ug gibiyaan sa Iyang mga higala, si Jesus gidakop ug gidala ngadto sa pangulong pari ug sa ubang mga lider sa Judeo, diin Siya gikuwestiyon ug gidagmalan.

Si Elder Jeffrey R. Holland sa Korum sa Napulog Duha ka Apostoles mitawag niini “ang pinakasubo nga pagbiyahe nga sukad nahitabo”9 ug nakabantay nga “ang mga takna nga diha-diha anaa sa unahan … [na]kausab sa kahulogan sa tanang tawhanong kasaysayan. … Ang takna sa maulaong sakripisyo miabot na. Ang kaugalingong Anak sa Dios, ang Iyang Bugtong Anak sa unod, hapit na mahimong Manluluwas sa kalibotan.”10

Mga Kasulatan

Mga Hilisgotan alang sa Posible nga Panaghisgotan

  • Unsa nga mga panalangin ang atong madawat pinaagi sa pag-ambit sa sakramento matag semana? Unsa ang gisimbolo sa pan ug tubig karon?

  • Ipaambit ang inyong mga pagpamatuod sa Pag-ula ni Kristo ngadto sa usag usa (mahimo usab ninyong basahon ang Alma 7:11–13 o Doktrina ug mga Pakigsaad 19:15–20).

Art

  • Carl Bloch, The Denial of Peter [Ang Paglimod ni Pedro]

  • Walter Rane, This Do in Remembrance of Me [Buhata Ninyo Kini sa Paghandom Kanako]

Musika

  • Usa ka paborito nga himno sa sakramento (tan-awa sa Mga Himno, mga nu. 99–129)

  • Mga Kalihokan 9‒38 sa kang Bach nga St. Matthew Passion

  • Kang Beethoven nga Christ on the Mount of Olives

Imahe
Si Jesukristo diha sa krus

Christ on the Cross [Si Kristo diha sa Krus], ni Carl Heinrich Bloch

Biyernes

Sa kataposan nga adlaw sa mortal nga kinabuhi ni Jesus, Siya gikwestiyon, gisusi, gibugal-bugalan, ug gisilotan nga ilansang sa krus. Diha sa krus, si Jesus mikompleto sa Iyang maulaong sakripisyo, mitugyan sa Iyang kinabuhi alang kanatong tanan. Sa kataposan, Siya gilubong sa usa ka lubnganan nga gihatag ni Jose nga taga-Arimatea.

Niini nga mga panghitabo, si Presidente M. Russell Ballard, Akting nga Presidente sa Korum sa Napulog Duha ka mga Apostoles, mitudlo: “Walay bisan usa ang adunay gahom sa pagtapos sa kinabuhi sa Manluluwas gikan Kaniya. … Siya mitugyan sa Iyang kaugalingon nga pagpalatos, sa pagpakaulaw, sa pag-antos, ug sa kataposan sa pagpalansang sa krus tungod sa Iyang dakong gugma ngadto sa katawhan (tan-awa sa 1 Nephi 19:9–10).”11

Mga Kasulatan

Mga Hilisgotan alang sa Posible nga Panaghisgotan

  • Kon giunsa nato sa paghinumdom ang Paglansang diha sa Krus sa Manluluwas makahimo og dako nga impluwensya sa atong kasinatian sa Pasko sa Pagkabanhaw. Daghan ang mahimo sa pagpahimutang sa kahimtang pinaagi sa art nga gipakita ug sa musika nga gipatukar sa atong mga panimalay niining adlawa. Samtang ang mga Santos sa Ulahing mga Adlaw dili kasagaran nga magpakita og daghan nga imahe sa pag-antos o Paglansang kang Kristo diha sa Krus, kini mao ang adlaw nga ang pagpakita niana nga art tingali mao ang angay. Kita dili maghandom sa kamatayon sa Manluluwas o sa bangis nga paagi sa Iyang pagkamatay. Hinoon, kita mosaulog sa Iyang kadaogan ibabaw sa kamatayon.

