Pagpangita og Kadangpan gikan sa mga Kalisud sa Kinabuhi
Si Jesukristo ug ang Iyang Pag-ula mao ang dangpanan nga gikinahanglan natong tanan, bisan pa sa mga kalisud nga miabut sa atong kinabuhi.
Niadtong tunga-tunga sa mga 1990, atol sa akong pag-eskwela sa kolehiyo, kabahin ako sa Fourth Company sa Departamento sa Bombero sa Santiago sa Chile. Samtang nagserbisyo didto, ako nagpuyo sa estasyunan sa bombero isip kabahin sa bantay sa gabii. Sa hinapos sa tuig, ako gisultihan nga kinahanglan nga ako naa sa estasyunan sa bombero sa Bisperas sa Bag-ong Tuig tungod kay nianang adlawa adunay gayuy mga emerhensya. Nasurprisa, ako mitubag, “Mao ba?”
Hinoon, ako nahinumdom nga naghulat uban sa akong kauban sa dihang, pagkatungang gabii, nagsugod na sa pagbuto-buto sa siyudad sa Santiago. Kami nagginaksanay nga nanghinaut og kaayuhan alang sa bag-ong tuig. Sa kalit ang mga kampana sa estasyunan sa bombero nagsugod sa pagtingog, timailhan nga dunay emerhensya. Kami mikuha sa among ekipo ug misakay sa trak. Sa among pagpadulong sa emerhensya, sa among paglabay sa pundok sa mga tawo nga nagsaulog sa bag-ong tuig, ako nakamatikod nga sila walay pagpakabana ug walay pagtagad. Sila relaks ra ug nalingaw sa mainit nga kagabhion sa ting-init. Apan sa duol, ang mga tawo nga gidali namo sa pagtabang anaa sa seryoso nga problema.
Kini nga kasinatian nakatabang nako nga makaamgo nga bisan ang atong kinabuhi usahay nindot ra, ang panahon moabut sa matag usa nato nga kita mag-atubang sa wala paabuta nga mga hagit ug mga kalisud nga mosangko na sa atong abilidad sa paglahutay. Pisikal, mental, pamilya, ug panarbaho nga mga hagit; natural nga mga katalagman; ug ubang mga butang sa kinabuhi o kamatayon mao ang pipila ka mga ehemplo sa mga kalisud nga atong atubangon niini nga kinabuhi.
Kon nag-atubang niini nga mga kalisud, kita sa kasagaran makasinati og mga pagbati nga walay paglaum o kahadlok. Si Presidente Russell M. Nelson miingon, “Tungod kay ang hugot nga pagtuo mao man ang tambal sa kahadlok”—pagtuo diha sa atong Ginoong Jesukristo (“Ipakita ang Inyong Pagtuo,” Liahona, May 2014, 29). Sa akong pagkakita sa mga kalisud nga nakaapekto sa mga kinabuhi sa mga tawo, ako nakaingon nga bisan unsa pay matang sa kalisud ang moigo kanato—bisan adunay kasulbaran niini o katapusan—adunay usa lamang ka kadangpan, ug kini mao ra alang sa tanang matang sa mga kalisud. Kining bugtong dangpanan nga gihatag sa atong Langitnong Amahan mao ang atong Ginoo nga si Jesukristo ug ang Iyang Pag-ula.
Walay usa kanato nga makalikay sa pag-atubang niini nga mga kalisud. Si Helaman, usa ka propeta sa Basahon ni Mormon, mitudlo kanato sa mosunod: “Hinumdumi, hinumdumi nga kini diha sa lig-on nga sukaranan sa atong Manunubos kinsa mao si Kristo, ang Anak sa Dios, nga kamo kinahanglan gayud nga motukod sa inyong tukuranan; nga sa panahon nga ang yawa mopadala sa iyang mapintas nga mga hangin , oo, sa iyang mga pana diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos, mohampak diha kaninyo, kini walay gahum ibabaw kaninyo sa pagbitad kaninyo ngadto sa bung-aw sa pagkauyamot ug walay katapusan nga pagkaalaot, tungod sa lig-on nga sukaranan diin kamo natukod nga mao ang tinuod nga tukuranan, usa ka tukuranan diin kon ang mga tawo magtukod dili sila mapukan” (Helaman 5:12).
