Fautuaina Atu i le Alii
Amata nei loa le faagasologa ia avea ma se e “fautuaina atu i le Alii” ina ia faateleina le mafutaga o Lona Agaga ma oe.
Talofa uso e ma tuafafine. I le avea ai ma soo o Iesu Keriso, sa ou sagisagi atu i le tauaofiaga mai tulimanu uma o le lalolagi, e ala i auala faaonaponei, i lenei konafesi.
O se tausaga sili ona tulaga ese lenei. Ia te au, sa amata i se tofiga mai le Au Peresitene Sili e faapaia se malumalu paia i le Alii i Durban, i Aferika i Saute. O le a le galo lava ia te au le mamalu o le maota. Ae e sili atu nai lo le nofoaga, o le a ou faatauaina pea le malualii o tagata o e sa matua saunia lelei e ulu atu i lena maota paia. Sa latou o mai ua saunia e auai faatasi i se tasi o faamanuiaga tumutumu o le Toefuataiga; le faapaiaga o se maota o le Alii. Sa latou o mai ma loto ua tutumu i le alolofa ia te Ia ma Lana Togiola. Sa latou o mai ma le faafetai i lo tatou Tama o i le Lagi mo le saunia o sauniga paia o le a taitai atu ai i le faaeaga. Sa latou o mai ua agavaa.
O malumalu, e le afaina po o fea lava e i ai, e tula’i a’e i luga o ala o le lalolagi. O malumalu uma o le Au Paia o Aso e Gata Ai i le lalolagi—le 168 uma—e tutu o ni molimau i lo tatou faatuatua i le ola e faavavau ma le olioli i le faaaogaina faatasi ma o tatou aiga ma lo tatou Tama Faalelagi. O le alu i le malumalu e faateleina ai lo tatou malamalama i le Aiga Atua ma le talalelei e faavavau, o la tatou tautinoga e ola ma aoao atu upumoni, ma lo tatou naunautai e mulimuli i le faataitaiga a lo tatou Alii ma le Faaola o Iesu Keriso.
I fafo o malumalu uma i le Ekalesia o loo i ai upu e fetaui lelei, “E Paia i le Alii.” O le malumalu o le maota o le Alii ma o se maluapapa mai le lalolagi. E vagaia e Lona Agaga i latou o e tapuai atu i totonu o na puipui paia. Na te faatuina tulaga faatonuina ia tatou te ulufale atu ai o ni Ana malo.
O lo’u tama faale-tulafono, o Blaine Twitchell, o se tasi o alii aupito sili ua ou iloa, na aoao mai ia te au se lesona sili. Sa ma o ma Sister Rasband e asi o ia ina ua pulapula lagoto lona soifua. Ma te ulufale atu i lona potu, ae tuumuli ese loa lona epikopo. A’o ma faatalofa atu i le epikopo, sa ou manatu, “Matuai lelei tele le epikopo. O loo i ai e fai lana auaunaga i se tagata faatuatua o lana uarota.”
Sa ou fai atu ia Blaire, “Matuai manaia tele le epikopo ma le sau e asiasi mai.”
Sa tilotilo mai Blaine ia te au ma tali mai, “E sili atu nai lo lena. Sa talosagaina le epikopo e sau ona sa ou manao i se faatalanoaga mo la’u pepa faataga o le malumalu. Ou te fia oti a’o fautuaina atu a’u i le Alii.” Ma sa faapena ona fai!
Na ou mafaufau pea lava i lena fasifuaitau, “fautuaina atu i le Alii.” Ua aumaia ai se vaaiga fou i le faatalanoaina e le aunoa e o tatou taitai faale-Ekalesia. O le taua tele o se pepa faataga o le malumalu o lea i ona popofou o le Ekalesia, seia oo i le 1891, o pepa faataga taitasi o le malumalu sa faamaonia 1 e le Peresitene o le Ekalesia.
