Pangserbisyo nga mga Misyonaryo Nagtukod sa Simbahan

Ni Matthew C. Godfrey ug John Heath

Departamento sa Kasaysayan sa Simbahan

Giunsa sa pangserbisyo nga mga misyonaryo sa tibuok kasaysayan sa Simbahan pagtabang sa pagpakigbahin sa ebanghelyo.

Imahe

usa ka collage sa pangserbisyo nga mga misyonaryo

Sa dihang si Elder Nathaniel Johnson nahuman sa iyang full-time nga misyon, gipamalandong niya ang milabay nga duha ka tuig––ang trabaho nga iyang gibuhat, ang mga tawo nga iyang gipanalanginan, ug ang paagi nga siya milambo. Gi-assign siya sa pagserbisyo sa usa sa 124 ka balay-tipiganan sa bishop nga gidumala pinaagi sa Simbahan sa tibuok kalibotan. Siya modiskarga sa mga trak, mopundo sa mga estante, ug molimpyo sa balay-tipiganan.

Alang kaniya, ang labing makahuloganong mga kasinatian mao ang pagtabang sa mga patron sa pagsulat sa mga order alang sa dinalian kaayong panginahanglan sa pagkaon ug mga kagamitan. Miingon siya, “Una sa tanan ako nagdala sa kahayag ni Kristo ngadto sa kinabuhi sa ubang mga tawo aron sila makahibalo nga sila kabahin sa plano sa Langitnong Amahan.”

Sa nagkapuliki nga mga adlaw atol sa COVID-19 nga pandemik, ang mga patron naglinya libot sa tibuok eskina ug ang balay-tipiganan abli sulod sa 10 ka oras kada adlaw. “Akong nakat-onan nga kon ang Ginoo anaa uban kanato, kita makahimo sa pagbuhat og bisan unsa ug makalampos sa bisan unsa nga hagit,”¹ iyang naobserbahan.

Si Elder Johnson nagpadayon sa usa ka taas nga tradisyon sa mga misyonaryo nga gitawag sa pagtukod sa Simbahan sa mga paagi gawas sa proselyting. Sukad sa labing unang mga panahon sa Simbahan, ang mga misyonaryo gitawag sa paghago diha sa mga minahan, pagpintal diha sa mga pader [murals] sa mga templo, pagkuha og genealogy, pagtukod og mga eskwelahan ug mga gambalay sa Simbahan, ug paghatag og kahopayan ug serbisyo sa kalooy. Ang ilang mga kahago nagpasiuna sa buhat sa Simbahan sa pagbayaw ug pagpanalangin sa mga anak sa Dios sa intelektwal, sosyal, ug temporal, ingon man usab sa espirituhanong paagi. Sa proseso, ang mga pagpamatuod sa mga misyonaryo nalig-on usab, ug sila nakabaton og mga kahanas ug kasintian nga molungtad sa tibuok kinabuhi.

Unang mga Paningkamot

Si Joseph Smith ug ang ubang mga lider sa Simbahan usahay miserbisyo og mga misyon alang sa mga katuyoan gawas sa proselyting. Sa Pebrero 24, 1834, sama pananglitan, nakadawat si Joseph Smith og usa ka pagpadayag nga mitudlo kaniya ug sa laing pito ka tawo sa “pagpundok” sa “kusgan nga mga tawo sa … balay [sa Ginoo]” sa pagtubos sa Zion (Doktrina ug mga Pakigsaad 103:22). Gisugo sila sa pagbiyahe ngadto “sa mga katigoman sa silangan nga mga nasod” ug sa pagsangyaw sa panginahanglan alang sa mga lalaki ug sa salapi sa pagtuman sa katubsanan sa Zion (Doktrina ug mga Pakigsaad 103:29–40). Si Orson Hyde gisugo usab sa pagpangayo og mga donasyon nga ang Simbahan makagamit sa pagpalit og yuta sa Missouri ug sa pagbayad sa utang nga nahimo alang sa Templo sa Kirtland.²

