Ang Melchizedek nga Pagkapari ug ang mga Yawe
Sa Simbahan ang awtoridad sa pagkapari gamiton ubos sa direksyon sa usa ka lider sa pagkapari kinsa naghupot sa mga yawe niana nga pagkapari.
Mipili ko nga dugang nga mamulong mahitungod sa pagkapari sa Dios, ang hilisgutan nga nahisgutan na sa tulo ka nag-unang mamumulong kinsa mitudlo kanato kon sa unsang paagi ang pagkapari mopanalangin sa mga kinabuhi sa mga babaye, batan-on nga mga babaye, ug batan-on nga mga lalaki.
Ang pagkapari mao ang balaanong gahum ug awtoridad nga temporaryong gitugyan nga gamiton diha sa buhat sa Dios alang sa kaayohan sa tanan Niyang mga anak. Ang pagkapari dili mao kadtong gi-orden ngadto sa usa ka katungdanan sa pagkapari o kadtong mogamit sa awtoridad niini. Ang mga lalaki kinsa naghupot sa pagkapari dili mao ang pagkapari. Samtang dili nato tawagon ang na-orden nga mga lalaki isip ang pagkapari, haum nga tawagon sila isip naghupot sa pagkapari.
Ang gahum sa pagkapari anaa diha sa Simbahan ug sa organisasyon sa pamilya. Apan ang gahum sa pagkapari ug awtoridad sa pagkapari lahi ang paglihok diha sa Simbahan kay sa pamilya. Kining tanan nagsubay sa mga baruganan nga giestablisar sa Ginoo. Ang katuyoan sa plano sa Dios mao ang paggiya sa Iyang mga anak ngadto sa kinabuhing dayon. Ang mortal nga mga pamilya mahinungdanon niana nga plano. Ang Simbahan anaa aron sa paghatag og doktrina, sa awtoridad, ug sa mga ordinansa nga gikinahanglan aron sa pagpadayon sa mga relasyon sa pamilya ngadto sa kahangturan. Busa, ang organisasyon sa pamilya ug ang Simbahan ni Jesukristo nagsuporta sa usag usa. Ang mga panalangin sa priesthood—sama sa kahingpitan sa ebanghelyo ug mga ordinansa sama sa bunyag, kumpirmasyon ug pagdawat sa gasa sa Espiritu Santo, sa tuga sa templo, ug mahangturong kaminyoon—pareho nga anaa alang sa mga lalaki ug mga babaye.1
Ang pagkapari nga atong gihisgutan dinhi mao ang Melchizedek nga Pagkapari, gipahiuli sa pagsugod sa Pagpahiuli sa ebanghelyo. Si Joseph Smith ug Oliver Cowdery gi-orden ni Pedro, Santiago, ug Juan, kinsa mideklarar sa ilang mga kaugalingon “nga naghupot sa mga yawe sa gingharian, ug sa kapaigoan sa kahingpitan sa panahon” (Doktrina ug mga Pakigsaad 128:20). Kining senyor nga mga Apostoles nakadawat niana nga awtoridad gikan sa Manluluwas Mismo. Ang tanan nga mga awtoridad o katungdanan diha sa pagkapari mga sumpay sa Melchizedek nga Pagkapari (tan-awa sa Doktrina ug mga Pakigsaad 107:5), kay kini “naghupot sa katungod sa kapangulohan, ug adunay gahum ug pagtugot ibabaw sa tanan nga mga buhatan diha sa simbahan sa tanan nga panahon sa kalibutan” (Doktrina ug mga Pakigsaad 107:8).
Sa Simbahan ang awtoridad sa labaw nga pagkapari, ang Melchizedek nga Pagkapari, ug ang ubos o Aaronic nga Pagkapari gamiton ubos sa direksyon sa usa ka lider sa pagkapari, sama sa bishop o presidente, kinsa naghupot sa mga yawe niana nga pagkapari. Aron makasabut sa paggamit sa awtoridad sa pagkapari diha sa Simbahan, kinahanglang makasabut kita sa baruganan sa mga yawe sa pagkapari.