Pe mo talavou po o tagata matutua, o lou faatalanoaga o le pepa faataga o le malumalu e le faatatau i mea e fai ma mea e le faia. O se pepa faataga e le o se lisi e siaki ai, se faatagaga e te solia ai se tulafono, po o se pepa mo se nofoaga faapitoa. E i ai sona faamoemoega e maualuga atu ma paia. Ina ia agavaa mo le mamalu o se pepa faataga o le malumalu, e tatau ona e ola e tusa ai ma aoaoga o Le Ekalesia a Iesu Keriso o le Au Paia o Aso e Gata Ai.
I lou faatalanoaga e te maua ai le avanoa e suesue ai lou agaga e uiga i lou faatuatua patino ia Iesu Keriso ma Lana Togiola. Ua e maua le faamanuiaga e ta’u atu ai lau molimau i le talalelei toefuataiina, lou naunautaiga e lagolago i latou ua valaauina e le Alii e taitai Lana Ekalesia; lou faatuatua i le aoaoga faavae o le talalelei; o lou faataunuuina o tiutetauave faaleaiga; o ou uiga auaumama o le faamaoni, ola mama, lotonuu, usiusitai, tausiga o le Upu o le Poto, le tulafono o le sefuluai, ma le paia o le aso Sapati. O mataupu faavae mautu na o se olaga e tuuto ia Iesu Keriso ma Lana galuega.
O lou pepa faataga o le malumalu e atagia ai se faamoemoega loloto, faaleagaga o loo e taumafai malosi e ola ai i tulafono a le Alii ma fiafia i mea e alofa o Ia i ai: lotomaualalo, agamalu, mausali, alofa mama, lototoa, agaalofa, lotofaamagalo, ma le usiusitai. Ma e te tautino atu oe lava i na tulaga faatonuina pe a e sainia lou igoa i lena pepa tusitusia paia.
O lou pepa faataga o le malumalu e tatala ai faitotoa o le lagi mo oe ma isi faatasi ai ma aia tatau ma sauniga e taua e faavavau e aofia ai papatisoga, faaeega paia, faaipoipoga, ma faamauga.
Ina ia “fautuaina atu i le Alii” o le faamanatu atu lea o mea ua faamoemoeina mai se e Paia o Aso e Gata Ai e tausi feagaiga. O lo’u tama faale-tulafono o Blaine, sa ia vaai atu i ai o se tapenaga taua tele mo le aso o le a ia tu atu ai ma le lotomaualalo i luma o le Alii.
Manatu i le taimi na a’e ai Mose i le Mauga o Horepa ma faaali atu ai le Alii o Ieova ia te ia i se laau na mu. Sa fetalai atu le Atua ia te ia, “Ina to ese ia ou seevae i ou vae, aua ua sa lava le eleele o loo e tu ai nei.” 2
O le toesea o ou seevae i le faitotoa o le malumalu o le lafoai ese lea o ou manaoga faalelalolagi po o mea faafiafia e faalavelaveina ai i tatou mai lo tatou tuputupu ae faaleagaga, o le faapafala ese o na mea ia e afua ai ona taulai atu i mea o le olaga, ia le puleaina e amioga faafinauvale, ma sailia le taimi ia paia ai.
E ala i le mamanu faalelagi, o o tatou tino faitino o se foafoaga a le Atua, o se malumalu mo lou agaga, ma e ao ona taulimaina ma le migao. E moni lava upu o le pese a le Peraimeri: “O lo’u tino o se malumalu e manaomia le tausiga aupito silisili.” 3 Ina ua faaali atu le Alii ia sa Nifae, sa Ia poloai atu, “Ia faapaiaina outou i le taliaina o le Agaga Paia, ina ia outou tutu ma le le pona i o’u luma.” 4 “O a ituaiga o tagata e tatau ona outou i ai?” na fesili atu ai le Alii ona tali lea, “E pei lava o A’u nei.” 5 Ina “ia fautuaina atu i le Alii,” tatou te taumafai malosi ia avea e faapei o Ia.