Si Elder Robert D. Hales, kinsa adunay iyang kaugalingong kasinatian sa mga kalisud, miingon, “Ang pag-antus anaa sa tanan; sa unsa nga paagi kita molihok niini iya sa indibidwal. Ang pag-antus makahatag kanato og usa sa duha ka mga paagi. Kini mahimong usa ka makapalig-on ug makapaputli nga kasinatian inubanan sa hugot nga pagtuo, o kini makaguba nga pwersa sa atong mga kinabuhi kon kita walay hugot nga pagtuo diha sa maulaong sakripisyo sa Ginoo” (“Your Sorrow Shall Be Turned to Joy,” Ensign, Nob. 1983, 66).
Aron makatagamtam sa dangpanan nga gitanyag ni Jesukristo ug sa Iyang Pag-ula, kinahanglan kitang magbaton og hugot nga pagtuo diha Kaniya—ang usa ka hugot nga pagtuo makahatag nato og abilidad sa pagbuntog sa tanang mga kasakit sa limitado, yutan-ong panglantaw. Siya misaad nato nga Siya mopagaan sa atong luwan kon kita moduol ngadto Kaniya sa atong tanang nga buhaton.
“Umari kanako”,Siya miingon, “kamong tanan nga nabudlay ug nabug-atan, ug papahulayon ko kamo.
“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.
“Kay masayon ang akong yugo, ug magaan ang akong luwan” (Mateo 11:28–30; tan-awa usab sa Mosiah 24:14–15).
Ginaingon nga “sa usa ka tawo nga adunay hugot nga pagtuo, wala kinahanglana ang pagpasabut. Sa usa ka tawo nga walay hugot nga pagtuo, walay pagpasabut ang posible.” (This statement has been attributed to Thomas Aquinas but is most likely a loose paraphrase of things he taught.) Hinoon, kita dunay limitado nga pagsabut sa mga butang nga nahitabo dinhi sa yuta, ug sa kasagaran kita walay mga tubag sa pangutana nga ngano. Nganong nahitabo man kini? Nganong nahitabo man kini kanako? Unsay angay nakong makat-unan? Kon dili kita makakita sa mga tubag, mao nga ang mga pulong nga gipadayag sa atong Manluluwas ngadto ni Propeta Joseph Smith didto sa Bilanggoan sa Liberty hingpit nga magamit:
“Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon;
“Ug unya, kon ikaw molahutay pag-ayo, ang Dios mobayaw kanimo sa kahitas-an” (Doktrina ug mga Pakigsaad 121:7–8).
Bisan daghang mga tawo ang nagtuo ni Jesukristo, ang importante nga pangutana mao kon kita ba nagtuo Kaniya ug kon kita ba nagtuo sa mga butang nga Iyang gitudlo nato ug gisugo nga atong buhaton. Tingali dunay maghunahuna, “Unsay nahibaloan ni Jesukristo unsay nahitabo kanako? Giunsa Niya pagkahibalo unsay akong gikinahanglan aron magmalipayon?” Sa tinuod, ang atong Manunubos ug Tigpataliwala ang gipasabut ni propeta Isaias sa dihang siya miingon:
“Gitamay siya ug gisalikway sa mga tawo; usa ka tawo sa mga kasub-anan, ug nakasinati sa pag-antus. …
“Sa pagkamatuod gipas-an niya ang atong kasakitan, ug gipas-an niya ang atong mga kasub-anan. …
“Apan siya gisamaran alang sa atong mga kalapasan, siya diha sa napangos tungod sa atong mga kasal-anan, ang silot sa atong pakigdait diha sa ibabaw niya; ug tungod sa iyang mga labod kita nangaayo” (Isaias 53:3–5).
Si Apostol Pedro mitudlo usab nato mahitungod sa Manluluwas, nag-ingon, “Siya gayud mao ang midala sa atong mga sala diha sa iyang lawas ngadto sa kahoy, aron kita mamatay, ngadto sa sala ug mabuhi ngadto sa pagkamatarung. Pinaagi sa Iyang mga samad kamo nangaayo” (1 Pedro 2:24).
Bisan og nagsingabut ang panahon sa kaugalingong pagkamartir ni Pedro, ang iyang mga pulong walay kahadlok o pagduha-duha; hinoon, siya mitudlo sa mga Santos sa “paglipay,” bisan og sila anaa “sa kabug-at tungod sa daghang mga tintasyon.” Si Pedro mitambag kanato sa paghinumdom nga “ang pagkatinuod sa [atong] pagtuo, … nga ginasulayan pinaagig kalayo” mosangpot ngadto “sa pagdalayeg ug paghimaya ug pagpasidungog kaninyo inigpadayag na unya kang Jesukristo” ug sa “kaluwasan sa [atong] mga kalag” (1 Pedro 1:6–7, 9).