Ang mga yawe sa Melchizedek nga Pagkapari sa gingharian gitugyan pinaagi ni Pedro, Santiago, ug Juan, apan wala kana mokompleto sa pagpahiuli sa mga yawe sa pagkapari. Ang ubang mga yawe sa pagkapari ulahi nga miabut. Human sa pagpahinungod sa unang templo niini nga dispensasyon sa Kirtland, Ohio, tulo ka propeta—si Moises, Elias, ug Elijah—mipahiuli “sa mga yawe niini nga dispensasyon,” lakip sa mga yawe kalabut sa pagpundok sa Israel ug sa buhat sa mga templo sa Ginoo (tan-awa sa Doktrina ug mga Pakigsaad 110), sama sa bag-o lang gihulagway ni Presidente Eyring nga maagnihon kaayo.
Ang labing pamilyar nga ehemplo sa gamit sa mga yawe mao ang sa pagpahigayon sa mga ordinansa sa pagkapari. Ang usa ka ordinansa usa ka solemne nga buhat nga nagtimaan sa paghimo og mga pakigsaad ug sa pagsaad og mga panalangin. Sa Simbahan ang tanang ordinansa ipahigayon ubos sa pagtugot sa lider sa pagkapari kinsa naghupot sa mga yawe alang niana nga ordinansa.
Ang usa ka ordinansa kasagaran nga ipahigayon sa mga tawo kinsa na-orden ngadto sa usa ka katungdanan sa pagkapari nga naglihok ubos sa direksyon sa tawo kinsa naghupot sa mga yawe sa pagkapari. Sama pananglit, ang mga naghupot sa lain-laing katungdanan sa Aaronic nga Pagkapari mopahigayon sa ordinansa sa sakramento ubos sa mga yawe ug direksyon sa bishop, kinsa naghupot sa mga yawe sa Aaronic nga Pagkapari. Ang samang baruganan magamit ngadto sa mga ordinansa sa pagkapari diin ang mga babaye ang mopahigayon diha sa templo. Bisan kon ang mga babaye wala maghupot og katungdanan sa pagkapari, mopahigayon sila og sagrado nga mga ordinansa ubos sa pagtugot sa presidente sa templo, kinsa naghupot sa mga yawe alang sa mga ordinansa sa templo.
Ang laing ehemplo sa awtoridad sa pagkapari ubos sa direksyon sa tawo nga naghupot sa mga yawe mao ang mga pagtulun-an sa mga lalaki ug babaye nga gitawag sa pagtudlo sa ebanghelyo, sa mga klase man diha sa ilang mga home ward o sa natad sa mission. Ang ubang mga ehemplo mao kadtong naghupot og mga posisyon sa pagpangulo diha sa ward ug migamit og awtoridad sa pagkapari sa ilang pagpangulo tungod sa ilang mga calling ug ubos sa pagset-apart ug direksyon sa lider sa pagkapari nga naghupot sa mga yawe diha sa ward o sa stake. Sa ingon niini nga paagi gigamit ug gipahimuslan ang awtoridad ug gahum sa pagkapari diha sa Ang Simbahan ni Jesukristo sa mga Santos sa Ulahing mga Adlaw.2
Ang awtoridad sa pagkapari gigamit usab ug ang mga panalangin niini nasinati diha sa mga pamilya sa mga Santos sa Ulahing mga Adlaw. Sa mga pamilya ang akong gipasabut mao ang lalaki nga naghupot sa pagkapari ug babaye kinsa naminyo ug ang ilang mga anak. Gilakip usab nako ang mga pagkalahi gikan sa gimithi nga mga relasyon sama sa resulta sa kamatayon o diborsyo.
