Sa Unsang Paagi ang Seminary Makapalambo na Karon sa Dali, Sunod Kanako nga Kasinatian sa Inyong Pamilya

Agosto 2019

Sa Unsang Paagi ang Seminary Makapalambo na Karon sa Dali, Sunod Kanako nga Kasinatian sa Inyong Pamilya

Ni Jeffrey Coleman ug Brittany Ann Reece

Ang mga tagsulat mga magtutudlo sa seminary sa Utah, USA.

Mga ginikanan, ania ang paagi kon unsaon nga ang seminary mas makapanindot pa sa pagtuon sa ebanghelyo sa inyong pamilya.

Sa nangagi na, ang mga pamilya mahimong nanglimbasog sa pagpahiangay sa Simbahan, seminary, ug pagtuon sa kasulatan sa pamilya. Ang Bag-ong mga kausaban makatabang sa panaghisgutan sa ebanghelyo nga mahimong mas maayo alang sa tanang sakop sa pamilya.

Niadtong Marso 2019 ang Unang Kapangulohan mipahibalo sa usa ka mahinungdanong kausaban sa seminary. Ang mga klase sa seminary sa tibuok kalibutan nagtuon na karon sa sama nga basahon sa kasulatan nga gitun-an sa mga indibidwal ug mga pamilya diha sa panimalay ug sa simbahan isip kabahin sa Dali, Sunod Kanako. Isip mga magtutudlo sa seminary (ug mga ginikanan), walay sama ang among kahinam mahitungod niini!

Usa ka klaro kaayo nga panalangin mao nga kon giunsa sa pagpasayon ni-ini ang kinabuhi sa mga tin-edyer. Gawas sa eskwelahan, sa paugnat sa kusog, sa trabaho, panahon sa pamilya, ug sa katilingbanon nga kinabuhi, daghang kabatan-onan kaniadto naningkamot sa pagtuon gikan sa tulo ka lain-laing mga basahon sa kasulatan: usa alang sa seminary, usa alang sa Sunday School, ug laing usa alang sa pagtuon sa pamilya. Daghan na kaayo kana.

Sa higayon nga gipahiuyon sa mga lider sa Simbahan ang pagtuon sa pamilya ug sa Sunday School diha sa samang mga kasulatan, ang pagpahiuyon sa seminary ingon usab ka makatarunganon nga desisyon. Nakatugot kini sa mga batan-on nga mas matun-an pa og maayo ang usa ka basahon sa kasulatan. Apan ang pagpasayon mao pa lang ang sinugdanan.

Pagpalig-on sa Panimalay

Si Sister Bonnie H. Cordon, Kinatibuk-ang Presidente sa Young Women, nagtudlo nga kon ang kabatan-onan gihangyo nga mahimong “kabahin sa pagtudlo, nga mahimong kabahin nianang dako nga kalihokan sa panimalay,” sila motabang sa “paglig-on sa panimalay.”¹

Ang Mga kabatan-onan gutom sa kamatuoran ug naghinam-hinam nga mopaambit! Tingali lisud kana nga tuohan kon wala gayuy gana ang usa ka tin-edyer. Isip mga ginikanan ug magtutudlo, naagian nato ang tanan! Isip mga magtutudlo sa seminary, mangutana kami sa mga tin-edyer og mga pangutana sa tanang higayon. Usahay mangutana kami ug walay makuha nga tarong nga tubag tungod lang kay ang atong kabatan-onan walay mga tubag. Apan sa dihang gipahiuyon ang kurikulum sa seminary ug Dali, Sunod Kanako, ang among mga kabataan nga naa sa seminary nga pangidaron sayon ra nga makagamit sa mga butang nga ilang nakat-unan diha sa seminary ngadto sa usa ka panaghisgutan sa ebanghelyo diha sa pamilya ug sa seminary. Amoa na kining nakita sa among mga klase sa seminary.

Ang Pagdala sa Pagtuon sa Kasulatan gikan sa Panimalay ngadto sa Seminary

Sa sinugdanan sa 2019, sa dihang ang bag-ong Dali, Sunod Kanako mao pa lang ang pagsugod, nabati namo ang kahinam sa mga estudyante. Bisan og ang among gitun-an sa seminary gikan sa Doktrina ug mga Pakigsaad, misugod na sila sa pagpaambit sa mga butang nga ilang nakat-unan gikan sa pagtuon sa Bag-ong Tugon uban sa ilang mga pamilya. Naghinam-hinam na kaayo sila mahitungod niini. Sa dihang among natun-an ang Doktrina ug mga Pakigsaad 89 (ang Pulong sa Kaalam) diha sa seminary, mao usab kadto ang samang higayon nga nagtuon kami sa Juan 2 (sa dihang gihimo ni Jesukristo ang tubig ngadto sa bino) diha sa Dali, Sunod Kanako. Ang pagpangita og komon nga mga baruganan ug mga ideya tali sa duha ka mga basahunon mitugot sa mga estudyante sa pagpaambit ngadto sa ilang mga kaedad unsay ilang nakat-unan diha sa panimalay. Dako gayud ang ilang kalambigitan, ug ang panaghisgutan makapadasig tungod kay ang mga estudyante adunay mga butang nga mahisgutan. Nakahimo sila sa paggamit sa mga butang nga ilang nakat-unan sa panimalay ngadto sa unsay among nakat-unan sa seminary.

