Usa ka Pamilya sama sa mga Batan-ong Kasundalohan
Ni Sister Michelle D. Craig
Unang Magtatambag sa Kinatibuk-ang Kapangulohan sa Young Women
“Kamo kinahanglan modala nganha kaninyo sa ngalan ni Kristo, diin mao ang akong ngalan” (3 Nephi 27:5).
Kausa mibisita ko sa usa ka pamilya sa Chile. Ang ilang amahan namatay sa usa ka aksidente usa ka bulan sa wala pa ko moabut. Usa sa mga anak mao ang usa ka batan-ong lalaki nga ginganlan og Benjamin. Siya 10 anyos ang edad.
Sa wala pa ang aksidente sa iyang papa, si Benjamin mihatag sa leksyon sa family home evening. Mahitungod kini sa mga batan-on nga kasundalohan gikan sa Basahon ni Mormon (tan-awa sa Alma 53:16–22; 56:42–57). Naghisgot siya kon unsa ka isug sila ug sa unsa nga paagi sila misalig sa Dios.
Sa dihang ang mama ni Benjamin nakadungog mahitungod sa aksidente, naghunahuna siya sa leksyon ni Benjamin. Gisultihan niya ang iyang pamilya, “Kinahanglan kitang magmaisugon sama sa mga batan-on nga kasundalohan. Kita adunay laing gubat nga atubangon.”
Lisud kadto sa pamilya ni Benjamin. Ingon og ang ilang kinabuhi hingpit nga nausab. Kinahanglan sila mobalhin ngadto sa laing balay aron mopuyo uban sa ilang lola. Ug gimingaw kaayo sila sa ilang papa. Apan sila nasayud nga sila magkahiusa uban kaniya pag-usab sa umaabut. Sila nakahukom nga mahimong usa ka pamilya sama sa mga batan-on nga kasundalohan. Si Benjamin misulti kanamo, “Ako nagmaisugon.”
Naglakaw ko padulong sa ilang balay nga gusto nga mohupay kanila. Apan ako ang mibati nga napanalanginan sa pagbiya. Si Benjamin ug ang iyang pamilya nakig-away niini nga gubat sa maisugong paagi. Ang ilang hugot nga pagtuo nakapadasig kanako.
Kitang tanan mahimong magmaisugon sama ni Benjamin. Ang pagkamaisugon wala magpasabut nga dili gayud maguol o mahadlok. Kini nagpasabut nga magbaton og hugot nga pagtuo nga ang Langitnong Amahan motabang kanato sa malisud nga mga panahon. Kon ang malisud nga mga panahon moabut, kita makapili sa pagsalig Kaniya. Kitang tanan mahimong mga batan-on nga kasundalohan!