Ang baruganan nga ang katungod sa pagkapari magamit lamang ubos sa direksyon sa tawo nga naghupot sa mga yawe alang niana nga buluhaton importante diha sa Simbahan, apan dili kini mahimo diha sa pamilya. Sama pananglit, ang usa ka amahan modumala ug mogamit sa pagkapari diha sa iyang pamilya pinaagi sa awtoridad sa pagkapari nga iyang gihuptan. Dili siya magkinahanglan sa direksyon o pagtugot sa tawo nga naghupot sa mga yawe sa pagkapari aron mopahigayon sa iyang lain-laing mga buluhaton sa pamilya. Naglakip kini sa pagtambag sa mga sakop sa iyang pamilya, pagpahigayon og mga miting sa pamilya, paghatag og mga panalangin sa pagkapari ngadto sa iyang asawa ug mga anak, o paghatag og panalangin sa pag-ayo ngadto sa mga sakop sa pamilya o sa uban.3 Ang mga awtoridad sa Simbahan motudlo sa mga sakop sa pamilya apan dili modumala sa paggamit sa awtoridad sa pagkapari diha sa pamilya.
Ang samang baruganan magamit kon wala ang amahan ug ang inahan mao ang lider sa pamilya. Siya ang mangulo diha sa iyang panimalay ug maoy himan nga madala ang gahum ug mga panalangin sa pagkapari nganha sa iyang pamilya pinaagi sa iyang tuga ug pagsilyo diha sa templo. Samtang dili siya awtorisado nga mohatag og mga panalangin sa pagkapari nga mahatag lamang sa usa ka tawo nga naghupot og piho nga katungdanan diha sa pagkapari, makahimo siya sa pagbuhat sa ubang mga buluhaton sa pagpangulo sa pamilya. Sa paghimo niini, iyang gigamit ang gahum sa pagkapari alang sa kaayohan sa mga anak nga iyang gidumala diha sa iyang posisyon sa pagpangulo diha sa pamilya.4
Kon ang mga amahan hingpit nga mogamit sa ilang pagkapari diha sa ilang kaugalingong pamilya, makapauswag kini sa misyon sa Simbahan sama sa uban pa nilang mabuhat. Ang mga amahan nga naghupot sa Melchizedek nga Pagkapari kinahanglang mogamit sa ilang awtoridad “sa pagdani, sa pagkamainantuson, sa kalumo ug kaaghup, ug sa tiunay nga paghigugma” (Doktrina ug mga Pakigsaad 121:41). Kanang taas nga sumbanan alang sa paggamit sa tanang awtoridad sa pagkapari maoy labing importante diha sa pamilya. Ang mga naghupot sa pagkapari kinahanglan motuman usab sa mga sugo aron makabaton sila sa gahum sa pagkapari sa paghatag og mga panalangin ngadto sa mga sakop sa ilang pamilya. Sila kinahanglang mag-ugmad og mahigugmaong mga relasyon sa pamilya aron ang mga sakop sa pamilya madasig sa paghangyo kanila og mga panalangin. Ug ang mga ginikanan kinahanglang moawhag og dugang nga mga panalangin sa pagkapari diha sa pamilya.5
Niini nga mga miting sa komperensya, samtang magtinguha kita og mubong pahulay gikan sa atong mortal nga mga kabalaka tungod sa makalaglag nga pandemic, gitudloan kita og importanting mga baruganan sa kahangturan. Ako moawhag sa matag usa kanato nga ang atong mata “bug-os” nga modawat niini nga mga kamatuoran sa kahangturan aron ang atong mga lawas “mapuno sa kahayag” (3 Nephi 13:22).
Sa Iyang wali ngadto sa mga pundok sa katawhan nga narekord diha sa Biblia ug sa Basahon ni Mormon, ang Manluluwas mitudlo nga ang mortal nga mga lawas mamahimong puno sa kahayag o puno sa kangitngit. Kita, siyempre, gusto nga mapuno sa kahayag, ug ang atong Manluluwas mitudlo kanato kon unsaon nga mahitabo kini. Kita kinahanglang maminaw sa mga mensahe mahitungod sa mga kamatuoran sa kahangturan. Iyang gigamit ang ehemplo sa atong mata, nga pinaagi niini makapasulod kita og kahayag sa atong lawas. Kon ang atong “mata bug-os”—sa laing pagkasulti, kon nakatutok kita sa pagdawat og mahangturong kahayag ug pagsabut—Siya mipasabut, “ang tibuok ninyong lawas mapuno sa kahayag” (Mateo 6:22; 3 Nephi 13:22). Apan kon ang atong “mata dautan”—kana, kon mangita kita og dautan ug isulod kini sa atong lawas—Siya mipasidaan, ang “inyong tibuok lawas mapuno sa kangitngit” (bersikulo 23). Sa laing pagkasulti, ang kahayag o kangitngit diha sa atong mga lawas mag-agad kon sa unsang paagi nato gitan-aw—o gidawat—ang mahangturon nga mga kamatuoran nga gitudlo kanato.