Imahe

family rowing in the same direction

Pagdala sa Seminary diha sa Panimalay

Sa 2020, ang pagtuon sa Basahon ni Mormon diha sa panimalay, sa seminary, ug sa Sunday School makahatag og mas dakong kahigayunan sa pagpaambit og mas daghan sa unsay ilang makat-unan niadtong mga dapita.

Adunay mga pipila ka mga estratehiya sa pagkat-on nga among gigamit sa seminary nga makatabang sa inyong pagtuon sa kasulatan sa pamilya. Ang pagkahibalo mahitungod niini makatabang ninyo nga makakita og paagi aron ang inyong mga tin-edyer mas moapil diha sa inyong nakasentro sa panimalay nga pagtuon sa kasulatan.

Sa inyong paglingkod isip pamilya, ang inyong mga tin-edyer nakatuon na sa samang mga baruganan gikan sa samang basahon sa kasulatan, ug sila makabaton og mga panglantaw kon sila nakatuon na niadtong mga baruganan diha sa seminary. Dili na sila mobati nga “maulawan” kon kamo mohangyo nila sa pagpaambit tungod kay sa pagkatinuod sila aduna nay mga butang nga ikapaambit. Ang ilang mga kasinatian sa seminary makatabang nila nga makahimo sa paghisgut mahitungod sa ebanghelyo sa panimalay. Ang mga gabii sa pamilya [family home evening] ug pagtuon sa pamilya sa kasulatan mas mahimong usa ka pagpaambit og personal nga mga hunahuna sa usag usa.

Pipila ka mga pangutana nga bukas sa pagtubag [open ended questions] nga mahimo ninyong magamit sa pagdapit sa inyong mga batan-on sa pagpaambit diha sa inyong panimalay mao ang:

Unsa nga espirituhanong kasinatian ang inyong naangkon sa seminary karon?
Unsay nakadasig kanimo og maayo karon?
Unsa nga baruganan ang inyong nakat-unan sa seminary nga sa imong pamati makatabang kanato isip usa ka pamilya?
Unsa nga istorya sa kasulatan ang imong nakat-unan karon nga sa imong pamati imong ikapaambit uban kanamo?
Unsa nga istorya sa kasulatan ang nakaapekto sa imong kinabuhi diha sa seminary?
Sa unsang paagi nadasig ka diha sa seminary aron mas mahimong maayo karon?
Unsay imong nakat-unan mahitungod sa Manluluwas tungod sa unsay imong nakat-unan diha sa seminary?

Mahimong adunay mga panahon nga ang inyong pagtuon sa pamilya mag-una sa unsay gitun-an sa seminary. Niining mga panahona, ang mga pangutana sa ibabaw mahimong ipahiangay sa mga magtutudlo sa seminary aron makuha kon unsay nakat-unan sa mga kabatan-onan diha sa panimalay.

Doktrinal nga Kahanas

Ang pamaagi sa seminary sa pagtuon sa kasulatan dili na kabahin lang sa pagmemorya. Among gitutukan ang doktrinal nga kahanas—nagtabang sa mga estudyante nga makasabut, makagamit, ug makabaton og usa ka pagpamatuod sa doktrina nga gitudlo diha sa mga kasulatan. Mas kabahin kini sa pagpalawom sa pagkakabig ngadto sa tinuod nga doktrina ug pagkahibalo kon unsaon sa pagtudlo niini inubanan sa gahum.

Pananglitan, kon ang usa ka bersikulo nga nagtudlo mahitungod sa Dios nga Kapangulohan, kon amo kanang tun-an nga kasulatan diha sa seminary, mangita kami og laing mga bersikulo nga magtudlo mahitungod sa Dios nga Kapangulohan. Dayon among awhagon ang mga estudyante sa pagtimaan unsay among makat-unan mahitungod sa Dios nga Kapangulohan gikan niadto nga mga bersikulo. Sa katapusan, makamugna kami og mga kahimtang diin idrama-drama sa mga estudyante kon unsaon kaha nila pagpasabut ang atong tinuohan mahitungod sa Dios nga Kapangulohan gamit kadtong mga kasulatan.

Mahimo nimong magamit kini nga pamaagi sa panimalay ug dapita ang inyong mga batan-on sa:

Pagtudlo sa mga baruganan diha sa kasulatan.
Ipaambit ang mga pakisayran ngadto sa laing mga kasulatan mahitungod sa hilisgutan.
Tabangi ang imong pamilya nga mamemorya o mahinumdom kon unsaon sa pagpangita sa mga bersikulo.
Hisguti kon sa unsang paagi nga kining mga pagtulun-an magamit ngadto sa inyong mga kinabuhi.

