ជម្រើសរបស់លីឡា
អ្នកនិពន្ធរស់នៅទីក្រុងកូរីនទេស ប្រទេសអាហ្សង់ទីន ។
« ព្រះបានប្រទានវិហារឲ្យខ្ញុំ » ( សៀវភៅចម្រៀងកុមារ ទំព័រ ៧៣ ) ។
លីឡាចង់ជ្រើសរើសត្រូវ ។
« ដល់ពេលអានព្រះគម្ពីរហើយ ! » លីឡាបាននិយាយ ។
លីឡាចូលចិត្តអានឲ្យអានីកាជាប្អូនស្រីនាង និងស្វេថានជាប្អូនប្រុសនាងស្ដាប់ ។ មិនយូរទៀតទេលីឡានឹងទទួលបុណ្យជ្រមុជទឹក ! ដើម្បីត្រៀមខ្លួនជាស្រេច នាងចង់អានព្រះគម្ពីរជារៀងរាល់ថ្ងៃ ។
លីឡាបានបើកសៀវភៅរឿងព្រះគម្ពីរទៅទំព័រទីមួយ ។ អានីកា និងស្វេថានបានខិតមកជិតដើម្បីពួកគេអាចមើលឃើញរូបភាព ។
លីឡាបាននិយាយថា « ចូរស្ដាប់ដោយប្រុងប្រយ័ត្ន ព្រោះបងនឹងសួរសំណួរដល់ប្អូនៗបន្ទាប់ពីអានហើយ » ។ បន្ទាប់មកនាងបានចាប់ផ្ដើមអានជំពូកទីមួយ ។
លីឡាបានអានថា « មុនពេលយើងកើតមក យើងបានរស់នៅឯស្ថានសួគ៌ » ។ « យើងពុំទាន់មានរូបកាយនៅឡើយទេ ។ យើងគឺជាវិញ្ញាណ » ។
លីឡា អានីកា និងស្វេថាន បានមើលទៅរូបភាពដែលមានមនុស្សស្លៀកពាក់ពណ៌ស ។
« ត្រៀមសម្រាប់សំណួរទីមួយហើយឬនៅ ? » លីឡាបានងាកទៅអានីកា ។ « តើប្អូនបានមកពីណាមុនប្អូនកើតមក ? »
អានីកាបានទះដៃនាង ។ « ស្ថានសួគ៌ ! »
លីឡាបាននិយាយថា « ត្រឹមត្រូវហើយ » ។ « ហើយតើស្វេថានបានមកពីណាដែរ ? »
អានីកាបាននិយាយថា « គាត់បានមកពីស្ថានសួគ៌ផងដែរ » ។ ស្វេថានបានសើចកក្អឹក ហើយបានដាក់ដៃចូលមាត់គាត់ ។ លីឡា និងអានីកាបានសើច ។ ស្វេថានគឺជាក្មេងអាយុមួយឆ្នាំដែលគួរឲ្យស្រឡាញ់បំផុតនៅក្នុងប្រទេសអាហ្សង់ទីន !
លីឡាបាននិយាយថា « គ្រួសារយើងទាំងមូលបានមកពីស្ថានសួគ៌ » ។ « ព្រះយេស៊ូវផងដែរ ។ ទ្រង់បានយាងមកដើម្បីជួយយើង ដើម្បីយើងអាចរស់នៅជាមួយព្រះវរបិតាសួគ៌ម្តងទៀត » ។ លីឡាបានចង្អុលទៅរូបភាពព្រះយេស៊ូវនៅក្នុងទំព័រនោះ ។
បន្ទាប់ពីនាងបានអានចប់ហើយ លីឡាបន្តគិតថាវាមានសភាពបែបណាដើម្បីរស់នៅជាមួយព្រះយេស៊ូវនៅក្នុងស្ថានសួគ៌នោះ ។ នាងចង់ក្លាយដូចជាទ្រង់ ។ នាងចង់ជ្រើសរើសត្រូវជានិច្ច !
