Ia Outou Mataala ma Tatalo e Le Aunoa
O le asō, ou te faalautele atu ai la’u valaaulia mo tatalo i tagata uma mai atunuu uma o le lalolagi atoa.
O’u uso e ma tuafafine pele, i le toe vaiaso o Lana galuega i le olaga nei, sa aoao atu ai e Iesu i Ona soo “o lea ia outou mataala ai ma tatalo e le aunoa, ina ia ta’uaogaina outou e sao mai i mea uma ua tali oo mai, ma ia tutū i luma o le Atalii o le tagata.”1
Faatasi ai ma “mea ua tali oo mai, a o lei oo i Lona Afio Mai Faalua o “taua i lea mea ma lea mea ma tala o taua[,] … o oge, ma faama’i, ma mafuie, i nofoaga eseese.”2
I le Mataupu Faavae ma Feagaiga na fetalai le Faaola, “Ma o le a vavao mea uma; … ona o le a oo mai le mata’u i luga o tagata uma.”3
E moni, ua tatou ola i se taimi ua vavao ai mea. E toatele tagata ua fefefe i le lumanai, ma ua tele loto ua fulitua i lo latou faatuatua i le Atua ma Lona Alo, o Iesu Keriso.
Ua tumu lipoti o talafou i tala o le limatētē. Ua faasalalau i luga o upega tafa’ilagi anomea mataga. O fanuatanu, falesa, faletatalo faamoameta, sunako, ma maota paia ua lepetia.
O le aafiaga aoao o se faama’i oti ua toetoe ina pa’i atu i tulimanu uma o le lalolagi: ua faitau miliona tagata ua aafia ai; ua fiaselau afe ua maliliu ai. Ua faasalaveia faauuga a a’oga, o sauniga tapuai faale-ekalesia, o faaipoipoga, galuega faafaifeautalai, ma le anoanoai o isi mea taua o le olaga. Faaopoopo atu i ai, le le mafaitaulia o tagata ua tuuatoatasi ma ua faaesea.
O suiga faafuasei o le tamaoaiga ua afua ai luitau mo le toatele naua, aemaise o fanau sili ona lamatia ai a lo tatou Tama Faalelagi.
Ua tatou vaaia tagata o faaali atu ma le gaualofa a latou aia tatau e solotetee filemu ai, ma ua tatou vaaia foi le fouvale o le au faatupu faalavelave ‘ina’ina.
O le taimi lava foi lea, o loo tatou vaaia ai pea feteenaiga i le lalolagi atoa.
E tele taimi ou te mafaufau ai ia te outou o loo puapuagatia, popole, fefefe, pe o lagonaina le tuulafoaiina. Ou te faamautinoa atu ia te outou taitoatasi o loo silafia oe e le Alii, Na te silafia oe ma ou atugaluga ma mafatiaga, ma e alofa o Ia ia te oe—māfana patino, e loloto ma faavavau.
I po taitasi pe a ou tatalo, ou te ole ai lava i le Alii ia faamanuia i latou uma o e o mafatia i le loto faavauvau, tiga, tuulafoaiina, ma le faanoanoa. Ou te iloa o le tatalo foi lea a taitai o isi Ekalesia. E avatu o matou loto, taitoatasi ma soofaatasi ia te outou, ae ava’e a matou tatalo i le Atua mo outou.
Sa ou faaaluina le tele o aso i le tausaga na te’a nei i le itu i matusisifo o le Iunaite Setete e asiasi ai i mataaga o le talafaasolopito o Amerika ma le Ekalesia, ma auai i fonotaga ma sauniga ma a tatou faifeautalai ma o tatou tagata, ma talatalanoa i taitai o malo ma pisinisi.
