Te parau poro’i, te aura’a, ’e te naho’a ta’ata
I roto i te māniania tāmau o te tūpa’ira’a o te pahu nō tō tātou nei ’anotau, e ti’a ia tātou ’ia tāmau i te hi’o i te Mesia i rōpū i tō tātou orara’a, tō tātou fa’aro’o ’e tā tātou tā’inira’a.
Te mau taea’e e te mau tuahine, teie o Sammy Ho Ching, e hitu matahiti, tē māta’ita’i nei i te ’āmuira’a rahi i roto i te ’āfata teata i tōna fare i te ’āva’e ’Ēperēra i ma’iri a’e nei.
’Ia fātata mai te taime nō te pāturu i te Peresideni Russell M. Nelson ’e i te tahi atu mau huimana fa’atere rahi, tē tāpe’a ra o Sammy i tāna mōhina i roto i tōna nā rima. Nō reira ’ua rave ’oia i te ’ohipa maita’i a’e i muri nei.
Te hōro’a mai nei o Sammy i te aura’a ’āpī o te parau nō te mā’itira’a ’e tō ’outou ’āvae.
Mānava ia ’outou i te taera’a mai i teie ’āmuira’a āfa matahiti a Te ’Ēkālesia a Iesu Mesia i te Feiā Mo‘a i te mau Mahana Hope’a Nei. Nō te ’īritira’a i tā’u ’āparaura’a nō ni’a i te aura’a o teie nā rurura’a e piti taime i te matahiti, tē ti’aoro nei au i teie hōho’a nō roto mai i te pāpa’ira’a a Luka i roto i te faufa’a ’āpī :1
« E fātata mai ra Ieriko iāna [Iesu], tē pārahi ra te hō’ē ta’ata matapō i te pae arati’a, tē ani ra i te tao’a :
« … ’Ia fa’aro’o a’era ’oia i taua ti’a’a rahi ra i te haerera’a i nā reira iho, ’ua ui a’era, e aha teie.
« … ’Ua fa’a’ite mai ra rātou iāna ē, o Iesu i Nazareta ra teie e haere nei.
’E ua pi’i hua ihora ’oia ma te parau e, e Iesu te Tamaiti a Davida ra, aroha mai iā’u ».
Nō tō rātou māere i tōna mata’u ’ore, ’ua tāmata a’era te ta’ata e ha’amāmū iāna, « e rahi roa atu ra rā tāna pi’i i reira ». Nō tōna onoono, ’āfa’ihia mai ra ’oia i mua ia Iesu, tei fa’aro’o i tāna tāparura’a tei ī i te fa’aro’o, ’ia fa’aorahia tōna mata, ’e ’ua fa’aora ’oia iāna.2
E putapū fa’auruhia vau nā teie ’ā’amu iti i te mau taime ato’a e tai’o vau i te reira. E nehenehe tā tātou e ’ite i te pe’ape’a rahi o teie ta’ata. Fātata tātou e fa’aro’o roa iāna ’ia tuō nō te ’ume mai te ferurira’a o te Fa’aora. E ’ata’ata ri’i tātou nō tōna pāto’ira’a ’ia māmū—tōna hina’aro pāpū ’ia ha’apūai a’e te tuō ’a parau ai ho’i te mau ta’ata ato’a iāna ’ia ha’amarū. E ’ā’amu au maita’i teie nō te fa’aro’o pāpū. Terā rā, mai te mau pāpa’ira’a mo’a ato’a, rahi atu tō tātou tai’ora’a i te reira, rahi noa atu tē ’itehia ia tātou i roto.