Si Pedro mipadayon:
“Mga hinigugma, ayaw kamo paghikurat sa magasilaob nga kalisdanan nga magaabut sa pagsulay kaninyo, nga kaha pagaingnon ninyo nga usa ka talagsaong butang ang nahitabo kaninyo:
“Magalipay hinoon kamo sumala sa pagpakaambit sa mga kasakit ni Kristo, aron kamo magakalipay usab ug magasadyaon inigpadayag na unya sa iyang himaya” (1 Pedro 4:12–13).
Si Presidente Russell M. Nelson mitudlo nga ang “mga Santos mahimong magmalipayon sa bisan unsang kahimtang. … Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kamaya bisan unsa pay mahitabo—o wala manghitabo—sa atong kinabuhi. Ang kalipay moabut gikan ug tungod Kaniya. Siya ang tinubdan sa tanang kalipay” (“Hingpit nga Kalipay ug Espirituhanon nga Pagsugakod,”,” Liahona, Nob. 2016, 82).
Dayag lang, mas sayon ang pagsulti niining mga butanga kon kita wala sa taliwala sa kalisud kay sa pagpuyo ug paggamit niini panahon sa kalisud. Apan isip inyong igsoon, ako manghinaut nga kamo mobati nga ako sinsero nga mopaambit uban ninyo kon unsa ka bililhon ang pagkahibalo nga si Jesukristo ug ang Iyang Pag-ula mao ang dangpanan nga gikinahanglan natong tanan, bisan pa sa mga kalisud nga miabut sa atong kinabuhi.
Ako nasayud nga kitang tanan mga anak sa Dios, nga Siya nahigugma kanato, ug nga kita wala mag-inusara. Ako modapit kaninyo dali ug tan-awa Siya mopagaan sa inyong mga luwan ug mahimong dangpanan nga inyong gipangita. Dali ug tabang sa uban nga makakaplag og dangpanan nga ilang gitinguha pag-ayo. Dali ug pabilin uban namo niini nga dangpanan, nga motabang ninyo sa pagpakigbatok sa mga kalisud sa kinabuhi. Walay pagduha-duha sa akong kasingkasing nga kon kamo moduol, kamo makakita, kamo makatabang, ug kamo magpabilin.
Si propeta Alma mipamatuod sa mosunod ngadto sa iyang anak nga si Helaman: “Ako nasayud nga kinsa ang mobutang sa ilang pagsalig diha sa Dios pagabuligan sa ilang mga pagsulay ug sa ilang mga kasamok, ug sa ilang mga kasakit, ug pagabayawon sa katapusan nga adlaw” (Alma 36:3).
Ang Manluluwas Mismo miingon:
“Busa, himoa nga ang inyong mga kasingkasing mahupay …; kay ang tanan nga mga tawo ania sa akong mga kamot; pagmalinawon ug hibaloi nga Ako mao ang Dios. …
“Busa, ayaw kahadlok bisan ngadto sa kamatayon; kay dinhi niini nga kalibutan ang imong kalipay dili hingpit, apan kanako hingpit ang imong kalipay.” (Doktrina ug mga Pakigsaad 101:16, 36).
Ang himno nga “Akong Kalag, Magmalinawon,” nga nakapatandog sa akong kasingkasing sa daghang okasyon, adunay mensahe sa kahupayan alang sa atong kalag. Ang mga pulong mabasa sama sa mosunod:
Akong kalag magmalinawon ka
Sa kahangturan Dios kauban ta,
Kasubo ug kahadlok wala na,
Mobalik na ang putli nga gugma.
Akong kalag: magmalinawon ka,
Imong higala kay lipayon ka. (Mga Himno, nu. 70)
Sa atong pag-atubang sa mga kalisud sa kinabuhi, ako nasayud nga kon kita mohimo sa atong labing maayong paningkamot ug mosalig kang Jesukristo ug sa Iyang Pag-ula isip atong dangpanan, kita mapanalanginan og kahupayan, kalig-on, kontrol, ug kalinaw nga atong gitinguha, uban ang kasiguroan sa atong mga kasingkasing nga sa katapusan sa atong panahon dinhi sa yuta, makadungog kita sa mga pulong sa atong Magtutudlo: “Maayong pagkabuhat, maayo ug kasaligan nga ulipon:… dumuyog ka sa kalipay sa imong agalon” (Mateo 25:21). Sa ngalan ni Jesukristo, amen.