I le Aso Sa, 20 o Oketopa, sa ou lauga ai i se tauaofiaga tele e lata i Positone Masatusa. A o ou tautala, sa uunaia au e fai atu, “Ou te aioi atu ia te outou … e tatalo mo lenei atunuu, mo o tatou taitai, mo o tatou tagata, ma mo aiga o loo nonofo i lenei atunuu tele na faavaeina e le Atua.”4
Sa ou fai atu foi o Amerika ma le toatele o malo o le lalolagi, e pei ona i ai i aso ua mavae, o loo i ai i ni magaala felavasa’i taua tele.5
Sa le’i i ai la’u aioiga i a’u lauga na tapena. Na oo mai na upu ia te au ina ua ou lagonaina le uunaia o au e le Agaga e valaaulia i latou na i ai e tatalo mo lo latou atunuu ma taitai.
O le asō, ou te faalautele atu ai la’u valaaulia mo tatalo i tagata uma mai atunuu uma o le lalolagi atoa. E le afaina pe faapefea ona e tatalo pe o ai foi e te tatalo i ai, ae faamolemole faaalia lou faatuatua—po o le a lava lou faatuatuaga—ma tatalo mo lou atunuu ma mo taitai faalemalo. Pei ona ou fai atu ia Oketopa talu ai i Masatusa, ua tatou tutu nei i ni magaala felavasa’i tele i le talafaasolopito, ma ua matua manaomia e atunuu o le lalolagi ia musumusuga ma se taitaiga mai le lagi. E le o faatatau i tulaga faaupufai po o aiaiga faavae. E faatatau i le filemu ma le faamalologa e mafai ona oo mai i agaga taitoatasi faapea foi i le agaga o atunuu—o o latou aai, taulaga, ma nuu—e ala mai le Alii o le Filemu ma le punavai o faamalologa uma, le Alii ia o Iesu Keriso.
I ni nai masina ua mavae atu, sa ou maua ai se uunaiga na oo mai ia te au e faapea, o le auala aupito sili e fesoasoani ai i le tulaga ua i ai nei le lalolagi o le faalagolago atili lea o tagata uma i le Atua ma ia liliu atu o latou loto ia te Ia e ala i le tatalo ma le loto atoa. O le faamaualaloina o i tatou lava ma sailia musumusuga mai le lagi e onosaia ai pe faatoilaloina ai mea ua i o tatou luma, o le a avea lea ma o tatou ala aupito saogalemu ma mautu e agai atu ai ma le mautinoa i luma e ui atu i nei taimi faigata.
O loo faamamafa mai i tusitusiga paia ia tatalo na ofo atu e Iesu faapea foi Ana aoaoga e uiga i le tatalo i le taimi o Lana galuega i le olaga nei. Tou te manatua le Tatalo a le Alii:
“Lo matou Tama e, o i le lagi, Ia paia lou suafa.
“Ia oo mai lou malo. Ia faia lou finagalo i le lalolagi e pei ona faia i le lagi.”
“Ia e foai mai ia te i matou i le aso nei a matou mea e ai e tatau mo le aso.
“Ia e faamagalo ia te i matou i a matou agasala, e pei o i matou foi ona matou faamagaloina atu i e ua agaleaga mai ia te i matou.
Aua foi e te taitaiina i matou i le tofotofoga, a ia e laveai ia i matou ai le leaga. Aua e ou le malo, ma le mana, ma le viiga, e faavavau lava. Amene.”6
O lenei tatalo taula’i matagofie, sa tele ina fai faafia i aluga o le au Kerisiano, ua faamanino ai le alagatatau ona tuusa’o atu le olega i “Lo Tatou Tama o i le lagi” mo tali i mea tatou te popole ai. O le mea lea, ia tatou tatalo mo le taitaiga mai le lagi.
Ou te valaaulia outou ia tatalo e le aunoa.7 Tatalo mo lou aiga. Tatalo mo taitai o malo. Tatalo mo tagata totoa o e o saoaluma i taua o fai nei e faasagatau i mala faaagafesootai, faalesiosiomaga, faaupufai, ma faapaiolosi o loo aafia ai tagata uma i le lalolagi atoa, o e mauoa ma e matitiva o le autalavou ma le au matutua.