Art

  • Antonio Ciseri, Ecce Homo

  • Bisan unsa nga mga talan-awon nga gamhanan nga gihulagway ni James Tissot

  • Mga Pasundayag sa Paglansang diha sa Krus sama niadtong gihimo nila ni Carl Bloch, Harry Anderson, o ni J. Kirk Richards

Musika

  • Mga Kalihokan 39‒68 sa kang Bach nga St. Matthew Passion o sa iyang tanan nga St. John Passion

  • Ika-2 nga bahin sa kang Handel nga Messiah

  • Mga Kalihokan gikan sa The Redeemer [Ang Manunubos] pinaagi sa Santos sa Ulahing mga Adlaw nga komposer nga si Robert Cundick

  • “O Savior, Thou Who Wearest a Crown” (Hymns, nu.197)

  • “Didto sa Krus sa Kalbaryo” (Mga Himno, nu. 113)

  • “Ang Manunubos Sud-onga” (Mga Himno, nu. 112)

  • “Adunay Usa ka Labong nga Bungtod sa Layo” (Mga Himno, nu. 115)

Bidyo

  • Bisitaha ang BibleVideos.org aron matan-aw ang mga paglarawan sa kataposan nga adlaw sa kinabuhi ni Jesus, lakip sa Iyang husay ug Paglansang diha sa Krus.

Imahe
Si Jesukristo nga nagsangyaw didto sa kalibotan sa mga espiritu

Christ Preaching in the Spirit World [Kristo Nagsangyaw didto sa Kalibotan sa mga Espiritu], ni Robert T. Barrett

Sabado

Samtang ang lawas ni Jesus naghigda sa lubnganan, ang Iyang espiritu miadto sa paraiso. Didto Siya miorganisar sa mga espiritu sa matarong sa paghimo og misyonaryo nga buhat taliwala sa mga patay. Pinaagi sa buhat sa templo, kana nakapahimo sa kaluwasan nga posible alang niadtong kinsa walay kahigayonan sa pagdawat sa ebanghelyo niini nga kinabuhi (tan-awa sa Doktrina ug mga Pakigsaad 138).

Kon kita mohimo og family history ug buhat sa templo, kita miapil ni Kristo sa Iyang makaluwas nga buhat. Si Presidente Hinckley mitudlo: “Kadto nga gihimo sa sulod sa Balay sa Ginoo, … maduol sa espiritu sa gihimong sakripisyo sa Ginoo kay sa ubang mga kalihokan nga akong nahibaloan. Ngano? Tungod kay kini gihimo niadtong kinsa gawasnon nga mohatag sa panahon ug kwarta, nga wala magpaabot og bisan unsa nga pasalamat o ganti, sa pagbuhat alang sa uban nga dili makahimo alang sa ilang kaugalingon.”12

Mga Kasulatan

Mga Hilisgotan alang sa Posible nga Panaghisgotan

  • Sa unsa nga paagi nga ang kamatayon ug Pagkabanhaw ni Jesukristo moluwas kanato gikan sa usa ka simbolikanhon nga kangitngit susama sa kangitngit nga nasinati sa mga tawo sa Bag-ong Kalibotan?

  • Unsa ang gibuhat sa Manluluwas didto sa kalibotan sa mga espiritu samtang ang Iyang lawas diha sa lubnganan?

  • Unsa nga mga plano ang atong mahimo sa pagbuhat sa buhat sa family history ug pagtambong sa templo?

Art

  • James Tissot, The Watch over the Tomb [Ang Nagbantay diha sa Lubnganan]

Musika

  • Mga Kalihokan gikan sa The Redeemer [Ang Manunubos] pinaagi sa Santos sa Ulahing mga Adlaw nga komposer nga si Robert Cundick

  • Requiem pinaagi sa Santos sa Ulahing Adlaw nga komposer nga si Mack Wilberg

Imahe
Si Maria ug ang nabanhaw nga si Jesus

The Resurrection [Ang Pagkabanhaw], ni Harry Anderson

Dominggo sa Pasko sa Pagkabanhaw

Ang pagtuon sa mga asoy sa Pagkabanhaw gikan sa mga Ebanghelyo, pagpanganta sa mga himno sa Pasko sa Pagkabanhaw diha sa simbahan, ug pagkalingaw sa atong lain-laing mga tradisyon sa Pasko sa Pagkabanhaw mao ang gihatagan og bili nga mga paagi sa pagsaulog sa pagbuntog ni Jesus sa kamatayon ug sa milagro sa walay sulod nga lubnganan.