Hō’ē mana’o tei ha’aputapū iā’u ’aita i maoro a’e nei, ’oia ho’i, te mana’o maita’i o teie ta’ata i te fāri’ira’a i te mau ta’ata mana’o maita’i i te pae ’ārua ’ati a’e iāna. Te aura’a tā’āto’a o teie ’ā’amu ’ua niuhia ïa i ni’a iho i te hō’ē tuha’a iti o te mau vahine ’e te mau tāne mātau-ore-hia, ’e ’ia ui mai tō rātou hoa ē, « e aha teie māniania ? » ’ua roa’a ia rātou te ’itera’a ē, o te Mesia te tumu nō taua ’ārepurepura’a ra ; ’o ’oia te aura’a fa’ata’atahia. Tē vai ra hō’ē ha’api’ira’a nō tātou pā’āto’a i roto i teie ’āparaura’a poto. Nō ni’a i te fa’aro’o ’e te ’itera’a pāpū, e tauturu te reira ’ia arata’i i tā ’outou tītorotorora’a i roto i te feiā tē vai ra tō rātou ! « E ti’a ānei i te matapō ’ia arata’i i te matapo ? » Te uira’a ïa a Iesu i te hō’ē taime. « [Mai te mea ē, mai te reira te huru,] e ’ore ānei rāua to’opiti i topa e roto i te ’āpo’o ? »3
Taua ’imira’a ra i te fa’aro’o ’e te ’ite pāpū, o tā tātou ïa ’ōpuara’a i roto i teie mau ’āmuira’a, ’e nā roto i te ’āmuira’a mai ia mātou i teie mahana, e ’ite ’outou ē, nō te mau ta’ata ato’a te reira ’imira’a. ’A hi‘o fa’a’ati ia ’outou. I ni’a i teie tahua tē ’ite nei ’outou i te mau huru fāito ’utuāfare ato’a nō te mau vāhi ato’a mai. Te mau hoa tahito tē ’āpā nei i roto i te rurura’a ’oa’oa, hō’ē pupu hīmene nehenehe e fa’aineine ra, ’e te mau ta’ata pāto’i e tūtuō ra i tā rātou mau fa’ahapara’a auhia. Tē ’imi ra te mau misiōnare tahito i tō rātou mau hoa misiōnare tahito, ’āre’a te mau misiōnare nō fa’aoti noa mai nei, tē ’imi ra ïa rātou i te hoa ’āpī tāmau (tē ta’a ra ïa ’outou e aha tā’u e parau ra !). ’E te mau hōho’a ? E tō te ra’i ē, ’a tauturu mai ia mātou ! Ma te niuniu ’āfa’ifa’i i roto i te rima, e’ita tātou e parau fa’ahou ē, « e misiōnare te mau melo ato’a ! » e parau rā ē, « e ta’ata pata hōho’a te mau melo ato’a ». I rotopū i teie ’ārepurepura’a ’oa’oa, e nehenehe hō’ē ta’ata e ui ma te ti’a ē, « e aha te aura’a o teie mau mea ato’a ? »
Mai tā tātou ’ā’amu nō te Faufa’a ’Āpī, o rātou tei fāri’i fa’ahou i te ’ite, e ’ite rātou i te reira, noa atu te rahira’a o te mau mea e ’itehia ia tātou i roto i te ’āmuira’a, e mea ha’iha’i roa ïa, ’aore rā, e mea faufa’a ’ore, maori rā, e ’ite tātou ia Iesu i rōpū i te reira mau mea ato’a. Nō te fāri’i i te ’ōrama tā tātou e ’imi nei, te ora tā te reira e fafau mai nei, te aura’a tā tātou i ’ite, tītauhia ia tātou ’ia tinai i te māniania—te ’oa’oa mai te reira—’e e rōtahi i tō tātou mana’o i ni’a iāna. Te pure a te mau ta’ata ’ōrero ato’a, te ti’aturira’a o te feiā ato’a e hīmene nei, te fa’atura o te mau manihini ato’a—’ua fa’ata’ahia te reira mau mea ato’a nō te tītau i te Vārua o te ta’ata nāna teie ’Ēkālesia—te Mesia ora, te ’Ārenio a te Atua, te Ari’i nō te Hau.
’Aita rā e tītauhia ia tātou ’ia haere i roto i te hō’ē pū ’āmuira’a nō te ’ite iāna. ’Ia tai’o ana’e te hō’ē tamari’i i te Buka a Moromona nō te taime mātāmua, e fa’ahiahia ’oia i te itoito o Abinadi ’aore rā te haerera’a o nā fa’ehau ’āpī e 2 000, e nehenehe tā tātou e tu’u marū noa atu ē, o Iesu te ta’ata tumu i roto i teie buka nehenehe, ma te ti’a noa mai te hō’ē ti’i rahi i ni’a i te mau ’api ato’a ma te ha’amau i te tū’atira’a i te tahi atu mau ta’ata fa’atupu fa’aro’o.