Na aoao mai e le Faaola ia i tatou e aua nei fuapauina i latou tatou te talosia. Na Ia fetalai, “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuaifua mai ma faasaua mai ia te outou.”8
I luga o le satauro, i le mea na maliu ai Iesu mo a tatou agasala, na Ia faatino ai le mea sa Ia aoao mai ina ua Ia tatalo, “Lo’u Tama e, ia e faamagalo atu ia te i latou, aua ua latou le iloa le mea ua latou faia.”9
O le tatalo ma le loto atoa mo i latou atonu ua manatu o ni o tatou fili e faapupula atu ai lo tatou talitonuga faapea e mafai e le Atua ona suia o tatou loto ma loto o isi. O na tatalo e ao ona faamalolosia ai a tatou faaiuga e fai po o a lava suiga e tatau ai i o tatou olaga, aiga, ma nuu.
E le afaina po o fea e te nofo ai, po o le a le gagana e te tautala ai, po o luitau o oulua fetaiai, e faafofoga ma tali mai le Atua ia te oe i Lana lava ala ma i Lana lava taimi. Ona o i tatou o Ana fanau, o lea e mafai ai ona tatou faalatalata atu ia te Ia e saili ai se fesoasoani, filemu, ma se naunauga toefaafou e faia se eseesega lelei i le lalolagi.
O le tatalo mo le faamasinotonu, filemu, mo e matitiva, ma e mama’i e tele ina le lava. A uma ona tatou tootutuli e tatalo, e manaomia ona tatou tutu a’e i luga ma faia mea tatou te mafaia e fesoasoani ai—e fesoasoani ai ia i tatou lava faapea ma isi.10
Ua tumu tusitusiga paia i faataitaiga o tagata o faatuatuaga ua soofaatasi i le tatalo ma faatinoga ia faia ai se eseesega i o latou lava olaga ma olaga o isi. I le Tusi a Mamona, mo se faataitaiga, ua tatou faitau ai e uiga ia Enosa. Ua matauina ai faapea “e tusa o le lua-vaetolu o lana tusi puupuu o loo faamatala mai ai se tatalo, po o se soloaiga o tatalo, ma le vaega o totoe o loo ta’u mai le mea sa ia faia ona o taunuuga o tali na ia mauaina.”11
E tele a tatou faataitaiga o le ala e faia ai e le tatalo se eseesega i lo tatou talafaasolopito o le Ekalesia, e amata mai i le uluai tatalo faaleo a Iosefa Samita i se togavao e lata ane i le fale laau o ona matua i le tautotogo o le 1820. O le sailia o le faamagaloga ma le taitaiga faaleagaga, na tatala ai e le tatalo a Iosefa le lagi. O le taimi nei, ua tatou ‘ae’ae i faamanuiaga a Iosefa le Perofeta ma isi alii ma tamaitai faamaoni o le Au Paia o Aso e Gata Ai, o e sa tatalo ma galulue e fesoasoani e faatuina Le Ekalesia a Iesu Keriso o le Au Paia o Aso e Gata Ai.
E tele ina ou mafaufau i tatalo a tamaitai faamaoni e pei o Mary Filitia Samita o lē, faatasi ai ma le fesoasoani a le Atua, sa ta’ita’ia lona aiga mai le tetele o sauaga i Ilinoi i le saogalemu o lenei vanu, i le mea sa faamanuiaina ai lona aiga faaleagaga ma faaletino. Ina ua uma ona ia tatalo faatauanau i ona tulivae, sa ia galue malosi e faatoilalo ona luitau ma faamanuia ai lona aiga.