នៅថ្ងៃបន្ទាប់នៅសាលារៀន លីឡាកូរពោះពេលនាងឈរក្នុងជួររង់ចាំអាហារពេលព្រឹក ។ នាងស្ទើរតែអាចភ្លក់រសជាតិនំអិមផាញ៉ាដាសបាន ពេលដែល Señora Ruiz បានដាក់វាក្នុងចាននាង ។ វាឈ្ងុយខ្លាំងណាស់ !
បន្ទាប់មក Señora Ruiz បានចាក់ទឹកដោះគោមួយកែវឲ្យលីឡា ។ លីឡាបានគិត អូ ។ ទឹកដោះគោមើលទៅមានពណ៌ក្រមៅជាងសព្វដង ។ ជួនកាលសាលានាងបានថែមកាហ្វេ ឬតែទៅក្នុងភេសជ្ជៈ ។
« តើមានកាហ្វេ ឬតែនៅក្នុងទឹកដោះគោទេថ្ងៃនេះ ? » លីឡាបានសួរ ។
Señora Ruiz បានគ្រវីដៃគាត់ ។ គាត់បាននិយាយថា « មានកាហ្វេបន្តិច » ។ « ក្មួយនឹងមិនអាចដឹងរស់ជាតិវាផង » ។
លីឡាបានគិតបន្តិច ។ នាងចងចាំថានាងចង់ក្លាយដូចជាព្រះយេស៊ូវ ហើយជ្រើសរើសត្រូវ ។ នាងបានដឹងថា ការផឹកកាហ្វេជាអ្វីដែលពួកព្យាការីបានប្រាប់ថាមិនឲ្យធ្វើ ។
លីឡាបាននិយាយថា « ទេ អរគុណហើយ ។ ខ្ញុំនឹងមិនញ៉ាំទឹកដោះគោទេថ្ងៃនេះ » ។ នាងបានញញឹមដាក់ Señora Ruiz ។ បន្ទាប់មកនាងបានអង្គុយចុះដើម្បីញ៉ាំ ។
នៅយប់នោះ លីឡាបានជួយ Papi លាងចាននៅក្នុងផ្ទះបាយ ។ នាងនៅតែគិតអំពីរឿងក្នុងព្រះគម្ពីរ ។ នាងក៏បានគិតអំពីទឹកដោះគោផងដែរ ។
« Papi ? »
« បាទ ! » Papi បានតប ។
« ហេតុអ្វីព្រះវរបិតាសួគ៌សព្វព្រះទ័យឲ្យយើងមានរូបកាយ ? »
Papi បានគិតពេលគាត់លាងចានមួយទៀត ។ គាត់បាននិយាយថា « មែនហើយ ទ្រង់ប្រទានរូបកាយដល់យើង ដើម្បីយើងអាចក្លាយដូចជាទ្រង់ » ។ « រូបកាយរបស់កូនជាផ្ទះសម្រាប់វិញ្ញាណកូន ។ នោះជាអត្ថន័យរបស់វា ពេលយើងនិយាយថា រូបកាយយើងជាព្រះវិហារបរិសុទ្ធ » ។
លីឡាបានងក់ក្បាល ។ នាងបានច្រៀងចម្រៀងមួយអំពីរឿងនោះនៅក្នុងថ្នាក់កុមារនាពេលខ្លះ ! « ដូច្នេះហើយបានជាព្រះវរបិតាសួគ៌មានព្រះទ័យចង់ឲ្យយើងថែរក្សារូបកាយរបស់យើង មែនទេ ? »
Papi បានតបថា « មែនហើយ » ។
លីឡាបាននិយាយថា « ថ្ងៃនេះនៅឯសាលា គេបានដាក់កាហ្វេនៅក្នុងទឹកដោះគោ ។ « ខ្ញុំអត់បានផឹកវាទេ ។ ខ្ញុំព្យាយាមដើម្បីថែទាំព្រះវិហារបរិសុទ្ធរបស់ខ្ញុំ » ។
Papi បាននិយាយថា « ប៉ាមានមោទនភាពចំពោះកូនណាស់ » ។ គាត់ជូតដៃគាត់នឹងកន្សែង ហើយបានឱបលីឡា ។
លីឡាបានឱប Papi យ៉ាងណែន ។ នាងសប្បាយចិត្តដែលបានថែរក្សារូបកាយដែលព្រះវរបិតាសួគ៌បានប្រទានដល់នាង ។