Si Mara ang Pioneer
Ang tagsulat nagpuyo sa Texas, USA.
Oktubre 2018, Phnom Penh, Cambodia
Gibutunisan ni Mara ang iyang sayal ug mitan-aw sa samin. Kiwaw pamation nga magsul-ob og sinina pangsimba sa Sabado, apan espesyal kini nga Sabado. Kinatibuk-ang komperensya kadto!
“Naghinam-hinam ka ba alang sa sesyon sa kababayen-an?” Nangutana si Mak (Mama). Gisudlay niya ang buhok ni Mara sa paspas, malumo nga mga lihok. “Gusto nako nga maningkamot ka nga maminaw og maayo kutob sa imong mahimo.”
“Oo! Hinaut nga mosulti sila og mga istorya sa pioneer!” Mao kadto ang labing ganahan ni Mara.
“Tingali,” miingon si Mak. “Nakahibalo ba ka nga ang imong papa usa ka pioneer?”
Naglibug si Mara. Ang iyang papa wala gayud makabira og kariton.
“Giunsa man niya pagka-pioneer?” nangutana siya.
Miyango si Mak padulong sa bintana, padulong sa sapa. “Nangisda siya didto sa dihang nahimamat niya ang mga misyonaryo. Siya ang una sa iyang pamilya nga nagpabunyag,” miingon si Mak. “Nakahimo kana niya nga usa ka pioneer! “Karon ato nang pangitaon ang imong Lola.”
Si Yiay (Lola) naghulat kanila sa atubangang lawak. Ang pamilya ni Mara ug ang iyang mga apohan nag-ipon sa pagpuyo. Mitabang si Yiay sa pag-atiman kang Mara human sa klase samtang nagtrabaho ang iyang mga ginikanan. Karon si Yiay nagbarug duol sa moped (motor nga anaa say tindakanan nga sama sa besikleta), ang dakong de-motor nga scooter nga gisakyan nila libut sa siyudad.
“Ang Simbahan 25 pa lang ka tuig sa Cambodia,” misulti si Mak kang Mara samtang iyang giablihan ang pultahan ug giduso ang moped ngadto sa karsada. “Busa kitang tanan mga pioneer. Bisan ikaw!”
“Giunsa man nako pagka-pioneer?” Naghunahuna si Mara samtang misakay siya sa moped. Midrayb si Mak sa moped, nga si Yiay naa sa luyo ug si Mara sa tunga-tunga. Nanggunit og maayo si Mara samtang mibiyahe sila sa naghuot nga dalan.
Sa paglabay nila sa usa ka café, ang baho sa tsa napadpad ngadto kanila. Hapit tanan dinhi moinom og tsa. Apan dili si Mara. Misunod siya sa Pulong sa Kaalam. Mingisi si Mara. Usa kana ka paagi nga siya usa ka pioneer!
Samtang ang moped miliko sa usa ka eskina, nakakita si Mara og wat, usa ka Buddhist nga templo. Ang pula nga talinison nga atop makita ibabaw sa ubang mga gambalay [building]. Ang mga mongha nga upaw og mga ulo ug nagsul-ob og orange nga mga kupo naglingkod nga nagtuon diha sa nataran.
Nasayud si Mara nga kadaghanan sa mga tawo sa Cambodia mga Buddhist. Dili sila motuo kang Jesukristo. Apan mituo si Mara. “Laing paagi kana nga usa ako ka pioneer,” naghunahuna si Mara. Ug karon makahimo siya sa pagpaminaw sa propeta!
Samtang misulod ang moped sa parkinganan sa simbahan, nakakita si Mara og daghang mga babaye nga nangabut. Ang uban nanglakaw o misakay og mga moped. Ang uban miabut sakay sa mga tuk tuk, gagmay nga mga karomata nga giguyod og motorsiklo. Daghan sa mga babaye nagsul-ob og mga sinina o yano nga mga sayal, sama sa gibuhat ni Mara. Ug ang uban nagsul-ob og mga sampot, nindot nga tag-as nga mga sayal nga hinimo sa mabulukon gidibuhoan nga mga panapton.
Si Mara, Mak, ug Yiay milingkod sa chapel kauban sa ubang mga babaye. Ang komperensya nahitabo na usa ka semana ang milabay sa Siyudad sa Salt Lake, Utah, USA. Apan karon ang mga tawo sa Cambodia makatan-aw og sibya sa Khmer nga pinulongan. Si Mara makasulti og Iningles ug Khmer sa panimalay, ug nakakat-on usab siya og French sa eskwelahan. Apan daghang mga taga-Cambodia ang makasulti lamang og Khmer.
Ang unang mamumulong wala mosulti og bisan unsang istorya mahitungod sa mga pioneer. Apan ang ikaduhang mamumulong misugilon mahitungod sa paglakaw sa tungason dili sementadong agianan sa iyang pagpauli gikan sa eskwelahan. Gitawag kini og “dalan sa mga lalaki,” ug usahay huboon niya ang iyang sapatos ug molakaw nga magtiniil. Gusto niyang mohimo og lisud nga mga butang aron mahimo siyang sama sa usa ka pioneer! Mipahiyum si Mara samtang naghunahuna siya sa tanang paagi nga siya usa ka pioneer.
Ang katapusang mamumulong mao ang propeta. Taas siya nga nagbarug. Naminaw og maayo si Mara. “Dapiton ko kamo sa pagbasa sa Basahon ni Mormon sugod karon hangtud sa katapusan sa tuig,” miingon siya. “Ang kalangitan maabli alang kaninyo. Ang Ginoo mopanalangin kaninyo.”
Nasayud si Mara nga dili sayon ang pagbasa sa tibuok Basahon ni Mormon. Nitan-aw siya sa mga babaye sa iyang palibut. Ang tanan kanila mipili sa pagsunod kang Jesukristo. Ang tanan kanila mianhi karong gabhiona aron maminaw sa propeta. Mosunod siya sa propeta, sama kanila. Mamahimo siyang usa ka pioneer!