Elder Dean M. Davies
General Authority Seventy
Samtang nagdrayb aron mopauli gikan sa trabaho niadtong 1989, si Elder Dean M. Davies nakasinati og linog sa San Francisco, California, USA, nga hilabihang miuyog sa iyang sakyanan. Sa wala madugay, samtang namalandong siya sa miresulta nga kadaot sa dapit, napahinumduman siya sa kaimportante sa pagtukod sa atong kinabuhi diha sa lig-on nga tukuranan.
“Walay usa nato nga motuyo og tukod sa atong panimalay, dapit nga trabahoan, o sagradong mga balay alampoanan diha sa balas o dinahili o walay saktong plano o materyales,” miingon siya. “Atong dawaton ang pagdapit sa Manluluwas sa pagduol Kaniya. Atong itukod ang atong kinabuhi sa luwas ug tinuod nga tukuranan.”1
Si Elder Davies, kinsa nakaserbisyo sa Presiding Bishopric sukad niadtong Abril 2012, gipaluyohan isip General Authority Seventy niadtong Oktubre 3, 2020. Sa Presiding Bishopric, si Elder Davies miserbisyo isip Ikaduhang Magtatambag ngadto ni Bishop Gary E. Stevenson hangtud nga si Bishop Stevenson gipaluyohan isip sakop sa Korum sa Napulog Duha ka mga Apostoles niadtong Oktubre 3, 2015. Si Elder Davies dayon gipaluyohan isip Unang Magtatambag ni Bishop Gérald Caussé, kinsa mipuli ni Elder Stevenson isip ang bag-ong Presiding Bishop.
Si Dean Myron Davies natawo sa Siyudad sa Salt Lake, Utah, USA, niadtong 1951. Human miserbisyo isip full-time nga misyonaryo sa Uruguay/Paraguay Mission, naminyo siya kang Darla James niadtong 1973 sa Templo sa Salt Lake. Sila adunay 5 ka anak ug 17 ka apo.
Niadtong Hulyo 1995, misugod siya sa pagtrabaho alang sa Simbahan, diin siya ang tigdumalang direktor sa Special Projects Department, nga maoy responsable alang sa espesyal nga katuyoan nga real estate, desinyo sa templo, ug pagtukod sa templo. Sa wala pa siya magtrabaho sa Simbahan, si Elder Davies nagtrabaho sa High Industries, Inc., sa Lancaster, Pennsylvania, USA, ug sa Bechtel Investments, Inc., sa San Francisco. Nakaangkon siya og bachelor’s degree sa agricultural economics sa Brigham Young University ug nakakompleto og advanced executive nga mga programa sa Stanford ug Northwestern University.
Si Bishop Davies nakaserbisyo isip presidente sa Puerto Rico San Juan Mission, magtatambag sa presidente sa misyon, presidente sa stake, magtatambag sa presidente sa stake, executive secretary sa stake, high councilor, ug sa pipila ka bishopric.