Mga Baruganan sa Pagpangalagad

Makatabang Ba Ako sa Usa ka Tawo nga Mag-usab?

Oo. Apan ang inyong tahas tingali lahi kay sa inyong gihunahuna.

Christ with the woman at the well

Buhing Tubig, ni Simon Dewey

Kita gilalang uban sa kapasidad nga mag-usab. Pagtubo ngadto sa atong balaan nga potensyal mao ang katuyoan sa atong mortal nga kasinatian. Usa sa atong katapusang mga tumong sa pagpangalagad mao ang pagtabang sa uban nga moduol ngadto ni Kristo ug paghimo og mga kausaban nga gikinahanglan aron makabalik ngadto sa Iyang presensya. Apan tungod sa ilang kabubut-on, ang atong tahas sa pagtabang kanila nga mahimong mas sama ni Kristo limitado.

Ania ang pito ka gamhanan nga mga leksyon gikan sa Manluluwas kon unsaon nga kita makatabang sa uban sa ilang mga paningkamot nga mag-usab ug mahimong mas sama Kaniya.

1. Ayaw Kahadlok nga Modapit sa Pag-usab

   Christ with the woman taken in adultery

   Ang Babaye nga Hing-abtan nga Nanapaw, ni Harry Anderson

   Ang Manluluwas wala mahadlok sa pagdapit sa uban sa pagbiya sa daan nga mga paagi ug pagdawat sa Iyang mga pagtulun-an. Siya midapit ni Pedro ug ni Santiago sa pagbiya sa ilang mga trabaho ug “himoon ko kamong mangingisdag tawo” (Marcos 1:17). Siya midapit sa babaye nga nasakpan nga nanapaw nga “lumakaw ka ug ayaw na pagpakasala” (Juan 8:11). Siya midapit sa datu nga batan-on sa pagbiya sa iyang kalibutanong mga butang ug mosunod Kaniya (tan-awa sa Marcos 10:17–22). Kita usab mahimong maisugon ug mahigugmaon samtang kita modapit sa uban sa paghimo og mga kausaban ug mosunod sa Manluluwas.

2. Hinumdumi nga Ila ang Pagpili nga Mag-usab

   Ang matang sa kausaban nga gidapit sa Manluluwas dili ikapamugos. Ang Manluluwas mitudlo ug midapit, apan Siya wala mamugos. Ang datu nga batan-on “mipahawa nga masulub-on” (Mateo 19:22). Sa Capernaum, daghan sa iyang mga tinun-an mipili nga “mitalikod,” ug Siya nangutana sa Napulog Duha kon sila mopahilayo ba usab (tan-awa sa Juan 6:66–67). Ang pipila sa mga sumusunod ni Juan Bautista mipili sa pagsunod sa Manluluwas, ang uban wala (tan-awa sa Juan 1:35–37; 10:40–42). Kita makadapit sa uban nga mahimong mas sama Kaniya, apan kita dili makahimo og desisyon sa pag-usab alang kanila. Ug kon sila wala pa mopili nga mag-usab, kita kinahanglan nga dili mohunong—ni kita mobati nga kita napakyas.

3. Pag-ampo alang sa Abilidad sa Uban nga Mag-usab

   Christ praying

   Detalye gikan sa Nag-ampo Ako alang Kanimo, ni Del Parson

   Atol sa Iyang Mapangaliyupoong Pag-ampo, si Jesus mihangyo sa Dios nga ang Iyang mga disipulo mahilayo gikan sa dautan, mahimong mas sama Kaniya ug sa Amahan, ug mapuno sa gugma sa Dios (tan-awa sa Juan 17:11, 21–23, 26). Ug nakahibalo nga si Pedro magkinahanglan og kalig-on sa iyang mga paningkamot nga mouswag sa iyang tahas, ang Manluluwas nag-ampo alang kaniya (tan-awa sa Lucas 22:32). Ang atong mga pag-ampo alang sa uban makahimo og kalainan (tan-awa sa Santiago 5:16).

4. Tudloi Sila nga Mosalig sa Iyang Gahum

   Pinaagi lamang sa Manluluwas nga kita sa tinuod mausab ug motubo ngadto sa balaang potensyal nga ania natong tanan. Siya mao “ang dalan, ug ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi [Kaniya]” (Juan 14:6). Ang Iyang gahum ang “mohimo sa mahuyang nga mga butang nga mahimo nga malig-on” (Ether 12:27). Ang pagtuo sa Iyang maulaon nga gahum nga nakapahimo ni Alma ang Batan-on sa pag-usab (tan-awa sa Alma 36:16–23). Kita makatudlo sa uban sa pagsalig sa Manluluwas aron nga sila usab makabaton sa Iyang makapalimpyo nga gahum.

5. Tagda Sila ingon nga Sila Mahimo

   Ang gugma ug pagdawat mahimong gamhanan nga mga impluwensya sa kausaban. Ang babaye sa atabay nagpuyo sa usa ka tawo kinsa dili iyang bana. Ang mga disipulo ni Jesus “nangahibulong nga babaye ang iyang gipakigsulti” (Juan 4:27), apan si Jesus mas nagtinguha kon unsa ang dangatan sa babaye. Siya mitudlo kaniya ug mihatag kaniya sa oportunidad nga mag-usab, sa iyang gibuhat. (Tan-awa sa Juan 4:4–42.)