Sa dihang si Brigham Young nahimong Presidente sa Simbahan, mitawag siya og mga indibidwal sa pagmisyon uban sa mas daghang temporal nga mga tumong, nag-ila nga bisan ang temporal nga mga trabaho adunay espirituhanong mga katuyoan. Sa 1856, mitudlo siya og mga misyonaryo sa pagbiyahe ngadto sa Las Vegas nga erya sa pagsulay sa pagmina og tingga. Ang uban gitawag sa pagmina ug sa pagtunaw og puthaw.³ Kini nga matang sa temporal nga mga misyon maingon og sagad sa ikanapulog siyam nga siglo.

Mga Misyonaryo sa Art

Sa hinapos sa ikanapulog siyam nga siglo, ang Simbahan mipadala og pinili nga mga artist sa pagtuon didto sa Paris, France, aron sila makapintal og mga pader sa Templo sa Salt Lake. Sila si John Hafen, John B. Fairbanks, ug Lorus Pratt gitawag ug gi-set apart sa 1890 sa piho isip “mga misyonaryo sa art.” Mi-eskwela sila diha sa inila nga Academie Julian sa Paris. Sama sa tanang mga misyonaryo, sila misalig diha sa paggiya sa Ginoo ug mibati sa Iyang Espiritu diha sa ilang buhat. Misulat si John Hafen, “Ako adunay pagpamatuod nga ang Ginoo makapahimo kanako sa pagtuman sa tanan nga gikinahanglan diha sa tuig nga gitagal alang kanako sa pagpabilin dinhi.”⁴ Sumala sa mga iskolar nga sila ni Maria Elizabeth Bradley ug Lowell M. Durham Jr., kining mga misyonaryo sa art mga “talagsaon. Wala gayod sukad niana nga dihay pagsulay sa pag-usab sa kasinatian, bisan tuod ang dihadiha dayon nga mga resulta sa paningkamot mga malampuson kaayo.”⁵

Mga Misyonaryo sa Edukasyon

Agi og dugang sa pagbayad sa mga indibidwal nga nagtinguha og edukasyon sa art, ang Simbahan mitawag og mga indibidwal sa pagtuon og balaod, inhenyeriya, ug medisina. Mipadala si Brigham Young ni Heber John Richards ngadto sa Siyudad sa New York sa 1867 sa pagbansay didto sa Bellevue Hospital Medical College. Gitudloan siya sa aktibo nga pag-apil diha sa kongregasyon sa mga Santos sa Siyudad sa New York ug sa pagsangyaw sa ebanghelyo kon walay klase. Si Romania Pratt mitubag ngadto sa tawag ni Brigham Young alang sa dugang pa nga babaye nga medikal nga mga doktor. Sa wala pa siya mibiya aron sa pagtuon og medisina didto sa Women’s Medical College sa Philadelphia, Pennsylvania, USA, nadawat ni Romania ang usa ka panalangin gikan ni Presidente Young, kinsa mihan-ay og pinansiyal nga suporta alang ni Romania gikan sa Relief Society.⁶

Karon, ang pangserbisyo nga mga misyonaryo nagpadayon sa pagsuporta sa Church Educational System sa mga tahas sama sa mga espesyalista sa edukasyon ug mga tigbansay nga magtutudlo.

Mga Misyonaryo sa Genealogy

Ang buhat sa pagpahigayon og proxy nga mga ordinansa alang sa patay nga mga katigulangan diha sa mga templo nagmugna og importante kaayo nga panginahanglan alang sa impormasyon sa genealogy. Daghan ang miboluntaryo sa pagbiyahe ngadto sa mga archive ug mga yutang natawhan sa mga katigulangan sa pagkuha niini. Bisan tuod og kini nga mga boluntaryo miserbisyo nga walay pormal nga mga tawag, mibuhat sila sa mao uban sa panalangin sa mga lider sa Simbahan. Ang mga boluntaryo mipadayon sa pagserbisyo sa mga tahas sa genealogy ngadto sa tibuok nga mga 1900. Sa hinay-hinay ang ilang serbisyo nahimong mas opisyal. Sa pagka-1979 ang Simbahan nagtawag og mga misyonaryo sa pagserbisyo sa punoang buhatan sa nagkalainlaing mga katungdanan.⁷ Busa kini nahimong natural sa 1981 sa pagtawag og full-time nga mga misyonaryo sa pagserbisyo diha sa Genealogical Library. Karon, ang mga misyonaryo nagserbisyo sa hapit tanang bahin sa buhat sa family history sa mga dapit sa tibuok kalibotan.⁸