Ou te manatua le faalogo atu ia Peresitene Howard W. Hunter i lana uluai saunoaga o se Peresitene lona 14 o le Ekalesia. Na ia saunoa: “O le moomooga sili lava o lo’u loto, ia agavaa tagata uma o le Ekalesia e ulu atu i le malumalu. O le a fiafia le Alii pe a agavaa tagata matutua uma o le Ekalesia—ma tauaveina—se pepa faataga o le malumalu.” 6 Ou te fia faaopoopo atu i ai e faapea, o se pepa faataga e tapulaa lona faaaogaina o le a seti ai se ala manino mo o tatou talavou pele.
Na toe ta’ua e Peresitene le saunoaga a Peresitene Hunter, “I lena aso, aso 6 Iuni 1994, na avea ai le pepa faataga o le malumalu tatou te tauaveina, o se mea faitino ese i la’u atotupe. A o lei oo i lena aso, sa na o se mea ia maua ai se taunuuga moomia. O se auala e faataga ai ona ou ulufale atu i se maota paia o le Alii, ae ina ua mavae lana tautinoga lena, na avea loa o se tini lava lea. Na avea ma pine o le usiusitai i se perofeta a le Atua.” 7
Afai e lei maua sou pepa faataga pe ua uma le aoga, tu loa i le laina i le faitotoa o le epikopo e faapei o uluai Au Paia sa laina i le faitotoa o le Malumalu o Navu i le 1845 ma le 1846, 8 O o’u augatama o nisi o na au faamaoni. Sa latou lafoai lo latou aai matagofie ae malaga mai i sisifo, ae sa latou iloa sa i ai aafiaga paia sa faatalitali mo i latou i le malumalu. Sa tusia e Sara Rich mai le alasopo gaoa i Aioua, “Ana leai le faatuatua ma le malamalama sa faaeeina i o matou luga i lena malumalu …, semanu le matou faigamalaga e faapei o le puna ifo i le pouliuli.” 9 O le mea lena o loo tatou misia pe afai tatou te ola na o i tatou i lenei olaga e aunoa ma musumusuga ma le filemu ua folafola mai i totonu o le malumalu.
Amata nei loa le faagasologa ia avea ma se e “fautuaina atu i le Alii” ina ia faateleina le mafutaga a le Alii ma oe ma ia aumaia ai e le Ona tulaga faatonuina le “filemu o le lotofuatiaifo.” 10
O le a fesoasoani ou taitai o le autalavou, peresitene o le korama a toeaina, peresitene o le Aualofa, ma uso ma tuafafine a auaunaga, e saunia oe, ma o le a taialaina oe ma le alofa e lou epikopo po o le peresitene o le paranesi.
Ua tatou i ai i se taimi ua tapunia ai malumalu pe faatapulaa foi le faaaogaaga. Mo Peresitene Nelson ma i matou o e galulue faatasi ma ia, o le faaiuga musuia e tapunia malumalu sa o se mea “tiga tele” ma “sa afua ai le tiga tele ma le popole.” Sa oo ina fesili Peresitene Nelson ia te ia lava, “Se a sa’u tala i le Perofeta o Iosefa Samita? Se a sa’u tala ia Polika Iaga, Uilifoti Uitilafi, ma isi peresitene e oo mai ia Peresitene Thomas S. Monson?” 11
O le taimi nei, ua faasolosolo ma le agaga faafetai ona toe tatala ia malumalu mo faamauga ma faaeega paia i se fuafaatatau tapulaa.
Peitai, o le agavaa e ulu atu i le malumalu, o se tulaga manaomia pea lava. Se’i ou faamamafaina atu, pe o mafai ona e maua se malumalu pe leai, e manaomia lava ona i ai sau pepa faataga o le malumalu e te tumau mausali ai i luga o le ala o feagaiga.
