Unsaon Nato sa Pagpaluyo sa Atong mga Lider?
Sa makaguol nga mga adlaw human ang usa ka sunog milaglag sa tibuok nga mga kasilinganan sa Distrito sa Sonoma sa California niadtong Oktubre 2017, si Elder Ronald A. Rasband sa Korum sa Napulog Duha ka mga Apostoles mibiyahe ngadto sa apektado nga mga komunidad aron makig-uban sa mga Santos sa Ulahing mga Adlaw.
Anaa siya sa usa ka misyon sa pagpangalagad. Siya ug si Sister Melanie Rasband mihupay sa mga miyembro nga nag-antus tungod sa sunog diha sa ilang mga meetinghouse ug sa mga kilid sa ilang naugdaw nga mga balay.
Ug bisan asa siya moadto, ang mga miyembro miduol aron sa paglamano sa iyang kamot. Usa kadto ka pagpakita sa pasalamat. Mipasalamat sila sa Apostol tungod sa iyang suporta. Apan ang matag paglamano mipahayag og usa ka komon nga sentimento: “Gipaluyohan ko ikaw.”
Usa ka Buhat sa Pagtuo
Ang pagpaluyo usa ka sagradong buhat nga nagkonektar sa mga miyembro sa Simbahan ngadto sa mga lider sa Simbahan, miingon si Elder Gary E. Stevenson. Tungod sa sobra sa 16 ka milyon ka mga miyembro sa Ang Simbahan ni Jesukristo sa mga Santos sa Ulahing mga Adlaw, medyo gamay ra nga mga miyembro sa Simbahan ang makahimo sa pagpakig-istorya sa Apostol nga mag-atubangay o makalamano sa kamot sa usa ka Apostol. Apan ang matag miyembro adunay oportunidad sa paghimo og personal nga koneksyon ngadto niini ug sa ubang mga lider sa Simbahan pinaagi sa iyang pormal nga boto sa pagpaluyo ug sa inadlaw-adlaw nga mga buhat sa pagpaluyo, miingon si Presidente M. Russell Ballard, Akting nga Presidente sa Korum sa Napulog Duha.
“Mopaluyo kita pinaagi sa pag-isa sa atong mga kamot apan usab pinaagi sa atong mga kasingkasing ug mga buhat,” miingon si Elder Gerrit W. Gong. “Atong paluyohan ang mga lider sa Simbahan sa samang paagi nga kita mopaluyo sa usag usa. Nasayud kita nga obligado kita tungod sa pakigsaad.”
Ang pag-ampo alang sa mga Apostoles nagpabilin nga usa ka bililhong bahin sa pagpaluyo, miingon si Elder Ulisses Soares. “Regular kami nga mga tawo, ug ang Ginoo mitawag kanamo sa usa ka butang nga dili namo mahimo kon kami ra. Apan gibati namo nga mabuhat namo kana nga mga tahas tungod kay ang katawhan nag-ampo alang kanamo.”
Ang pagtuo mag-una ug magsunod sa pagpaluyo, midugang si Elder Soares. “Pinaagi sa pagpaluyo sa mga Apostoles, nagtabang kamo sa Manluluwas sa pagtuman sa Iyang buhat. Ang inyong pagtuo motabang sa Ginoo nga matuman ang unsay Iyang gisulti pinaagi sa Iyang mga propeta ug mga tigpadayag.”
“Ganahan ko sa simbolismo sa pag-isa sa mga kamot nga pinaeskwala ug sa kahulugan luyo niana,” miingon si Elder Jeffrey R. Holland. Alang sa mga Apostoles, ang paluyohan sa mga miyembro sa Simbahan susama sa espirituhanong paagi sa pagkadawat og makahatag og kinabuhi nga pagkaon, midugang siya. “Ang opinyon sa matag tawo importante ug ang matag tawo nga nagtinguha nga moserbisyo tugutan. Walay usa nga moserbisyo sa Simbahan nga mag-inusara, bisan unsa pa ang atong balaanong tawag [calling].”
Usa ka Naandang Buhat
Ang pagpaluyo sa mga Apostoles maoy usa ka buhat sa ulahing mga adlaw nga gisugdan sa Pagpahiuli sa ebanghelyo ni Jesukristo. Gikan sa unang adlaw sa Simbahan, ang unang mga Santos gidapit sa pag-uyon sa pagtawag sa mga lider sa Simbahan ug sa pagpaluyo kanila niana nga tawag.
Niadtong Abril 6, 1830, si Joseph Smith ug ang iyang bag-ong nabunyagan nga mga sumusunod nanagpundok sa usa ka gamayng troso nga balay sa umahan nga gipanag-iya ni Peter Whitmer, Sr., sa Fayette, Distrito sa Seneca, New York.
Si Joseph mibarug ug nangutana niadtong nangapil kon nagtinguha ba sila sa pag-organisar sa Ang Simbahan ni Jesukristo sa mga Santos sa Ulahing mga Adlaw.
Migamit sa baruganan nga pag-uyon sa kadaghanan [common consent], ang bag-ong mga miyembro miisa sa ilang mga kamot ug miuyon pinaagi sa nagkahiusa nga pagboto. Sunod miuyon sila nga modawat ni Joseph Smith ug Oliver Cowdery isip ilang mga magtutudlo ug espiritwal nga mga tigtambag.
“Ang pagkamiyembro sa Simbahan usa ka personal kaayo nga butang,” miingon si Elder Holland. “Ang matag indibidwal importante. Mao kana nganong naglihok kita sumala sa baruganan nga pag-uyon sa kadaghanan. Gusto nato nga ang tanan adunay opinyon, sa pagpahayag sa iyang kaugalingon, ug nga maghiusa sa pagpadayon.”
Usa ka Buhat Nga Mobayaw Kanatong Tanan
Sa pagdawat sa tawag sa pagka-apostol, ang mga sakop sa Korum sa Napulog Duha ka mga Apostoles “nahimong obligado” sa pagsunod sa kabubut-on sa Ginoo, miingon si Elder Dale G. Renlund. Pinaagi sa pagpili nga mopaluyo sa Napulog Duha, ang mga miyembro mipakita sa ilang pagsalig diha sa panumpa sa pagkamasulundon sa matag Apostol ngadto sa Manluluwas.
Ang mga Santos sa Ulahing mga Adlaw kinsa mihatag sa ilang pagpaluyo nga boto ngadto sa usa ka indibidwal nga Apostol sa samang higayon mipaluyo usab sa gihiusang Korum, miingon si Elder Quentin L. Cook.
Kana nga sagradong boto mosuporta ug mopanalangin sa mga Apostoles—apan mosuporta usab kini sa mga tigpaluyo, midugang si Elder Cook. “Molig-on kini kanila ug mopanalangin kanila ug mohatag kanila og giya.”
Nagpasabut kini nga sama nga ang mga miyembro nga grabeng naapektuhan sa sunog sa Santa Rosa mitanyag og mapaluyuhong suporta kang Elder Rasband, ang mga miyembro sa tibuok kalibutan masuportahan samtang ilang suportahan ang matag sakop sa Napulog Duha.