Mga Misyonaryo sa Pagtukod

Sa 1950, ang Simbahan nagtukod sa Liahona High School didto sa Tonga, apan kini wala makakaplag og igo nga hanas nga mga trabahador sa paghuman niini. Ang presidente sa misyon sa Tonga “mihukom sa pagtawag og usa ka grupo sa batan-ong Tongan nga mga lalaki ngadto sa mga misyon sa espesyal nga trabaho.” Kining batan-ong mga lalaki mitabang sa pagtukod sa hayskol, susama kaayo sa mga miyembro sa Simbahan sa Kirtland, Ohio, ug Nauvoo, Illinois, nga mihatag og paghago [labor] alang sa pagtukod sa mga templo. Ang ideya sa wala madugay mikaylap ngadto sa ubang dapit sa Pasipiko ug sa kataposan ngadto sa mga dapit sa tibuok kalibotan. Ang programa “mipanalangin sa daghang mga branch nga may bag-o ug nindot nga mga chapel samtang kini naghatag og bokasyonal nga pagbansay alang sa gatosan ka batan-ong mga lalaki.”⁹

Daghan ang mipahayag og pasalamat alang sa oportunidad sa pagserbisyo. Si Boyd Richardson, kinsa miserbisyo sa usa ka gambalay nga proyekto sa Ohio, miingon, “Nakahuman ako og usa ka proselyting nga misyon dinhi sa U.S. ug tungod [niana] nga kasinatian ako magbilin sa akong pagpamatuod nga ang sama ka nindot nga espiritu nga anaa taliwala sa mga Magtutukod sa Simbahan anaa usab taliwala sa proselyting nga mga Elder.” Mipadayon si Richardson, “Ingon nga ang usa ka proselyting nga misyon [nag-apekto] sa tibuok kinabuhi ug kinaiya sa usa ka Elder, mao usab sa magtutukod nga misyon.”

Namatikdan sa uban nga ang pagtukod nga programa mismo mitabang sa pagdala sa mga tawo ngadto sa Simbahan ug milig-on sa mga pagpamatuod sa nabunyagan na nga mga miyembro. Miingon si Don H. Worthen, “Kini makaikag kaayong tan-awon ang mga tawo samtang sila molabay matag adlaw ug sa pagpamati sa ilang mga komentaryo. Naikag silang mohunong ug mangutana, ug dayon among makuha ang higayon sa pagsulti kanila mahitungod sa ebanghelyo, ug sa paghatag sa among mga pagpamatuod ngadto kanila.” Sila si James ug Ruth Morse, nagserbisyo sa England, adunay susama nga mga hunahuna. “Among namatikdan ang dakong kausaban sa dili aktibo nga mga miyembro diha sa ilang kinaiya ngadto sa Simbahan sa higayon nga masugdan na ang bag-ong mga chapel,” mipasabot ang mga Morse. “Ingon og sila mapagarbuhon sa pagdala sa mga tawo sa pagtan-aw kon unsay gipangbuhat [sa mga miyembro sa Simbahan] ug dayon sa mubo nga panahon, sila nanobra ang pagtrabaho didto sa proyekto sa ilang mga kaugalingon ug sa labing dako nga bahin, sila mahimong mabalik sa pagka-aktibo sa mga katungdanan diha sa Simbahan.”¹⁰

Karon, ang mga misyonaryo nagpadayon sa pagsuporta sa pagmentinar sa gambalay sa tibuok kalibotan sa lainlaing mga paagi nag-agad sa lokal nga mga panginahanglan.