’Oia ato’a, ’ia ha’api’i ana’e te hō’ē hoa i te ’ite i tō tātou fa’aro’o, e nehenehe ’oia e pāinu ri’i i mua i te tahi mau mea ’e i te tahi mau parau mātaro-’ore-hia o tā tātou ha’apa’ora’a— te mau ’ōpanira’a mā’a, te mau mea ri’i tumu nō te fa’aravaira’a iāna iho, te mau tere pionie ’e te mau tumu rā’au tuatāpapara’a i roto i te rorouira, ’e te rahira’a fare titi i reira vetahi mau ta’ata e mana’o ai, e vāhi ’amura’a ’i’o puatoro paha te reira. Nō reira, ’a ’ite ai ’e ’a fa’aro’o ai tō tātou mau hoa ’āpī i te mau mea ’āpī, e ti’a ia tātou ’ia tauturu ia rātou ’ia ’ite i te aura’a o te mau mea tā rātou e ’ite ra ’e e fa’aro’o ra, te fa’atumura’a faufa’a o te ’evanelia mure ore—te here o te mau Metua i te ao ra, te hōro’a o te tāra’ehara a te hō’ē tamaiti hanahana, te arata’ira’a hau a te vārua Maita’i, te fa’aho’i-fa’ahou-ra’a-hia mai teie mau parau mau ’e hau atu, i te mau mahana hope’a nei.
’Ia haere te hō’ē ta’ata i te hiero mo’a nō te taime mātāmua, e riro ’oia i te māere i teie ’ohipa. Tā tātou ’ohipa, ’o te arara’a ïa ē, eiaha te mau tāpa’o mo’a ’e te mau peu i heheuhia mai, te mau ’ahu ’ōro’a ’e te mau fa’a’itera’a, ’ia fa’ahuru ’ē i te ta’ata, ’ia fa’afāriu rā ia rātou i ni’a i te Fa’aora, ’o ’oia tā tātou e ha’amori nei i reira. Te hiero ’o tōna ïa fare, e fa’ata’a tātou i te hō’ē pārahira’a mātāmua nōna i roto i tō tātou vārua ’e tō tātou ’ā’au—te ha’api’ira’a hanahana a te Mesia ’o tē fa’a’ī i tō tātou tino mai tāna e fa’a’ī i te mau ’ōro’a o te hiero—mai te taime ’a tai’o ai tātou i te pāpa’ira’a i ni’a a’e i te ’ūputa tomora’a ’e tae roa atu i te taime hope’a ’a pārahi ai tātou i roto i te fare. I rotopū i te mau mea nehenehe tā tātou e fārerei, e ti’a ia tātou ia hi’o, na ni’a atu i te mau mea ato’a, i te aura’a o Iesu i roto i te hiero.
’A feruri nā i te mau fa’aotira’a itoito ’e te mau fa’aarara’a ’āpī i roto i te ’Ēkālesia i roto i teie mau ’āva’e i ma’iri a’e nei. ’Ia aupuru tātou i te tahi ’e te tahi, ’aore rā ’ia ha’amaita’i i tā tātou mau ’ohipa i te sābati, ’aore rā ’ia fāri’i tātou i te hō’ē fa’anahora’a ’āpī nā te mau tamari’i ’e te feiā ’āpī, e hahi tātou i te tumu mau o taua mau fa’atanora’a i heheuhia mai, mai te mea ē, e fa’ariro tātou i te reira ’ei mau tuha’a ta’a’’ē te tahi ’e te tahi, ’eiaha rā ’ei tauto’ora’a ’āmui nō te tauturu ia tātou ’ia patu-pāpū-hia i ni’a i te papa o tō tātou fa’aorara’a.4 O terā mau iho ē paha tā te peresideni Russell M. Nelson i hina’aro, ’a ani mai ai ’oia ia tātou ’ia fa’a’ohipa i te i’oa heheuhia mai o te ’Ēkālesia.5 Mai te mea ē, e nehenehe o Iesu—tōna i’oa, tāna parau ha’api’ira’a, tōna hi’ora’a, tōna hanahana—e riro ’ei pū nō tā tātou ha’amorira’a, tē ha’apāpū fa’ahou ra ia tātou i te parau mau i ha’api’ihia na e Alama : « E rave rahi te mau mea e tupu a muri atu ; [terā rā,] o te hō’ē mea e hau roa ïa i te maita’i ïa rātou ato’a—… e ora ai te Fa’aora ’e e tae mai ai i roto i tōna mau ta’ata »6
