Alang sa mga Ginikanan

Pagpangandam ug Pag-uswag

amahan nga nagtan-aw samtang ang iyang anak nga lalaki nagsulat diha sa usa ka papel

Minahal nga mga Ginikanan,

Kining bulana nga isyu makatabang kaninyo sa pagsugod og mga panaghisgotan uban sa inyong mga anak mahitungod kon sa unsang paagi nga ang pagpangandam makaabag sa atong pag-uswag ngadto sa mahangtorong kaluwasan. Ang mga ideya sa ubos naglangkob sa mga hilisgotan sama sa pagpangandam alang sa kahangtoran, ang tahas sa Espiritu Santo sa temporal ug espirituhanon nga edukasyon, ug unsaon sa paghimong mas makahuloganon ang semana sa dili pa ang Pasko sa Pagkabanhaw.

Mga Panaghisgotan sa Ebanghelyo

Pagpangandam alang sa Kahangtoran

Basaha ang artikulo ni Presidente Nelson nga “Si Jesukristo Mao ang Atong Manluluwas,” sa pahina 4. Aduna bay mga sakop sa pamilya nga inyong gilaoman nga mahimamat pag-usab diha sa sunod nga kinabuhi? Unsa nga mga ordinansa ang makatabang sa inyong pamilya nga magkauban sa kahangtoran? Pangutana: “Naghimo ba kita og mga desisyon para karon o para sa kahangtoran?”

Paghimo ni Kristo nga Sentro sa Pasko sa Pagkabanhaw

Gamit ang mga ideya diha sa artikulo nga “Paghimo sa Pasko sa Pagkabanhaw nga usa ka Panahon sa Paghinumdom sa Manluluwas” sa pahina 8, pagpundok uban sa inyong pamilya ug hisgoti kon unsa ang inyong mabuhat aron mas mahinumdoman ang Manluluwas diha sa inyong mga pagsaulog sa Pasko sa Pagkabanhaw. Hain sa mga kasulatan, mga himno, o mga buhat sa art nga interesado ang inyong pamilya nga mas kat-onan pa?

Pag-uswag pinaagi sa Pagkat-on

Rebyoha ang “Edukasyon: Usa ka Espirituhanon nga Paninguha” sa pahina 18. Sa unsang paagi nga ang inyong pamilya napanalanginan samtang gitinguha ninyo ang Espiritu Santo sa pagtabang kaninyo sa inyong edukasyon? Adunay bay mga paagi nga inyong madapit ang Espiritu Santo nga mahimong usa ka mas dako nga bahin sa inyong pagkat-on, bisan sa sekular nga edukasyon? Unsa ang pipila ka paagi nga kamo ug ang inyong pamilya makatabang sa usag usa nga makaangkon og dugang nga edukasyon? Usa ba sa mga programa sa edukasyon sa Simbahan mohaom ba gayod alang sa usa ka tawo sa inyong pamilya?

Kalingawan sa Pamilya sa Dali, Sunod Kanako

Usa ka Pagbati sa Pagpadayag

Mateo 16

Si Pedro nakakita ug nakadungog sa mga pagtulon-an sa Manluluwas. Apan, nadawat niya ang iyang pagpamatuod ni Kristo pinaagi sa pagpadayag imbes pinaagi sa iyang pisikal nga mga pamalatian—iyang “unod ug dugo” (tan-awa sa Mateo 16:13–17).

Pagpundok og pipila ka butang (tan-awa ang mga ideya sa ubos). Pagpuli-puli nga taptapan ang mata. Ipagamit sa matag tawo ang ilang ubang upat ka pamalatian aron tagnaon kon unsa ang butang.

Mga ideya:

• Mosimhot og bulak

• Motilaw og lamian nga pagkaon

• Maminaw sa usa ka awit

• Mohikap og humok nga sweater

Panaghisgotan: Basaha ang Doktrina ug mga Pakigsaad 6:14–15 ug 8:2–3. Sa unsang paagi kita makakat-on og kamatuoran pinaagi sa espirituhanon nga pamalatian sa pagpadayag imbes magsalig lamang sa atong pisikal nga mga pamalatian? Hibaloi nga ang tanan makadawat og pagpamatuod pinaagi sa Espiritu Santo apan ang uban mobati niana nga impluwensya sa lahi nga paagi kay sa uban. Sa unsang paagi nga ang personal nga pagpadayag pinaagi sa Espiritu Santo makapalawom sa atong mga pagpamatuod ni Kristo?

Gisumiter ni Mitzi Schoneman

Gikan sa Alang sa Kalig-on sa mga Kabatan-onan nga Magasin

nabanhaw nga Jesus ug si Maria dapit sa lubnganan

Usa ka Bulahan nga Kaugmaon

Si Presidente Nelson mipaambit sa kabatan-onan kon sa unsang paagi ang Manluluwas mopanalangin sa ilang mga kaugmaon dinhi niining mortal nga kinabuhi ug mohimong posible sa ilang mahangtoron nga mga kaugmaon.

Usa ka Mas Maayo nga Paagi sa Pagkat-on

Ang Espiritu Santo adunay tahas sa tanan natong pagkat-on sa tibuok natong kinabuhi.

Tabang Kon Mobati Kamo nga Huyang

Sutaa kon sa unsang paagi si Jesukristo makapalig-on kanato sa atong mga kahuyang.

Gikan sa Higala nga Magasin

batang lalaki nga adunay usa ka basahon

Pagsaulog sa Pasko sa Pagkabanhaw

Basaha ang usa ka mensahe sa Pasko sa Pagkabanhaw gikan ni Presidente Nelson ug pangita og mga istorya ug mga kalihokan aron sa pagtudlo sa inyong mga anak mahitungod sa Pagkabanhaw ni Jesukristo.

Dali, Sunod Kanako nga mga Kalihokan

Pangita og sinemana nga mga kalihokan aron makatabang nga mahimong makalingaw ang inyong pamilya nga pagtuon sa kasulatan.

Ngano nga Importante nga Magkat-on?

Basaha ang tubag ni Elder Bednar niini nga pangutana ug tabangi ang inyong anak nga makakat-on kon nganong importante ang edukasyon.

Ang Akong Dalan sa Pakigsaad

Gamita kini nga pahina aron sa pagtudlo sa inyong anak mahitungod sa usa ka panalangin diha sa dalan sa pakigsaad nga makatabang kanila nga makabalik sa pagpuyo uban sa Langitnong Amahan ugma damlag.