A Ia Atoatoa le Galuega a le Onosai, ma Manatu o le Mea e Fiafia Tele Ai!
Pe a tatou faatino le onosa’i, e faateleina lo tatou faatuatua. A o faateleina lo tatou faatuatua, e faapena foi lo tatou olioli.
I le lua tausaga talu ai, na ui atu ai lo’u uso aupito laitiiti o Chad, i le veli. O lana malaga atu i le isi itu na tuua ai se āva i le fatu o lo’u tuafafine faaletulafono o Stephanie; le la fanau laiti e toalua o Brayden ma Bella, faapea ai ma le aiga atoa. Sa matou maua le mafanafana i le saunoaga a Elder Neil L. Anderson i le konafesi aoao i le vaiaso a o le’i maliu Chad: “I faigata o tofotofoga faalelalolagi, ia agai i luma ma le onosai, ma o le a aumaia ia te oe e le mana faamalolo a le Faaola le malamalama, malamalamaaga, filemu, ma le faamoemoe” (“Manu’a,” Liahona, Nov. 2018, 85).
Matou te faatuatua ia Iesu Keriso; ua matou iloa o le a matou toe faatasi ma Chad, peitai o lona le i ai i la le tino, e tiga! E toatele tagata ua maliliu ē pele [ia i latou]. E faigata ona onosai ma faatalitali mo le taimi o le a tatou toe faatasi ai ma i latou.
O le tausaga talu ona maliu o ia, sa matou lagonaina na pei na ufitia i matou i se ao pogisa. Sa matou sailia le sulufaiga i le suesueina o a matou tusitusiga paia, tatalo faatauanau, ma faateleina le auai atu i le malumalu. Na maua lelei e fuaiupu o le viiga lenei o matou lagona i lea vaitaimi: “Ua gafoa le malamalama, ua alafa’i le lalolagi, ua gasolosolo ese ao o le po pogisa” (“The Day Dawn Is Breaking,” Hymns, no. 52).
Sa tonu i le matou aiga, o le 2020 o le a avea o se tausaga faafouina! Sa matou suesue i le tatou lesona o le Sau, Mulimuli Mai ia te A’u i le Feagaiga Fou i le tusi o Iakopo i le faai’uga o Novema 2019 lea na faaali mai ai e se autu o ia lava ia i matou. Fai mai le Iakopo mataupu 1 fuaiupu e 2, “O’u uso e, ia manatu o le mea e olioli tele ai pe a outou pa’u’u atu i puapuaga e tele” (Faaliliuga a Iosefa Samita, James 1:2 [i le Iakopo 1:2, vaefaamatalaga a]). I lo matou naunau e amata se tausaga fou, se vaitaimi fou, i le olioli, na tonu ai ia i matou o le 2020 o le a matou “manatu [i ai] o le mea e olioli tele ai.” Sa matuai malosi o matou lagona e uiga i ai, sa faapea ona matou faameaalofaina atu i o matou tei i le Kerisimasi ua tuanai ni mitiafu na fai mai i ni mataitusi matamatatetele “Manatu o le Mea e Olioli Tele Ai.” O le tausaga 2020 o le a mautinoa lava e avea o se tausaga o le olioli ma le faafiafiaina.
Ia, ua tatou vaai la—nai lo o lena, ua aumaia e le 2020 le faama’i pipisi i le lalolagi atoa o le KOVITI-19, o vevesi faalemalo, ma luitau faaletamaoaiga. Atonu o loo tuu mai e lo tatou Tama Faalelagi ia i tatou se taimi e manatunatu ai ma iloilo lo tatou malamalama’aga e uiga i le onosai ma la tatou faai’uga manino lelei e filifili le olioli.
Talu mai lena taimi, ua i ai se uiga fou o le tusi a Iakopo ia i matou. O le Iakopo, mataupu 1, fuaiupu e 3 ma le 4 e faapea:
“Ina ua outou iloa, o le tofotofoina o lo outou faatuatua e tupu ai le onosai.
“A ia atoatoa le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.”
I a tatou taumafaiga ia maua le olioli i le lotolotoi ai o o tatou tototofoga, na galo ai ia i tatou o le mauaina o le onosai o le ki lea i le faatagaina o na tofotofoga e galulue mo lo tatou lelei.
Sa aoao mai le Tupu o Peniamina ia tuu ese le tagata natura ma avea ma “tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai [i mea] uma” (Mosaea 3:19).
O le mataupu e 6 o le Tala’i La’u Talalelei o loo aoao mai ai uiga auaumama taua o Keriso e mafai ona tatou faataitai i ai: “O le onosai o le mana lea e onosaia ai le faatuai, o faaletonu, mea faafeagai, po o le mafatia e aunoa ma le ita, lē mautonu, po o le popole. O le mafaia lea ona fai le finagalo o le Atua ma talia Lona taimi. Afai e te onosai, e te tatālia faigata ma e te mafaia ona e fetaia’i ma tiga i se tulaga filemu ma le faamoemoe” (Tala’i La’u Talalelei: O Se Taiala i le Galuega Faafaifeautalai, rev. ed. [2019], 126).
