Tē fa’atumu nei te mau tauira’a o te fa’anahora’a i ni’a i te ha’apūaira’a i te feiā ’āpī

’Ei tuha’a nō te tauto’ora’a e fa’ati’a nei i te feiā ’āpī o te ’Ēkālesia ’ia fa’atupu i tō rātou pūai hanahana, ’ua fa’aara te peresideni Russell M. Nelson i te mau fa’atanora’a i roto i te mau fa’anahora’a a te feiā ’āpī tamāroa ’e te feiā ’āpī tamāhine i roto i te ’āmuira’a rahi nō ’Ātopa 2019 (hi’o ’api 38) ’e ’ua fa’ata’ahia mai te reira nā Elder Quentin L. Cook nō te Tino Ahuru Ma Piti ’āpōsetolo (hi’o ’api 40) ’e te tuahine Bonnie H. Cordon, peresideni rahi nō te feiā ’āpī tamāhine (hi’o ’api 67).

Tē ha’apāpū nei teie mau tauira’a ē, tā te hō’ē ’episekōpo « hōpoi’a mātāmua roa, ’o te ’atu’atura’a ïa i te feiā ’āpī tamāroa ’e te feiā ’āpī tamāhine o tāna pāroita », te parau ïa a peresideni Nelson. I roto i te mau tauira’a, tē vai ra te fa’a’orera’a o te mau peresidenira’a feiā ’āpī tamāroa o te pāroita. Te ’episekōpora’a, te peresidenira’a nō te Autahu’ara’a a Aarona, ’e e tauturuhia rātou e te mau tauturu ha’amāramarama, ’e i roto i te tahi atu mau huru, nā te mau ta’ata ’aravihi. E fa’atae ’āfaro ti’a roa te peresideni o te Feiā ’Āpī Tamāhine o te pāroita i te parau fa’a’ite i te ’episekōpo.

E fa’atumu te mau peresidenira’a pupu autahu’ara’a ’e te mau peresidenira’a piha i ni’a i te ’ohipa nō te fa’aorara’a, ’oia ho’i, te ’ohipa misiōnare, te tāpe’ara’a mai i te feiā fa’afāriuhia, te fa’aitoitora’a i te feiā paruparu, te ’ohipa hiero ’e te ’ā’amu ’utuāfare ’e te ha’api’ira’a i te ’evanelia. Nā te mau peresideni pupu autahu’ara’a ’e te mau peresideni piha o te feiā ’āpī e fa’anaho ’e e arata’i i te mau putuputura’a i te sābati, te mau ’ohipa tōtauturu, ’e te tahi atu mau ’ohipara’a.

E’ita te mau ’ohipara’a a te feiā ’āpī e parau-fa’ahou-hia ē, « Mutual [autahira’a] » e parauhia rā « ’ohipara’a nā te Feiā ’Āpī Tamāhine », « ’ohipara’a nā te pupu Autahu’ara’a a Aarona », ’aore rā, « ’ohipara’a nā feiā ’āpī ». E vāhihia te moni nō te mau fa’a’oa’oara’a a te feiā ’āpī ’ia au i te rahira’a o te feiā ’āpī i roto i te pupu tāta’itahi.

’Ua fa’a’āpīhia te parau tumu a te feiā ’āpī tamāhine, ’e e fa’anahohia te rahira’a o te mau piha a te Feiā ’Āpī Tamāhine ’ia au i te rahira’a ’e i te mau hina’aro o te feiā ’āpī tamāhine. E pi’ihia te mau piha, « Feiā ’Āpī Tamāhine », ’āpe’ehia mai e te mau matahiti o te mau tamāhine i roto i te piha, mai teie te huru, « Feiā ’Āpī Tamāhine 12–14 », ’aore rā, « Feiā ’Āpī Tamāhine » noa, mai te mea ē, e mea ’āmui rātou pā’āto’a. E’ita e fa’a’ohipa-fa’ahou-hia te mau i’oa, « Tepure », « Rōti », ’e « Tārona ».

E pi’ihia te hō’ē melo nō te ’āpo’ora’a teitei ’ei peresideni Feiā ’Āpī Tamāroa nō te titi, ’e e tāvini te peresidenira’a Feiā ’Āpī Tamāroa nō te titi i roto i te tōmite Autahu’ara’a a Aarona---Feiā ’Āpī Tamāhine nō te titi ’e te peresidenira’a Feiā ’Āpī Tamāhine, te melo nō te ’āpo’ora’a teitei e ha’apa’o i te Feiā ’Āpī Tamāhine, ’e te melo nō te ’āpo’ora’a teitei e ha’apa’o i te Paraimere.

Nō te tahi atu mau tauira’a, te Sōtaiete Tauturu, te Feiā ’Āpī Tamāhine, te Feiā ’Āpī Tamāroa, te Paraimere ’e te Ha’api’ira’a Sābati, e parauhia rātou te « mau fa’anahora’a » ’eiaha rā te « mau pupu tauturu », ’e te feiā fa’atere, e parauhia rātou te « mau ti’a fa’atere rahi » i roto i te fa’aterera’a rahi o te ’Ēkālesia, ’e ’ei « ti’a fa’atere titi » ’e ’ei « ti’a fa’atere pāroita » i roto i te fa’aterera’a o te fenua iho.