I te ’anotau o Iosepha Semita i te ’ahuru ma ivara’a o te tenetere, ’ua hā’atihia ’oia i te mau ta’ata keretetiano ’āehuehu i te pae fa’aro’o.7 Terā rā, i roto i taua māniania rahi ra, ’ua ha’apōiri te mau ta’ata poro fa’a’āpī i te Fa’aora mau, tā Iosepha i ’imi ma te tu’utu’u ’ore. ’A ’aro ai ’oia i te mea tāna i pi’i te « pōiri ’e te ’āno’ino’i », 8haere atu ra ’oia i roto i te hō’ē uru rā’au i reira ’oia i te ’itera’a ’e i te fa’aro’ora’a i te hō’ē fa’a’itera’a hau atu i te hanahana i te faufa’a o te Fa’aora i roto i te ’evanelia i tā tātou i fa’ahiti iō nei i teie po’ipo’i. Nā roto i te hō’ē hōro’a fa’ahiahia ’e te mana’o-’ore-hia, ’ua ’ite atu ra Iosepha i roto i te ’ōrama, i tōna Metua i te ao ra, te Atua rahi o te ra’i nui ātea ’e o Iesu Mesia, tāna Tamaiti Fānau Tahi maita’i hope. I reira ’ua fa’a’ite mai ra te Metua i te hi’ora’a o tā tātou i paraparau i teie po’ipo’i : ’Ua fa’atoro atu ra ’oia i ni’a ia Iesu, nā ō a’era, « Tā’u tamā’iti here teie. ’A fa’aro’o iāna ! »9 ’Aita e fa’ahitira’a hau atu i te rahi o te ihota’ata hanahana o Iesu, tōna ti’ara’a mātāmua i roto i te fa’anahora’a o te fa’aorara’a ’e tōna ti’ara’a i mua i te aro o te Atua, e nehenehe e hau atu i teie fa’ahitira’a poto e hitu ta’o.
’Ārepurepura’a ’e ’āno’ino’ira’a ? Naho’a ta’ata ’e te mārōra’a ? E rave rahi o te reira mau mea ato’a i tō tātou nei ao. Inaha, tē aro nei ā te feiā fē’a’a ’e te feiā ha’apa’o i teie ’ōrama ’e i te mau mea ato’a tā’u i paraparau atu i teie mahana. Mai te mea ē, tē fa’aitoito nei ’outou ’ia māramarama atu ā ’e ’ia ’itehia ia ’outou te aura’a i rotopū i te mau mana’o rau, tē fāriu nei au ia ’outou i ni’a i taua Iesu ra, ’e te fa’a’ite pāpū nei au i tō’u ’itera’a ’āpōsetolo i te ’ohipa i tupu i ni’a ia Iosepha Semita, mai tei tupu i te ārea matahiti 1800, ’a ’ite fa’ahou ai te mata o tō tātou hoa matapō i ni’a i te purūmu tahito nō Ieriko ra. Tē fa’a’ite pāpū nei au ē teie nā ta’ata e piti ’e te mau ta’ata e rave rahi i mūta’a ra, te ’itera’a ’e te māniania fa’ahiahia roa a’e i roto i te orara’a nei, ’o te ’itera’a ïa ia Iesu ’eiaha i te haere-noa-ra’a nā reira10 tōna rā haerera’a mai ia tātou nei, ma te tāpe’a i pīha’i iho ia tātou, ’e ’ia ha’amau i tōna fa’aeara’a i pīha’i iho ia tātou.11
E te mau tuahine ’e te mau taea’e, i roto i te māniania tāmau ’e te tūpa’ira’a o te pahu nō tō tātou nei ’anotau, e ti’a ānei ia tātou ’ia tauto’o ’ia hi’o i te Mesia i rōpū i tō tātou orara’a, tō tātou fa’aro’o ’e tā tātou tāvinira’a. Tei reira te aura’a pāpū. ’E mai te mea ē, i te tahi mau mahana, e iti ri’i tā tātou hi’ora’a ’aore rā e paruparu ri’i tō tātou ti’aturi ia tātou, ’aore rā e tāmatahia ’e e tāmāhia tō tātou ti’aturira’a—o te reira mau te ravehia—e nehenehe ānei tātou e pi’i hua, « e te tamaiti a Davida, e Iesu ē, e aroha mai ’oe iā’u ».12 Tē fafau atu nei au ma te pūai ’āpōsetolo ’e ma te ti’aturira’a tohu ē, e fa’aro’o mai ’oia ia ’outou, ’e e parau mai ’oia i teienei ’aore rā a muri a’e, « ’ia ora tō mata : ’A haere, ’ua ora ’oe i tō fa’aro’o ».13 Manava i te ’āmuira’a rahi. I te i’oa o Iesu Mesia, ’āmene.