Si Presidente Howard W. Hunter (1907–95) mipamatuod: “Niining maanindot ug sagrado nga kataposan sa semana nga Pasko sa Pagkabanhaw, sa pagkatinuod walay doktrina nga maoy hilisgotan sa mas daghan nga sermon ni ang tumong sa mas labaw nga pagdayeg kay sa nianang maulaong sakripisyo ug sa literal nga pagkabanhaw sa Ginoo, nga si Jesukristo. Ug mao nga kinahanglang diha sa Pasko sa Pagkabanhaw ug diha sa matag ubang panahon sa tuig, kay walay doktrina sa balaod sa Kristiyano ang mas importante ngadto sa tanang katawhan kay sa doktrina sa pagkabanhaw sa Anak sa Dios. Pinaagi kaniya miabot ang pagkabanhaw sa tanang mga lalaki, mga babaye, ug mga bata nga natawo sukad—o matawo pa—sa kalibotan.”13

Mga Kasulatan

Mga Kalihokan

  • Pagpundok uban sa mga minahal alang sa usa ka debosyonal sa pamilya ug usa ka espesyal nga pagpangaon sa holiday.

  • Mohalad og pag-ampo sa pamilya ug mopaambit og mga pagpamatuod mahitungod sa Pagkabanhaw.

  • Moadto sa simbahan ug moambit sa sakramento.

Art

  • Minerva Teichert, Touch Me Not [Ayaw Akog Hikapa]

  • Harry Anderson, Behold My Hands and My Feet [Tan-awa Ninyo ang Akong mga Kamot ug mga Tiil]

Musika

  • “Kristo Nabanhaw Karon,” (Mga Himno, nu. 119)

  • “Siya Nabanhaw!” (Mga Himno, nu. 118)

  • Ika-3 nga bahin sa kang Handel nga Messiah

Kami manghinaot nga kini nga mga ideya motabang kaninyo sa paggamit sa semana sa dili pa ang Pasko sa Pagkabanhaw sa pagsaulog sa kinabuhi, kamatayon, ug Pagkabanhaw ni Jesus. Sama nga ang paggamit sa mga kasulatan, art, ug musika nga paingon ngadto sa Pasko makatabang sa paghimo ni Kristo nga sentro niana nga holiday, ang pagbuhat sa ingon sa Pasko sa Pagkabanhaw makatabang nato sa paghinumdom Kaniya ug sa paglig-on sa atong hugot nga pagtuo diha Kaniya.

Mubo nga mga Sulat

  1. Gordon B. Hinckley, “The Wondrous and True Story of Christmas,” Liahona, Dis. 2000, 6.

  2. Russell M. Nelson, “This Easter, Find Peace in Jesus Christ,” Mar. 28, 2021, ChurchofJesusChrist.org/inspiration.

  3. Alang sa gisugyot nga mga kronolohiya, tan-awa sa Ang Giya ngadto sa mga Kasulatan Eric D. Huntsman, God So Loved the World (2011), 129–33; Eric D. Huntsman ug Trevan Hatch, Greater Love Hath No Man (2023), 267–77.

  4. Dieter F. Uchtdorf, “Ang Dalan sa Disipulo,” Liahona, Mayo 2009, 75.

  5. Tan-awa sa Huntsman, God So Loved the World, 13.

  6. Neil L. Andersen, “Paanhia ang Imong Gingharian,” Liahona, Mayo 2015, 122.

  7. Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 9, 10.

  8. Linda K. Burton, “Nadumuluong Ako,” Liahona, Mayo 2016, 15.

  9. Jeffrey R. Holland, “Walay Bisan Usa nga Nakig-uban Kaniya,” Liahona, Mayo 2009, 86.

  10. Jeffrey R. Holland, “This Do in Remembrance of Me,” Ensign, Nob. 1995, 67.

  11. M. Russell Ballard, “Ang Pag-ula ug ang Bili sa Usa ka Kalag,” Liahona, Mayo 2004, 85.

  12. Gordon B. Hinckley, “The Spirit of Elijah,” Liahona, Nob. 1996, 21.

  13. Howard W. Hunter, “He Is Risen,” Ensign, Mayo 1988, 16.