Mata e Vaai
E ala i le mana o le Agaga Paia, o le a mafai ai e Keriso ona tatou vaai ia i tatou lava ma vaai i isi e pei ona Ia faia.
Vaaia o le Aao o le Atua
Ou te fiafia i le tala o le Feagaiga Tuai i se taulealea na auauna atu i le perofeta o Elisaia. I se tasi o taeao po sa alafa’i mai ai le taulealea, sa alu atu i fafo, ma iloa ai ua siomia le aai i se autau tele ua faamoemoe e faatamaia i latou. Na ia tamo’e atu ia Elisaia: “Aue! le alii e, pe faapefea se mea tatou te fai a’i?
Na tali Elisaia, “Aua e te fefe: aua e toatele ua ia te i tatou i e ua ia te i latou.
Sa silafia e Elisaia, na manaomia e le taulealea ni mea e sili atu nai lo se faamautinoaga toafimalie; sa ia manaomia le mafai ona vaai. Ma “ona tatalo ai lea o Elisaia, … Ieova e, … faapupula i ona mata, ina ia na iloa. Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi ua latou vagavagai ia Elisaia.” 1
Atonu e i ai taimi e te, pei ai o le auauna, e te mauaina oe lava o loo tauivi ina ia vaai pe o faapefea ona galue le Atua i lou olaga—o taimi pe a e lagonaina le lofituina—pe a faavaivaia oe e tofotofoga o le olaga faaletino. Faatalitali ma faalagolago i le Atua ma i Lona taimi, aua e mafai ona e faatuatuaina ma lou loto atoa Lona finagalo. Ae o loo i ai se lesona lona lua ii. O’u uso e ma tuagane pele, e te mafai foi, ona tatalo mo le Alii ina ia tatala ou mata ina ia vaai i mea e le masani ona e vaai i ai.
Vaaia o i Tatou Lava e pei ona Silasila Mai le Atua ia i Tatou
Atonu o mea aupito i taua mo i tatou, o le vaai manino lea po o ai le Atua ma pe o ai moni foi i tatou—o atalii ma afafine a ni matua faalelagi ua i ai se “amio atua ma le taunuuga e faavavau.” 2 Ole atu i le Atua e faaali atu nei upumoni ia te oe, faatasi ai ma Ona lagona e uiga ia te oe. O le tele o lou malamalama i lou faasinomaga ma le faamoemoega moni, i le ta’ele o le agaga, o le tele foi lea o le a tosina ai mea uma i lou olaga.
O le Vaai Atu i Isi
O le malamalama i le auala o loo silasila mai ai le Atua ia i tatou e saunia ai le ala e fesoasoani ia i tatou ia vaai atu i isi e pei ona Ia faia. Fai mai le Tusitala o Tavita Brooks: “O le tele o faafitauli maoae o lo tatou sosaiete e soloa’i mai tagata e manatu e le o amanaiaina ma faatauaina i latou. … E i ai se uiga tuloto … e tatau ona tatou lelei uma ai, ma o lena uiga o le vaai loloto lea i le tasi ma le isi ma ia loloto le iloaina.” 3
E loloto le silasila a Iesu Keriso i tagata. Na te silasila i tagata taitoatasi, i o latou manaoga, ma tagata e mafai ona latou avea ai. Ae o isi, sa vaai i alii fagota, tagata agasala, po o telona, sa silasila Iesu i so’o; ae o isi sa vaai i se tagata na ulufia e temoni, sa lē amanaia e Iesu le faafitauli i fafo, ae sa ia aloaia o ia, ma sa faamalolo ia te ia. 4
E faapena o tatou olaga pisi, e mafai ona tatou mulimuli i le faataitaiga a Iesu ma vaai i tagata taitoatasi—i o latou manaoga, lo latou faatuatua, o a latou tauiviga, ma tagata e mafai ona avea ai i latou. 5
A o ou tatalo mo le Alii e tatala o’u mata ina ia vaai i mea atonu e le masani ona ou vaaia, e masani ona ou fesili ia te a’u lava i ni fesili se lua ma gauai atu i uunaiga e oo mai: “O a mea o o’u faia e tatau ona ou taofi le faia?” ma “O a mea ou te le’o faia e tatau ona amata ona faia?” 6
I le tele o masina ua mavae, i le taimi o le faamanatuga, sa ou fesili ifo ai i nei lava fesili ma sa ou maofa i le uunaiga na oo mai. “Tuu le tilotilo i lau telefoni pe a e tu faatalitali i ni laina.” O le tilotilo i la’u telefoni pe a tu i laina sa toetoe lava a otometi; sa ou mauaina o se taimi lelei e fai ai galuega e tele, e faitau ai ma tali imeli, tilotilo ai i puletini o talafou, pe autilotilo ai i faamatalaga o ala o faasalalauga faaagafesootai.
