Faamatalaga e uiga i Sauniga o le Malumalu

Na faalauiloa mai e le Au Peresitene Sili le savali lenei i le aso 20 o Iulai, 2020, e uiga i suiga i le sauniga o faaeega paia o le malumalu:

“O aoaoga paia, folafolaga, ma sauniga o le malumalu e faapogai mai anamua, ma faasino atu fanau a le Atua ia te Ia a o latou osia isi feagaiga ma aoao atili e uiga i Lana fuafuaga, e aofia ai le matafaioi a le Faaola o Iesu Keriso.

“E ala i musumusuga, o metotia o faatonuga i aafiaga o le malumalu ua suia i le tele o taimi, e oo lava i talafaasolopito lata mai, e fesoasoani ai i tagata ia malamalama atili ma ola i mea latou te aoaoina i le malumalu.

“O se vaega o aafiaga o le malumalu e aofia ai le osia o feagaiga paia, po o folafolaga, i le Atua. O le tele lava o tagata ua masani i faatinoga faafaatusa e o mai faatasi ma le osia o feagaiga faalelotu (e pei o le tatalo, faatofuina o se tagata i le papatisoga, po o le uuina o lima i le taimi o se sauniga o le faaipoipoga). E faapena foi le faigofie, o ni taga faafaatusa e o mai faatasi ma le osia o feagaiga o le malumalu.

“Faatasi ai ma se popolega mo tagata uma ma se manao ina ia faaleleia le aafiaga o le aoaoina o le malumalu, ua faatagaina ai suiga talu ai nei i le sauniga o faaeega paia o le malumalu. I le i ai o le paia o sauniga o le malumalu, matou te talosagaina ai o tatou tagata ma uo e aua le faia ni talanoaga taumatemate pe faalauaitele e uiga i nei suiga. Nai lo lena, matou te valaaulia tagata o le Ekalesia ina ia faaauau pea ona tulimatai atu i le aso o le a mafai ai ona latou toe foi mai ma auai atoatoa i le galuega paia o le malumalu ma le loto tatalo ma le agaga faafetai.”