Mga Importanting Panghitabo sa ika-190 nga Tinuig nga Kinatibuk-ang Komperensya

Si Presidente Russell M. Nelson adunay klaro nga mensahe sa kinatibuk-ang komperensya: “Paminaw Kaniya.”

“Kita kinahanglang magtinguha, sa matag paagi kutob sa atong mahimo, sa pagpaminaw kang Jesukristo, kinsa namulong kanato pinaagi sa gahum ug pagpangalagad sa Espiritu Santo,” mitudlo si Presidente Nelson.

“Ang katuyoan niini ug sa matag kinatibuk-ang komperensya mao ang pagtabang kanato nga maminaw Kaniya” (pahina 7).

Sa usa ka komperensya nga nakatutok sa Unang Panan-awon ug sa Pagpahiuli, kita gitudloan nga makapaminaw kita Kaniya, sama ni Joseph Smith didto sa Sagrado nga Kakahoyan. Gilibutan sa mga epekto sa tibuok kalibutan nga pandemic nga nakaapekto og minilyon, gitudloan kita sa pagpaminaw Kaniya alang sa giya diha sa atong kalisdanan. Nagtan-aw ngadto sa usa ka hayag nga kaugmaon alang sa Simbahan ug sa matag usa kanato sa tinagsa-tagsa, gitudloan kita sa pagbag-o sa atong mga paningkamot sa pagpaminaw Kaniya ug sa pagsunod Kaniya.

“Ang daghang makapadasig nga mga butang niining Abril 2020 nga kinatibuk-ang komperensya,” miingon si Presidente Nelson, “… ma-summarize sa duha ka balaanong gilitok nga mga pulong: ‘Paminaw Kaniya.’ Kami nag-ampo nga ang inyong pagpokus sa Langitnong Amahan, kinsa militok niadto nga mga pulong, ug sa Iyang Hinigugmang Anak, si Jesukristo, mao ang labing importante sa inyong mga panumduman sa tanang nahitabo.”

Samtang magtuon ka sa mga mensahe niining komperensya ug magtinguha “nga maminaw, mamati, ug mopatalinghug sa mga pulong sa Manluluwas,” imong makaplagan ang saad sa propeta nga natuman diha sa imong kinabuhi nga “nagkaminos nga kahadlok ug nagkadako nga pagtuo” (pahina 114).

• Si Presidente Nelson mipaila sa usa ka bag-ong simbolo alang sa Simbahan diha sa pahina 73.

• Si Presidente Nelson mipaila og pamahayag mahitungod sa Pagpahiuli diha sa pahina 91.

• Si Presidente Nelson nangulo sa tibuok kalibutan nga maligdong nga katiguman diha sa pahina 92.

• Si Presidente Nelson mipahibalo og walo ka bag-ong templo diha sa pahina 115.

• Pagkat-on pa og dugang mahitungod sa paagi nga makatabang kita sa uban #HearHim sa HearHim.ChurchofJesusChrist.org.

Mga Imahe dinhi Niini nga Isyu

Among gipaningkamotan sa pagdokumento ang matag kinatibuk-ang komperensya pinaagi sa mga hulagway nga among gimantala. Samtang lahi ang matag komperensya, ang mga imahe niini nga isyu nagpakita sa pipila sa talagsaon nga mga kahimtang nga gipresentar niini nga komperensya.

Agi og dugang sa mga imahe gikan sa sibya, makakita ka og mga litrato gikan sa matahum nga Temple Square (bisan og dili kasarangan nga haw-ang tungod sa COVID-19 ug sa konstruksyon), ingon man usab sa mga painting kabahin sa Pagpahiuli sa ebanghelyo ug sa gisumiter sa mga miyembro nga mga litrato sa ilang kaugalingon nga miapil sa komperensya sa tibuok kalibutan.