Pag-andam alang sa Lawom nga Pagkat-on

Adunay dakong pagpasabut diha sa seminary kabahin sa butang nga among gitawag og lawom nga pagkat-on—pagkat-on nga mosangput sa pagkakabig. Usa ka yawe sa lawom nga pagkat-on mao ang pagpalambo sa pagpangandam sa pagkat-on. Ang pagpalambo sa pagpangandam sa estudyante lahi sa kada klase sa seminary, apan usa ka butang nga gipaningkamutan sa klase sa seminary mao ang pagpangandam sa buluhaton [assignment]. Among papaulion ang mga estudyante sa panimalay nga dala ang gimbuhaton nga hut-ong sa kasulatan ug pipila ka mga pangutana sa pagtuon aron sa paghimo nila nga magbasa sa mga kasulatan nga ilang tun-an diha sa klase. Kon ang seminary ug ang Dali, Sunod Kanako nga mga kurikulum mas mapahiangay, ang pag-andam sa mga buluhaton sa seminary mahimo nga mapaambit sa pamilya sa estudyante. Makahatag kini sa mga pamilya og usa pa ka paagi sa dungan nga pagkat-on.

Mahimo nimong dapiton ang imong batan-on sa:

Pagpaambit sa pagpangandam sa mga buluhaton diha sa pamilya.
Human sa leksyon sa seminary, pagpakigbahin unsa pay iyang nakat-unan kabahin sa hilisgutan.

Paghimo og Piho nga mga Tumong

Tingali inyong mamatikdan nga ang Dali, Sunod Kanako nga kurikulum kasagaran nag-awhag kanato sa paghimo og mga tumong. Butang kini nga among gihatagan usab og gibug-aton diha sa seminary. Among gitudloan ang among mga estudyante sa paghimo og piho nga mga tumong, dili lang basta kinatibuk-an nga mga tumong sama sa “Mahimong mas himsog.” Kon ang mga estudyante mohimo og tumong, sila magplano kon kanus-a, asa, ug unsaon nila sa pagkab-ot niana nga tumong.

Pananglitan, kon ang usa ka tin-edyer mohimo og usa ka tumong nga makapalambo og dugang nga pailub, ang sunod nga lakang mao ang pagplano kon unsaon nila sa pagpalambo niini. Sa unsa nga mga paagi o kahimtang nga ilang nabati nga naglisud sila sa pagpailub? Usa ka estudyante mihukom nga mogamit siya og dugang nga pailub kon siya nagmaneho. Sa dihang among gihisgutan kon unsaon niya nga mapraktis ang pagpailub niana nga higayon, nakamugna siya og plano sa pagpaminaw og musika diha sa sakyanan ug magbutang og pahinumdom sa dashboard nga mopahinumdom kaniya sa pag-ampo alang sa pailub sa matag higayon nga siya mosulod sa sakyanan.

Mahimo nimong dapiton ang imong batan-on sa:

Paghisgut mahitungod sa iyang mga tumong.
Pagpaambit kon unsaon ninyo sa paghimo ug pagkab-ot og susama nga mga tumong isip usa ka pamilya.

Lig-una ang Inyong mga Bata aron Malig-on ang Inyong Panimalay

Kamo adunay talagsaong oportunidad sa pagtisok og gamay nga kadasig ngadto sa pagtuon sa kasulatan sa pamilya, ug karon napahiuyon sa kurikulum, makadapit kamo sa mga bata nga nagpangidaron sa seminary sa pagpaambit unsay ilang nakat-unan. Kon sila magtuon sa samang mga kasulatan sa seminary ug uban sa ilang mga pamilya sa Dali, Sunod Kanako, sila mahimong mas makagahum sa pagpalig-on sa ilang mga pamilya gamit ang ilang mga hunahuna sa ebanghelyo.

Kining sunod nga lakang diha sa mga paningkamot sa Simbahan nga mahimong “usa ka Simbahan nga nakasentro sa panimalay, nga giabagan sa unsay gikinahanglan nga mahitabo sulod sa atong mga branch, ward ug mga gambalay sa stake”² makapagahum sa kabatan-onan sa paghimo og mas dakong katungdanan diha sa pagpalig-on sa mga panimalay. Miuyon kami ni Elder Jeffrey R. Holland sa Korum sa Napulog Duha ka mga Apostoles sa dihang siya miingon: “Kami nagtuo nga kini dako kaayo nga kaugmaran niining panahona diin ang atong batan-ong katawhan magkinahanglan gayud og dugang nga kalig-on. Kami nagtuo nga kini usa ka maanindot nga pagpahiuyon aron mahitabo ang koordinasyon sa unsay gibuhat sa Simbahan, ug nagtuo kami nga ang isig kahabig makabenepisyo niini inubanan sa pag-abag sa Simbahan [Church supported]—ug karon among dungagan sa pag-abag sa seminary—nga pagtuon sa ebanghelyo nga nakasentro sa panimalay.”³