Pag-ampo uban ni Filip
Ang tagsulat nagpuyo sa California, USA.
Unsa man ang gipasabut sa “mamulong sa grasya”?
“Pag-ampo sa kanunay” (Doktrina ug mga Pakigsaad 19:38).
Unang higayon kadto ni Josef sa balay nila ni Filip. Nalingaw kaayo sila sa paghimo og karton nga spaceship. Gikoloran pa gani nila kini og talagsaon nga mga kalayo. Sa dihang gitawag sila sa mama ni Filip nga manihapon na, misunod si Josef kang Filip ngadto sa kusina.
“Ako ang mamulong sa grasya,” miingon ang papa ni Filip.
Unsay gipasabut niana? Naghunahuna si Josef. Gitan-aw niya si Filip ug ang iyang pamilya samtang gihikap nila ang ilang agtang, dayon ang tunga-tunga sa ilang dughan, unya ang sa wala nga bahin, dayon sa tuo. Wala pa makakita si Josef ni bisan kinsa nga mibuhat niana sukad.
Gitunol ni Filip ang iyang kamot. Mitan-aw sa palibut si Josef ug nakita ang tibuok pamilya ni Filip nga naggunitay sa kamot ug nagduko sa ilang mga ulo. Mag-ampo na ba sila? Mao ba kana ang gipasabut sa “mamulong sa grasya”? naghunahuna si Josef.
Dili gusto ni Josef nga malain si Filip, busa iyang gigunitan ang kamot ni Filip. Ang papa ni Filip migunit sa pikas kamot ni Josef ug dayon misugod sa pag-ampo.
“Panalangini kami, O Ginoo …”
Sa wala pa sila nanglingkod, gihikap ni Filip ug sa iyang pamilya ang ilang mga agtang ug mga dughan sama sa ilang gibuhat sa sayo pa.
Sa dihang nauli na sa balay si Josef, nangutana si Mama kabahin sa iyang adlaw.
“Nalingaw ka?” Nangutana si Mama.
“Oo,” hinay nga misulti si Josef. Siya nalingaw gayud pag-ayo. Nindot kaayo ang spaceship, ug lami kaayo ang mga hamburger. Apan dunay nakapahasol kaniya.
Gitan-aw siya pag-ayo ni Mama. “Dili man ka OK paminawon. Naa kay problema?”
“A …”
Daghan kaayo og pangutana si Josef! Nagsige siya og paghunahuna mahitungod niadto nga pag-ampo. Nganong lahi man kadto sa pag-ampo niya ug sa iyang pamilya?
“Ma,” nangutana siya, “giunsa man nimo pag-ampo sa wala pa ka magpasakop sa Simbahan?” Misulti si Josef kaniya mahitungod sa pag-ampo sa pamilya ni Filip.
“Morag Katoliko sila, sama nako kaniadto,” miingon si Mama. “Gihimo nila ang timaan sa krus pinaagi sa ilang mga kamot. Dili ba mora man kadto og krus? Usa kadto ka pahinumdom nga si Jesus namatay alang kanato.”
Mipahiyom si Josef. “Busa si Filip mituo usab kang Jesus?”
“Sakto kana,” miingon si Mama. “Nakahinumdom ka unsay gisulti sa papa ni Filip diha sa pag-ampo?”
Gihunahuna pa kini ni Josef. “Gipasalamatan niya ang Dios alang sa mga gasa nga Iyang gihatag kanato … ug naghisgot siya mahitungod kang Kristo!”
“Tan-awa?” Misulti si Mama nga nagpahiyom. “Dili kaayo kita lahi. Nalipay ko nga nakahimo ka sa pag-ampo uban sa pamilya ni Filip.”
Paglabay sa pipila ka adlaw, mibisita si Filip aron makigdula. Nagdula sila sa gawas sa dihang gitawag sila ni Papa aron manihapon. Nagdaguok ang tiyan ni Josef samtang nanagan sila ngadto sa kusina.
“Gutom na kaayo ko!” miingon si Josef.
“Ako pud,” miingon si Filip.
Nanglingkod ang tanan libut sa lamesa. Milingkod si Filip tupad ni Josef. Nangurus si Filip ug mikuha sa kamot ni Josef.
“Ingon ani kami mag-ampo sa among balay,” miingon si Josef. “Among ikyugpos ang among mga bukton, ipiyong ang among mga mata, iduko ang among mga ulo, ug mag-ampo.”
“Ingon niana?”
“Ingon niana.”
“Sayon ra,” miingon si Filip.
Gipiyong ni Josef ang iyang mga mata ug mipahiyom. Nalipay siya nga nakahimo siya sa pag-ampo uban sa iyang higala.
Aduna akoy mga higala sa eskwelahan kinsa mga Katoliko ug Muslim, ug suod kaayo kami nga mga higala tungod kay mao kana ang paagi nga gusto ni Jesus nga motagad kami sa usag usa.
Elizibeth A., edad 8, West Midlands, England