O le galuega atoatoa a le onosai e mafai foi ona faaalia i le soifuaga o se tasi uluai soo o Keriso, o Simona le Kanana. O Selote sa o se vaega o tagatanuu Iutaia o e na tetee malosi i tulafono a Roma. O le vaega o Selote sa lagolagoina sauaga e faasaga i tagata Roma, o latou tagata Iutaia e galulue faatasi, ma le au Satukaio e ala i osofa’iga ia maua mai ai sapalai ma le faia o isi gaoioiga e lagolago ai a latou faamoemoega (tagai i le Encyclopedia Britannica, “Zealot,” britannica.com). O Simona le Kanana sa o se Selote (tagai i le Luka 6:15). Vaai faalemafaufau i le taumafai o Simona e tauanau malie le Faaola ia faa’au’upegaina, taitaia se au tetee pe faatupu ni vevesi i Ierusalema. Na aoao mai e Iesu:
“Amuia e agamalu: aua e fai mo latou tofi le nuu. …
“Amuia e alolofa atu: aua e alofaina mai i latou. …
“Amuia e faatupuina le filemu: aua e ta’ua i latou o atalii o le Atua” (Mataio 5:5, 7, 9).
Atonu na taliaina ma lagolagoina e Simona lana filosofia i le naunautai ma le faananauga, ae o loo fautua mai tusitusiga paia e faapea, e ala atu i le faatosinaga ma le faataitaiga a le Faaola, na suia ai lana taulaiga. O lona avea ma soo o Keriso na avea ma taulaiga tutotonu o taumafaiga o lona olaga.
A o tatou osia ma tausia feagaiga ma le Atua, e mafai ona fesoasoani mai le Faaola ia tatou “toe fanauina; ioe, fananauina i le Atua, ma suia mai [se] tulaga faaletino ma paʼū, i se tulaga o le amiotonu, ua togiolaina e le Atua, ma avea ma ona atalii ma afafine” (Mosaea 27:25).
I a tatou taumafaiga naunautai uma faaleagafesootai, faalelotu, ma faaupufai o o tatou aso, ia fai le [avea ma] soo o Iesu Keriso ma a tatou fegalegaleaiga aupito iloga ma faamaoniaina. “Aua o le mea ua i ai lo outou oa, e i ai atoa foi ma o outou loto” (Mataio 6:21). Aua foi ne’i galo ia i tatou, tusa lava pe na uma ona “faia [e soo faamaoni] le finagalo o le Atua,” “[sa] aoga ia i [latou] le onosai” (Eperu 10:36).
E pei lava o le tofotofoina o lo tatou faatuatua e galueaiina ai le onosai i totonu o i tatou, pe a tatou faaaogaina le onosai, e faateleina ai lo tatou faatuatua. A o faateleina lo tatou faatuatua, e faapena foi lo tatou olioli.
O Mati na te’a nei, na alu ai le ma afafine lona lua o Ema, i le faanofoesea faamalosia, e pei o le toatele o faifeautalai i le Ekalesia. E toatele faifeautalai na o mai i aiga. E toatele faifeautalai sa faatalitali mo le toe tofiaina [i misiona fou]. E toatele sa le’i maua o latou faamanuiaga o le malumalu a o le’i o ese atu i le galuega. Faafetai lava, alii ma tamaitai faifeautalai. Matou te alolofa ia te outou.
Sa lofituina Ema ma lana soa i Netherlands i na uluai vaiaso—o le tele o taimi na lofituina i loimata maligi i le tele o aafiaga. I le na’o ni nai avanoa pupuu mo fegalegaleaiga ma se isi tagata ma ni taimi faatapulaa e o ai i fafo, sa faateleina ai le faalagolago o Ema i le Atua. Sa matou tatalo faatasi ma i luga o le initoneti ma fesili i ai pe faapefea ona matou fesoasoani atu. Sa ia talosagaina i matou ia fesootai atu i uo sa ia aoaoina i luga o le initoneti!