O le tatalo o le a siitia ai i tatou ma fusia faatasi ai i tatou taitoatasi, ma o ni aiga, ma o se Ekalesia, ma se lalolagi. O le tatalo o le a tosina ai saienisi ma fesoasoani ia i latou i le mauaina o tui ma vailaau o le a faamuta ai lenei faama’i oti. O le tatalo o le a faamafanafanaina ai i latou ua maliu se tasi e pele ia i tatou. O le a taialaina ai i tatou ia iloa le mea e fai mo lo tatou lava puipuiga patino.
Uso e, ma tuafafine, ou te uunaia outou ia toefaaluaina la outou tautinoga i le tatalo. Ou te uunaia outou e tatalo i o outou afeafe, i a outou savaliga i aso taitasi, i o outou fale, i a outou uarota, ma, tatalo e le aunoa i o outou loto.12
I le avea ai ma sui o taitai o Le Ekalesia a Iesu Keriso o le Au Paia o Aso e Gata Ai, ou te faafetai atu mo a outou tatalo mo i matou. Ou te uunaia outou ia faaauau pea ona tatalo ina ia mafai ona matou maua musumusuga ma faaaliga e taiala ai le Ekalesia i nei vaitau faigata.
E mafai e le tatalo ona suia o tatou lava olaga. I le faaosofia ai e le tatalo ma le loto i ai, e mafai ai ona faaleleia i tatou ma fesoasoani ai i isi e faia le mea lava lea.
Ua ou iloaina le mamana o le tatalo i o’u lava aafiaga. Talu ai nei, sa ou i ai na o au i lo’u ofisa. E lei leva ona uma se togafitiga faafoma’i o lo’u lima. Sa uno’oa ma totolia, fula, ma sa tiga tele. A o ou saofai ai i la’u kesi, sa le mafai ona ou taulai atu i mataupu taua ma le ogaoga aua sa faasalaveia e le tiga lea.
Sa ou tootuli i le tatalo ma ole atu i le Alii e fesoasoani mai ia ou taula’i ina ia mafai ona faataunuu la’u galuega. Sa ou tu a’e i luga ma toe foi i le faaputuga o pepa sa i luga o la’u kesi. Toetoe o le taimi lava lea, sa oo mai le manino ma le taula’i i lo’u mafaufau, ma sa mafai ona ou faamae’aina mataupu fita sa i o’u luma.
O le tulaga gaogaosa o i ai nei le lalolagi e ono foliga taufaafefe pe a tatou mafaufau i le anoanoai o faafitauli ma luitau. Ae o la’u molimau faamaoni e faapea, afai o le a tatou tatalo ma ole atu i le Tama Faalelagi mo faamanuiaga ma le taitaiga moomia, o le a oo ina tatou iloa e mafai ona faamanuiaina o tatou aiga, tuaoi, nuu, e oo lava i atunuu o loo tatou nonofo ai.
Sa tatalo le Faaola ona Ia “femaliuai ai lea ma agalelei”13 e ala i le fafagaina o e matitiva, tuuina atu le lototele ma le lagolago ia i latou e manaomia, ma aapa atu i le alofa, faamagaloga, filemu, ma le malologa ia i latou o e sa o mai ia te Ia. O loo faaauau pea ona Ia aapa mai ia i tatou.
Ou te valaaulia tagata uma o le Ekalesia, faapea foi o tatou tuaoi ma uo o isi faatuatuaga i le salafa o le lalolagi, ia faia e faapei ona apoapoai mai le Faaola i Ona soo: “Ia outou mataala ma tatalo e le aunoa”14 mo le filemu, mo le faamafanafanaga, mo le saogalemu, ma mo avanoa e auauna atu ai le tasi i le isi.
Se mana ina a tele o le mana o le tatalo ma lo tatou manaomia tele o a tatou tatalo ma le faatuatua i le Atua ma Lona Alo Pele i le lalolagi i ona po nei! Ia tatou manatua ma talisapaia le mana o le tatalo. I le suafa o Iesu Keriso, amene.