O le taeao na sosoo ai, sa ou maua ai a’u lava o faatalitali i se laina umī i le faleoloa. Sa ou toso mai la’u telefoni ona ou manatuaina lea o le uunaiga sa ou mauaina. Sa ou tu’u ese la’u telefoni ma tilotilo solo. Sa ou vaaia se toeaina i le laina i o’u luma atu. Sa gaogao lana taavale faatau sei vagana ai ni nai apa o meaai a pusi. Sa ou lagona sina lē mautonu, ae sa ou fai atu se tala atamai moni e pei o le “Ou te iloa e i ai sau pusi.” Sa fai mai o ia o le a sau se afā, ma sa le manao ai e leai se meaai a le pusi. Sa ma talatalanoa puupuu, ona ia faliu mai lea ia te a’u ma fai mai, “E te iloa, ou te le’i ta’ua lava i se tasi le mea lenei, ae o le asō o lo’u aso fanau.” Sa ootia lo’u loto. Sa ou faamanuia i ai lona aso aso fanau ma ofoina a’e se tatalo le leoa o le faafetai ou te le’i faaaogaina la’u telefoni ma misia ai se avanoa e vaai moni ai ma fesootai ma se isi tagata na manaomiaina.
Ma lo’u loto atoa, ou te le manao ia pei o le ositaulaga po o le sa Levī i luga o le ala i Ieriko—o se tasi e tilotilo atu ma pasi ane. 7 Ae o le tele o taimi, ou te manatu ai ua ou pasi ane.
Vaaia o le Feau a le Atua mo A’u
Na ou aoaoina talu ai nei se lesona taua e uiga i le vaai loloto mai se tamaitai talavou e igoa ia Rozlyn.
Na faasoa mai le tala ia te a’u e se uo, o lē na matuā faanoanoa ina ua alu ese lona toalua o le 20 tausaga. Faatasi ma lana fanau na vaeluaina taimi mo matua, o le manatu o le auai na’o ia i le lotu sa foliga taufaafefe. Sa ia faamatala:
“I se lotu lea e matuā taua ai le aiga, o le nofo toatasi e mafai ona lofituina. O lena aso Sa muamua, sa ou savali i totonu ma tatalo ia leai se tasi o le a talanoa mai ia te a’u. Sa tau le mafai ona ou toafilemu, ma sa lata ina ou tagi. Sa ou nofo i lo’u nofoaga masani, ma le faamoemoe e leai se tasi na te iloa mai le gaogao ‘i’i o le nofoa.
“Sa faliu mai se tamaitai talavou o le matou uarota ma tilotilo mai ia te a’u. Sa ou fa’atagā ata atu. Sa ia toe ataata mai. Sa mafai ona ou vaaia le popole i ona foliga. Sa ou tatalo le leoa ia aua nei sau e talanoa mai ia te a’u—na leai se mea lelei ou te fai atu ma sa ou iloaina o le a ou tagi. Sa ou toe tilotilo i lalo i o’u vae ma ‘aloese mai le vaai atu i ona mata.