Kinahanglan natong sundon ang pagdapit sa Manluluwas nga magtinguha ug mohangyo nga makasabut sa mga kamatuoran sa kahangturan. Siya misaad nga ang atong Amahan sa Langit andam nga motudlo sa tanan sa mga kamatuoran nga ilang gitinguha (tan-awa sa 3 Nephi 14:8). Kon magtinguha kita niini ug himoon ang atong mata nga bug-os nga modawat niini, ang Manluluwas misaad nga ang mga kamatuoran sa kahangturan “pagaablihan” kanato (tan-awa sa 3 Nephi 14:7–8).
Agig pagtandi, si Satanas matinguhaon sa paglibog sa atong hunahuna o sa pagpahisalaag kanato sa importante nga mga butang sama sa mga paagi sa paglihok sa pagkapari sa Dios. Ang Manluluwas mipasidaan sa ingon nga “mini nga mga propeta, kinsa moduol kaninyo nga magsul-ob sa saput sa karnero, apan diay sa sulod nila sila mga lobo nga manunukob” (3 Nephi 14:15). Mihatag Siya kanato niini nga pagsulay aron sa pagtabang kanato nga mopili sa kamatuoran gikan sa lain-laing pagtulun-an nga tingali makalibog kanato: “Kamo makaila kanila pinaagi sa ilang mga bunga,” Siya mitudlo (3 Nephi 14:16). “Ang usa ka maayo nga kahoy dili mohatag og dautan nga bunga, ni ang usa ka dautan nga kahoy [maka]hatag og maayo nga bunga” (bersikulo 18). Busa, kinahanglang motan-aw kita sa mga resulta—“ang mga bunga”—sa mga baruganan nga gitudlo ug sa mga tawo nga nagtudlo niini. Mao kana ang labing maayong tubag sa daghan sa mga pagsupak nga atong nadunggan batok sa Simbahan ug sa doktrina ug mga polisiya ug pagpangulo niini. Sunda ang pagsulay nga gitudlo sa Manluluwas. Tan-aw sa mga bunga—sa mga resulta.
Kon maghunahuna kita sa mga bunga sa ebanghelyo ug sa gipahiuli nga Simbahan ni Jesukristo, maglipay kita kon sa unsang paagi ang Simbahan, panahon sa kinabuhi sa buhi nga mga miyembro niini, mikaylap gikan sa lokal nga mga kongregasyon sa Intermountain West ngadto sa kahimtang diin ang kadaghanan sa sobra 16 ka milyon nga mga miyembro niini nagpuyo sa mga nasud gawas sa Estados Unidos. Uban niana nga pagtubo, atong gibati ang nadugangan nga kapasidad sa Simbahan sa pagtabang sa mga miyembro niini. Motabang kita sa pagsunod sa mga sugo, sa pagtuman sa mga responsibilidad sa pagsangyaw sa gipahiuli nga ebanghelyo, sa pagpundok sa Israel, ug sa pagtukod og mga templo sa tibuok kalibutan.
Gigiyahan kita sa usa ka propeta, si Presidente Russell M. Nelson, kansang pagpangulo gigamit sa Ginoo aron makab-ut ang pag-uswag nga atong nabati sulod sa sobra duha ka tuig sa iyang pagpangulo. Karon mapanalanginan kita nga maminaw ni Presidente Nelson, kinsa motudlo kanato kon unsaon nato nga madugangan ang atong pag-uswag niining gipahiuli nga Simbahan ni Jesukristo niining mahagiton nga panahon.
Mopamatuod ko sa kamatuoran niining mga butanga ug moapil kaninyo sa pag-ampo alang sa atong propeta, kinsa maoy sunod natong paminawon, sa ngalan ni Jesukristo, amen.