Digital Lamang
Ang mga Sakripisyo nga Akong Gihimo sa Pagpasakop sa Simbahan
Daghan kaayo akong gibiyaan aron sa pag-apil sa Simbahan, apan nahatagan ko og daghan kaayo agig balus.
Ang tagsulat nagpuyo sa Scotland.
Alang sa mga miyembro sa Ang Simbahan ni Jesukristo sa mga Santos sa Ulahing mga Adlaw, ang pulong sakripisyo dako kaayo og kahulugan. Kon maghunahuna ko kabahin sa sakripisyo, makahunahuna ko ni Jesukristo diha sa Tanaman sa Gethsemane o diha sa ibabaw sa krus didto sa Golgota. Apan ang yano, inadlaw-adlaw nga sakripisyo nahimong usa ka tinuod nga paningkamot alang sa kadaghanan sa mga miyembro sa Simbahan, lakip na sa akong kaugalingon sukad ko nahimong usa ka miyembro.
Natawo ug nagdako ko sa Scotland sa matarung nga mga ginikanan, ug hangtud sa nag-edad nako og 18 nga nakaamgo ko nga adunay mas maayong paagi sa pagpakabuhi. Sa kanunay nasayud ko nga adunay Dios, apan bag-ohay lang nakong nahibaloan nga Siya adunay personal nga koneksyon ngari kanako.
Sa una nakong pagpasakop sa Simbahan, ang akong pamilya uyon ra niini. Apan ang akong mga higala adunay daghang mga katahap. Mihimo sila og mga panukiduki bahin sa Simbahan ug mituo og daghan sa dili tinuod nga impormasyon mahitungod niini. Ilang gitawag ang Simbahan nga kulto, misulti nako nga napuno kini sa bakak ug nga nabuang nako sa pag-apil niini. Apan ako nasayud sa akong kasingkasing nga kini nga Simbahan tinuod. Sa akong paminaw walay bisan unsang butang nga makausab niana. Ug sa dihang akong gisultihan ang akong mga higala nga nasayud ko nga kini tinuod, ang ilang mga komento nahimong mabiay-biayon.
Nianang gabhiuna, nag-ampo ko og tabang alang sa akong mga higala. Dili ko gusto nga mawala sila, apan dili ko gusto nga himoon ko nila og kataw-anan. Human ko nag-ampo, nakahinumdom ko nga dunay tataw nga impresyon nga: “Kon kining mga tawhana maayo nimong mga higala, nan moabag sila kanimo. Dili sila mobugal-bugal kanimo.” Akong gihatagan og pagtagad kana nga impresyon, ug sa dihang walay nahitabo nga kausaban, ako nang gihunong ang pagpakighigala, diin lisud, apan sukad niana nakakaplag ko og talagsaon nga mga higala diha sa Simbahan—mga higala nga moabag kanako, bisan unsa pa man.
Laing sakripisyo nga ako nagiyahan sa espirituhanong paagi mao ang akong trabaho. Sa wala pa ko mipasakop sa Simbahan, nagtrabaho ko sa usa ka imnanan [pub], ug bisan og walay pagtulun-an sa simbahan nga batok niini, dili maayo ang akong gibati niini. Misugod ko sa pagpangita og bag-ong trabaho ug nakakita hinoon dayon sa usa ka kan-anan [restaurant] nga nagdalit og gamay ra kaayo nga ilimnong makahubog ug gidumala sa usa sa labing buotan nga mga pamilya nga akong nahimamat sukad!
Mao nga sa kinatibuk-an, bisan og ang atong pagkamiyembro sa Simbahan mahimong magkinahanglan og sakripisyo, mahimong sa panahon, kaharuhay, o bisan unsa pa, kadto nga mga sakripisyo maayo ra. Ang akong mga sakripisyo mahimong gamay ra kaayo kon itandi sa uban, apan kini malisud gihapon, ug kini nakapalig-on kanako—samtang ang tanan natong mga sakripisyo sa matag adlaw ug ang panahon nga atong gihatag ngadto sa Ginoo mopalig-on ug mopalunsay natong tanan.
Nasayud ko nga mao kini ang tinuod nga Simbahan ni Jesukristo. Nasayud ko nga kita adunay usa ka propeta dinhi sa yuta karon, ug tungod niini nalipay kaayo ko. Mapasalamaton ko sa pagpamatuod nga akong naangkon ug sa pagpadayag nga madawat natong tanan pinaagi sa pagkahimong takus nga mga miyembro sa Simbahan. Nasayud ko nga kon kita maningkamot ug maghigugmaay sa usagusa sama sa gibuhat ni Kristo, tinuod gayud nga kita mapanalanginan. Ako nahigugma niining ebanghelyo—nakapausab kini kon si kinsa ako.
Si Nicky usa ka chef de partie sa usa ka gamayng Scottish nga isla duol lang gyud sa west coast. Malingaw siya nga mag mountain biking, kayaking, ug mangisda. Bugtong siya nga anak ug suod kaayo sa iyang mga ginikanan, bisan kon siya ra ang miyembro sa Simbahan sa iyang pamilya. Nabunyagan siya sa edad nga 18 ug nanghinaut nga makaserbisyo siya og misyon kutob sa iyang mahimo!