“I le itula na sosoo ai, sa ou matauina lona toe tilotilo so’o mai ia te a’u. O le taimi lava na maea ai le sauniga, sa ia sau sa’o lava ia te a’u. ‘Talofa Rozlyn,’ sa ou musumusu atu ai. Sa ia fusi atu a’u i ona lima ma fai mai, ‘Sister Smith, ou te iloa o se aso lē lelei lenei mo oe. Ou te matuā faamalie atu. Ou te alofa ia te oe.’ E pei ona ou mua’i manatu ai, na maligi o’u loimata a o ia toe fusiina a’u. Ae a o ou savali ‘ese, sa ou mafaufau ifo ia te a’u lava, ‘Atonu e mafai lava ona ou faia lenei mea.’
“O lena tamaitai talavou e 16-tausaga, e laitiiti ifo ma le ‘afa o o’u tausaga, na mauaina a’u i aso Sa uma na totoe o lena tausaga e tuuina mai se opo ma fesili mai, ‘O a mai oe?’ Sa faia se eseesega i o’u lagona e uiga i le sau i le lotu. O le mea moni lava sa amata ona ou faalagolago atu i na opo. Sa matauina a’u e se tasi. Sa silafia e se tasi sa ou i ai iina. Sa popole se tasi [mo a’u].”
E pei lava o meaalofa uma lava, o loo ofoina mai ma le naunautai e le Tama, o le vaai loloto e manaomia ai lo tatou fesili atu ia te Ia—ona faatino lea. Ole atu ia vaai i isi e pei ona Ia faia—o Ona atalii ma afafine moni ma le gafatia paia ma lē i’u. Ona faatino lea e ala i le alofa, auauna atu, ma faamautinoa lo latou taua ma gafatia e pei ona uunaia ai. A o avea ai lenei ma mamanu o o tatou olaga, o le a tatou iloa ai o i tatou o “soo moni o … Iesu Keriso.” 8 O le a mafai e isi ona faatuatuaina o tatou loto i o latou foi loto. Ma i lenei mamanu, o le a tatou iloaina foi lo tatou lava faasinomaga ma le faamoemoega moni.
Sa manatua e la’u uo se isi mea na tupu a o nofo ai i lena nofoa gaogao na o ia, ma mafaufau pe o taumafaiga mo le 20 tausaga ina ia ola i le talalelei i lona aiga sa leai ma se aoga. Sa ia manaomiaina ni mea e sili atu nai lo se faamautinoaga o le toafilemu; sa ia manaomia se vaaiga mamao. Sa ia lagonaina se fesili na tuia ai lona loto: “Aisea na e faia ai na mea? Pe na e faia na mea mo se taui, mo viiga o isi, po o taunuuga na manaomiaina?” Sa ia faatali mo sina taimi, su’esu’eina lona loto, ona tali atu lea ma le mautinoa, “Na ou faia na mea ona ou te alofa i le Faaola. Ma ou te alofa i Lana talalelei.” Na tatalaina e le Alii ona mata ina ia fesoasoani ia mafai ai ona ia vaai. O lenei suiga faigofie ae mamana na fesoasoani ia te ia e faaauau ona fetaomi atu i luma ma le faatuatua ia Keriso, e ui i ona tulaga.
Ou te molimau atu e alofa Iesu Keriso ia i tatou ma e mafai ona Ia aumaia mata e vaai ai—e tusa lava pe faigata, e tusa lava pe tatou te le lavava, e tusa lava pe tuuatoatasi i tatou, ma e tusa lava po o taunuuga e le o ni mea sa tatou faamoemoeina. E ala i Lona alofa tunoa, o le a Ia faamanuia i tatou ma faateleina lo tatou gafatia. E ala i le mana o le Agaga Paia, o le a mafai ai e Keriso ona tatou vaai ia i tatou lava ma vaai i isi e pei ona Ia faia. Faatasi ai ma Lana fesoasoani, e mafai ona tatou iloatino mea e sili ona manaomia. E mafai ona tatou amata vaaia le aao o le Alii o loo galue i, ma e ala i auiliiliga patino masani o o tatou olaga—o le a tatou vaai loloto i ai.
Ma i lena aso sili “a oo ai ina afio mai o ia o le a tatou faapei o ia, ona o le a tatou vaai ia te ia e pei ona i ai o ia; tau ina ia tatou maua lenei faamoemoe” 9 o la’u tatalo lea i le suafa o Iesu Keriso, amene.