Mga Misyonaryo sa Welfare [Kaayohan]

Dili maihap nga mga indibidwal ug mga magtiayon ang miserbisyo sa internasyonal ug lokal nga welfare nga mga misyon. Ang nagkalainlain ug gidak-on sa ilang serbisyo mitubo sa pagsumpay sa tibuok kalibotan ug sa lugway sa tawhanong panginahanglan. Ingon nga sila nakaserbisyo sa mga proyekto lakip ang panudlo ug ang mapuslanong tabang diha sa kasigurohan sa pagkaon, medikal nga tabang, panahi, mga proyekto sa limpyo nga tubig, ug kahibalo sa pagbasa ug pagsulat sa pagtabang alang sa mga may kabilinggan, ang mga misyonaryo sa welfare nagsunod sa ehemplo sa Manluluwas sa pag-amuma alang niadtong anaa sa panginahanglan. Ang ilang mga report nagpakita og espirituhanong kadak-on niining temporal nga serbisyo. Si Sister Connie Polve ug ang iyang kompanyon, ang duha mga nurse nga nagserbisyo og welfare nga mga misyon sa Paraguay, mitambal sa usa ka masuso nga nag-antos gikan sa grabeng impeksyon sa panit. Siya mireport, “Tataw nakong gibati ang Espiritu sa Espiritu Santo nga nanaog diha kanako ug ako nahibalo nga ako wala na maglihok ubos sa akong kaugalingong direksiyon, apan sa pagkatinuod nahimong usa ka tinuod nga himan diha sa kamot sa Ginoo sa paghimo og buhat alang Kaniya dinhi sa yuta.” Ang masuso naayo, ug ang pamilya––makausa “napakyas, maulawon nga mga tawo”––midan-ag sa “kalig-on ug [sa] kahayag ni Kristo [diha] sa ilang mga panagway.”¹¹ Karon, labaw sa 11,000 ka misyonaryo nag-amuma alang niadtong anaa sa panginahanglan sa 188 ka nasod.¹²

Usa ka Nagpadayong Buhat sa Ginoo

Karon, ang pangserbisyo nga mga misyonaryo nagpadayon sa pagtrabaho sa buhat sa Ginoo sa lainlaing mga paagi. Kadto nga mga oportunidad mahimong naglakip sa pagsuporta sa mga panginahanglan sa welfare, pagtabang sa mga indibidwal ug mga pamilya diha sa ilang komunidad, pagtabang sa mga programa ug mga palakaw sa lokal nga Simbahan, pag-amuma sa pisikal nga mga pasilidad, pagtabang sa mga komunikasyon, paghimo og mga aytem nga gikinahanglan sa uban, indexing ug paghimo sa buhat sa family history, pakigtambayayong uban sa mga organisasyon sa kalooy, ug daghan pa. Kasagaran, kini nga mga misyonaryo mahimong moserbisyo gani sa nagkalainlaing mga buluhaton sa ilang tibuok nga mga misyon samtang sila nag-apil diha sa buhat sa atong Ginoo.

Ang mga kontribusyon sa mga henerasyon nga pangserbisyo nga mga misyonaryo magkauban nga nagtinabangay uban sa mga paningkamot sa mga proselyting nga mga misyonaryo sa pagtukod sa Simbahan ug sa gingharian sa Dios. Ang ilang mga kahago nagsapaw ug naglambigit, nagbayaw ug nagpanalangin sa mga anak sa Dios diha sa tanang bahin sa ilang mga kinabuhi. Ang mga misyonaryo nagdawat sa mga panalangin sa samang sukod alang sa ilang kadasig diha sa unsay sa pagkatinuod usa ka trabaho: pagtabang ni Ginoong Jesukristo diha sa buhat sa kaluwasan ug kahimayaan samtang Siya “[nag]pahinabo sa pagka-imortal ug sa kinabuhi nga dayon sa tawo” (Moises 1:39).