Sa amata ona fesootai atu lo matou aiga i le initoneti, taitoatasi, i uo a Ema i Netherlands. Sa matou valaaulia i latou ia auai i a matou suesuega faalevaiaso o le Sau, Mulimuli Mai ia te A’u i luga o le initonei, o se aiga lautele. Ua avea ia Floor, Laura, Renske, Freek, Benjamin, Stal ma Muhammad ma a matou uo. Ua ulu mai nisi o a matou uo mai le Netherlands “i le faitotoa vaapiapi” (3 Nifae 14:13). O isi ua faaali atu i ai “le lauitiiti o le ala, ma le vaapiapi o le faitotoa, e tatau ona latou ulu atu ai” (2 Nifae 31:9). O i latou o o tatou uso ma tuafafine ia Keriso. O vaiaso taitasi tatou te “manatu o le mea e olioli tele ai” a o tatou galulue faatasi i lo tatou alualu i luma i luga o le ala o feagaiga.
Tatou te tuu “ia atoatoa le galuega a le onosai” (Iakopo 1:4) i lo tatou le mafai ona feiloai faafesaga’i o ni aiga o le uarota mo se vaitau. Ae tatou te manatu i ai o le olioli a o faateleina le faatuatua o o tatou aiga e ala i fesootaiga fou faatekinolosi ma le suesueina o le Sau, Mulimuli Mai ia te A’u o le Tusi a Mamona.
Na folafola mai Peresitene Russell M. Nelson, “O a outou taumafaiga faifai pea i lenei galuega—e oo lava i na taimi e te lagonaina ai e te le o manuia patino—o le a suia ai lou olaga, le olaga o lou aiga, ma le lalolagi” (“Agai i Luma i le Faatuatua,” Liahona, Me 2020, 114).
O le nofoaga tatou te osia ai feagaiga paia ma le Atua—le malumalu—ua tapunia le tumau. O le nofoaga tatou te tausia ai feagaiga ma le Atua—le aiga—o loo matala! Ua i ai so tatou avanoa i le fale e suesue ma mafaufau loloto ai i le matagofie tulaga ese o feagaiga o le malumalu. E ui lava i le lē mafai ona tatou ulufale atu i totonu o na nofoaga paia faaletino, ae “o le a matua olioli tele lava [o tatou] loto … ona o faamanuiaga o le a sasaa atu” (Mataupu Faavae ma Feagaiga 110:9).
E toatele ua leai ni galuega; o isi ua le maua ni avanoa. Ae peitai, tatou te olioli faatasi ma Peresitene Nelson, o lē na saunoa lata mai nei: “O taulaga anapogi [e fai ma le] lotomalie mai o tatou tagata o le au paia ua faateleina moni lava, e faapena foi i saofaga lotomalie i a tatou tupe mo fesoasoaniga alofa. … Faatasi, o le a tatou manumalo ai i lenei taimi faigata. O le a faamanuia outou e le Alii a o faaauau ona tou faamanuiaina isi” (Itulau Facebook a Russell M. Nelson, faamatalaga mai 16 Fep, 2020, facebook.com/russell.m.nelson).
“Ia outou lototetele” o le poloaiga lea mai le Alii, aua le matatau (Mataio 14:27).
O nisi o taimi tatou te le onosai ai pe a tatou mafaufau o loo “sa’o ona tatou faia o mea uma” ae tatou te le o maua lava faamanuiaga tatou te mananao i ai. Sa savavali faatasi Enoka ma le Atua mo le 365 tausaga ona faatoa aveolaina ai lea o ia ma lona nuu. E toluselau onosefulu lima tausaga o taumafai e fai mea uma ia sa’o ona tupu ai lea! (Tagai i le Mataupu Faavae ma Feagaiga 107:49.)
Na maliu tonu lava lo’u uso o Chad i ni nai masina talu ona mae’a le faamaloloina o i ma’ua mai le pulefaamalumalu ai i le Misiona a Ogden Iuta. O se mea ofoofogia ona a o matou nonofo ai i Kalefonia i Saute, mai misiona uma e 417 na ono mafai ona tofia i ai i ma’ua i le tausaga 2015, sa tofia i ma’ua i Iuta i matu. O le fale o le misiona sa na o le 30 minute e alu ai i le taavale i le fale o Chad. Na faamaonia le maua o Chad i le kanesa ina ua uma ona maua le ma valaauga o le misiona. E ui lava i tulaga aupito sili ona faigata, sa ma iloa sa silafia i ma’ua e lo tatou Tama Faalelagi ma fesoasoani mai ia ma maua le olioli.
Ou te molimau atu i le mana faaola, faamamaina, faamaulalo, ma le olioli o le Faaola o Iesu Keriso. Ou te molimau atu, a tatou tatalo i lo tatou Tama Faalelagi i le suafa o Iesu Keriso, o le a tali mai o Ia ia i tatou. Ou te molimau atu a tatou lagona, faalogo, ma usitai i le siufofoga o le Alii ma Lana perofeta soifua o Peresitene Russell M. Nelson, e mafai ona tatou [tuu] “ia atoatoa le galuega a le onosai,” ma “manatu o le mea e olioli tele ai” (Iakopo 1:2, 4). I le suafa, o Iesu Keriso, amene.