“Among Buotan nga Silingan,” Liahona, Abr. 2023.
Mga Tingog sa mga Santos sa Ulahing mga Adlaw
Among Buotan nga Silingan
Sa adlaw nga nagkinahanglan ko og tabang, si Elder Russell M. Nelson mitubag sa usa ka pag-aghat ug miabot aron tabangan ko.
Paghulagway pinaagi ni Dilleen Marsh
Sa dihang ang akong pamilya ug ako mibalhin uban sa akong nabalo nga ugangan nga babaye, si Effie Dean Rich, usa sa among tupad nga silingan mao si Elder Russell M. Nelson, kinsa natawag ngadto sa Korum sa Napulog Duha ka Apostoles pipila ka tuig ang milabay.
Atol sa panahon nga silingan kami, nalingaw kami sa pagtabang ni Elder Nelson ug sa iyang unang asawa, si Dantzel, sa ilang mga proyekto, ug sila malipayon sa pagtabang kanamo sa among mga proyekto. Kana naglakip sa paghimo sa usa ka kimba sa among luyo nga nataran ngadto sa usa ka matahom nga dapit nga adunay mga bungbong nga nagpugong sa yuta, nagkuros-kuros nga mga agianan, hagdanan, ug mga tanom. Kon milakaw si Elder Nelson sa usa ka buluhaton sa Simbahan, tabangan namo si Sister Nelson sa bisan unsay iyang gikinahanglan.
Human nga natapos namo ang kimba nga proyekto, ang akong pag-umangkon ug ang iyang pangasaw-onon mihangyo nga ipahigayon ang ilang salo-salo sa kasal diha sa kimba ug hardin. Nagplano sila nga moanhi ug motabang sa kataposang pagpanglimpyo sa dili pa ang kalihokan.
Apan milabay ang panahon. Nabisi sila ug wala na makaanhi. Sa adlaw sa open house, nakamata ko alas 6:00 sa buntag nga gibati nga nagmug-ot. Mibangon ko, gikuha ang akong balde ug mga igpuputol, ug milakaw ngadto sa kinaubsan sa 58 ka ang-ang sa hagdan sa kimba. Samtang anam-anam kong misaka sa hagdan nga namutol sa English ivy, mikalma ang akong mga pagbati. Sa hapit na mag-alas 8:00 sa buntag, nakadungog ko og tighabas sa nataran [lawnmower] diha sa atubangan nga nataran. Mihunong ko og kadiyot aron tan-awon kon unsay nahitabo.
Sa dihang naabot ko sa atubangan nga nataran, nahuman na og habas si Elder Nelson sa iyang nataran ug karon naghabas sa akong nataran.
“Dili nimo kana kinahanglang buhaton,” miingon ko.
“Oo, Grant,” mitubag siya, “gikinahanglan nako kining buhaton alang kanimo karon.”
Si Elder Nelson nahibalo kon unsaon sa pagpaminaw sa Langitnong Amahan. Nianang adlawa, nasayod ang Dios nga nagkinahanglan ko og gamayng tabang.
Kana nga kasinatian nakapausab nako. Pagkahuman niana, kon ang akong asawa ug ako mag-ampo sa matag adlaw, magsugod kami nga mangayo nga mahimong mahibalo niadtong nagpalibot kanamo kinsa nanginahanglan sa among tabang.
Pipila ka tuig kaniadto, atol sa lahi nga panahon, ang akong ugangan nga lalaki, si John P. Rich, migawas aron palahon ang niyebe gikan sa iyang daplin nga agianan. Apan, nahimo na kini ni Elder Nelson. Misulod og balik si John ug misulat niini nga balak:
Nakakita ko og mga wali diha sa bato
Ug mga wali diha sa mga bulak
Mga wali nga molungtad og pipila ka minuto
Mga wali nga molungtad og pipila ka oras
Apan bag-ohay lang kong nakakita og wali
Nga gihimo pinaagi sa pagserbisyo
Nga hingpit nga mipakita kanako
Unsaon nga mahimong maayo nga silingan
Hangtod niining adlawa, nagpabilin kaming mapasalamaton alang sa among buotan nga silingan.