   Kon tagdon nato ang uban kon unsa sila kaniadto imbis kon unsa sila sa umaabut, nagpugong kita kanila Hinoon, kita makapasaylo ug makalimot sa miaging mga sayop. Kita makatuo nga ang uban mahimong mag-usab. Kita mahimong mobaliwala sa kahuyang ug pagtudlo sa positibo nga mga hiyas nga wala nila makita sa ilang kaugalingon. ”Kita dunay responsibilidad sa pagtan-aw sa indibidwal dili kon unsa sila karon apan kon unsa sila sa umaabut.”¹

6. Tuguti Sila nga Mag-usab sa Ilang Kaugalingong Higayon

   Ang pag-usab nagkinahanglan og panahon. Kitang tanan kinahanglan nga “mopadayon diha sa pagpailub hangtud [kita] mahingpit” (Doktrina ug mga Pakigsaad 67:13). Si Jesus adunay pailub sa uban ug nagpadayon sa pagtudlo bisan niadtong kinsa misupak kaniya, nagpamatuod sa Iyang tahas nga gihatag Kaniya sa Iyang Amahan ug nagtubag sa ilang mga pangutana (tan-awa sa Mateo 12:1–13; Juan 7:28–29). Kita magpailub sa uban ug moawhag kanila nga magmapailubon sa ilang kaugalingon.

7. Ayaw Paghunong Kon Sila Mobalik sa Ilang Karaang mga Pamaagi

   Christ with Peter

   Detalye gikan sa Gihigugma Mo Ba Ako Labaw Pa Niini? ni David Lindsley

   Human mamatay si Kristo, bisan si Pedro ug ang pipila sa ubang mga Apostoles mibalik sa unsay ilang nasinati na (tan-awa sa Juan 21:3). Si Kristo mipahinumdom ni Pedro nga siya kinahanglan nga “mopakaon sa [Iyang] karnero” (tan-awa sa Juan 21:15–17), ug si Pedro mibalik sa pangalagad. Mahimong sayon kaayo ang pagbalik ngadto sa kanhi nga mga pamaagi. Kita makapadayon sa pagsuporta uban sa malumo nga pag-awhag ug dinasig nga pagdapit sa pagpadayon sa pagsunod sa Manluluwas ug pagpaningkamot nga mas mahisama Kaniya.

Motugot sa Uban nga Motubo

Si Elder Jeffrey R. Holland sa Korum sa Napulog Duha ka mga Apostoles misaysay niini nga istorya mahitungod sa pagtugot sa uban nga motubo: “Ako gisuginlan kausa kabahin sa usa ka batan-on nga lalaki kinsa sa daghang mga katuigan maingon nga siya ang kanunay binuangan sa matag komedya sa iyang eskwelahan. Siya adunay pipila ka mga kahuyang, ug sayon ra siyang sungogon sa iyang mga kaedad. Sa wala madugay siya mibalhin. Sa katapusan siya miapil sa army ug adunay pipila ka mga malampuson nga mga kasinatian didto sa pag-angkon og edukasyon ug sa kinatibuk-an sa pagbuntog sa iyang nangagi. Labaw sa tanan, sama sa kadaghanang gihimo sa mga militar, iyang nadiskobrehan ang kanindot ug kahalangdon sa Simbahan ug nahimong aktibo ug nagmalipayon niini.

“Dayon, human sa pipila ka mga tuig, siya mibalik sa lugar sa iyang pagkabatan-on. Kadaghanan sa iyang henerasyon milambo apan dili ang tanan. Makita gayud, sa iyang pagbalik nga malampuson ug nabag-o, ang sama nga panghunahuna sa una anaa ra gihapon, nagpaabut sa iyang pagbalik. Alang sa mga tawo sa lungsod sa iyang natawhan, siya ra gihapon ang daan nga ‘mao ni mao ni.’ …

“Hinay-hinay ang paningkamot nga sama kang Pablo niining tawhana sa pagbiya niadtong nangagi ug nakaangkon sa ganti nga giandam sa Dios alang kaniya sa hinay-hinay nawala hangtud nga siya namatay nga nagpuyo sa samang paagi sa iyang kabatan-on. … Bati kaayo, makaguol nga siya gipataliwad-an na usab sa grupo … kadtong kinsa nagtuo nga ang iyang nangagi mas maikagon kay sa iyang umaabut. Sila nakahimo sa pagpalayo kaniya ngadto kang Kristo nga unta mikupot kaniya. Ug siya magul-anon nga namatay, hinoon bisan siya sab sad-an og gamay. …

“Tuguti ang mga tawo nga maghinulsol. Tuguti ang mga tawo nga mouswag. Tuohi nga ang mga tawo mausab ug molambo.”²

Mubo nga mga sulat

1. Thomas S. Monson, “Tan-awa ang Uban kon Unsa Sila sa Umaabut,” Liahona, Nob. 2012, 70.

2. Jeffrey R. Holland, “Ang Labing Maayo Moabut Pa,” Liahona, Ene. 2010, 19, 20.

Pagdapit sa Paglihok

Unsa ang inyong mabuhat niining semanaha sa pagdapit ug pagsuporta sa uban sa ilang mga paningkamot nga mag-usab ug mahimong mas mahisama sa Manluluwas?

Ipakigbahin ang Inyong mga Kasinatian

Ipadala namo ang inyong mga kasinatian samtang kamo nangalagad sa uban o gipangalagaran. Adto sa liahona.lds.org ug i-klik ang “Submit an Article or Feedback.”