I le faaiuga o le tausaga ua mavae, sa ma o ai ma Sister Rasband i se tofiga i Niu Sila e talanoa i se tauaofiaga tele o talavou nofofua matutua. Sa le faigofie ona latou maua se malumalu; sa fai le faafouga o le malumalu i Hamilton, ma sa latou faatalitali pea lava mo le suatiaina o le eleele mo le malumalu i Aukilani. Peitai, sa uunaia au e faamalosiau ia te i latou e faafou pe ia maua ni pepa faataga o le malumalu.
E ui ina sa le mafai ona latou tuuina atu i latou lava i le malumalu ae o le a tuuina atu i latou lava i luma o le Alii ma saunia ai e auauna atu ia te Ia. O le agavaa e umia se pepa faataga o aoga o le malumalu o se puipuiga mai le fili, aua ua uma ona e faia se tautinoga mausali i le Alii e uiga i lou olaga, ma se folafolaga o le a mafuta le Agaga ma oe.
Tatou te faia galuega o le malumalu pe a tatou sailia o tatou augatama ma auina atu o latou igoa mo sauniga. E ui ina sa tapunia o tatou malumalu, ae sa mafai lava ona saili o tatou aiga. Faatasi ai ma le Agaga o le Atua i o tatou loto, o loo tatou tutu, e ala i le avea ma sui, mo i latou ina ia “fautuaina atu i le Alii.”
A o galue ai o se Faatonu Sili o le Matagaluega o Malumalu, sa tele ina ou faalogoina Peresitene Gordon B. Hinckley o ta’ua le mau lenei sa fetalai i ai le Alii e uiga i le Malumalu o Navu: “Ia tuu atu le galuega o loʼu malumalu, ma galuega uma ua Ou tofia ia te outou, ia faia pea ma lē taofia; ma ia tuu atu lo outou filiga, ma lo outou maelega, ma le onosai, ma a outou galuega ia toe faaluaina, ma o le a leai se ala e aveesea ai lo outou taui, ua fetalai mai ai le Alii o Au.” 12
O a tatou galuega i le malumalu ua noatia i lo tatou taui e faavavau. Talu ai nei na tofotofoina ai i tatou. Ua tofia i tatou e le Alii e galulue i malumalu ma le “filiga … maelega, ma le onosai.” 13 O le “fautuaina atu i le Alii,” e manaomia ai na uiga auaumama. E tatau ona tatou filiga e ola ai i poloaiga, maelega i lo tatou gauai atu i a tatou feagaiga o le malumalu, ma ia lotofaafetai mo mea o loo aoao mai pea lava e le Alii e uiga i ai, ma ia onosai a o tatou faatalitali mo malumalu ia toe tatala i lo latou atoaga.
Pe a oo ina valaau mai le Alii ia i tatou e “faaluaina” a tatou taumafaiga, ua Ia poloai mai ia faateleina i le amiotonu. Mo se faataitaiga, e mafai ona faalautele lo tatou suesueina o tusitusiga paia, o le sailia o o tatou talafaasolopito o aiga, ma a tatou tatalo o le faatuatua ina ia mafai ona faasoa atu lo tatou fiafia i le maota o le Alii faatasi ai ma i latou o loo sauniuni ia maua se pepa faataga o le malumalu, aemaise o tagata o o tatou aiga.
Ou te folafola atu i le avea ai ma se Aposetolo a le Alii o Iesu Keriso a e tauivi malosi e faaluaina au taumafaiga amiotonu, o le a e lagonaina le faafouina i lou tuuto atu i le Atua le Tama ma Iesu Keriso, o le a lagonaina le faateleina o le taialaina o oe e le Agaga Paia, o le a e lotofaafetai mo au feagaiga paia, ma o le a e lagonaina le filemu i le iloa ai “ua fautuaina atu [oe] i le Alii.” I le suafa o Iesu Keriso, amene.