“Tinuod Kini, Tinuod Kini”
Ang tagsulat nagpuyo sa Democratic Republic sa Congo.
Sa dihang nag-ampo ko aron makaangkon og pagpamatuod sa Basahon ni Mormon, walay nahitabo—hangtud nagsugod ko sa pagbasa sa Biblia.
Sa dihang nag-edad ko og mga 12 anyos gusto kong masayud sa akong kaugalingon nga ang Basahon ni Mormon tinuod. Sa usa ka pakigpulong, makapamatuod ko nga ang Basahon ni Mormon mao ang pulong sa Dios tungod kay ang akong magtutudlo sa Primary miingon niini. Apan sa akong kaugalingon, wala ko makasabut unsay gipasabut niana.
Nasayud ko sa saad ni Moroni nga nagsulti nga kon ako mobasa, mamalandong, ug mag-ampo, makahibalo usab ako (tan-awa sa Moroni 10:3–4). Nagbasa ko sulod sa daghang semana ug mibati og kalinaw, apan wala kini makahatag og bisan unsa nga makapaukyab—walay kahayag, walay mga anghel, walay tingog. Sa katapusan, mihunong ko sa pagbasa sa Basahon ni Mormon.
Usa ka adlaw samtang nagtuon ko sa Exodo, nabasa nako nga kon ang mga Israelite makulangan og pagkaon, ang Dios mopadala og mana ngadto kanila. Ang matag tawo mokuha og igo nga gidaghanon matag adlaw. Mipadala Siya kanila og pagkaon, apan sila maghunahuna unsaon sa pagkuha niini.
Nahunahunaan nako ang mga pulong ni Nephi: “Ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Gikan niini nakasabut ko nga ang Dios misugo sa mga Israelite sa pagbiya sa Ehipto ug nagplano sa pagsangkap sa ilang kagutom. Kining kasulatan sa Basahon ni Mormon mihatag og kahayag sa akong panabut sa Biblia, ug ako makasulti nga ang Basahon ni Mormon mao ang pulong sa Dios.
Sama sa gipasabut ni Elder David A. Bednar sa Korum sa Napulog Duha ka mga Apostoles, ang personal nga pagpadayag sama sa inanay nga pagsaka sa adlaw kay sa kahayag nga kalit lang mosiga kon atong tuplukon ang switch.1 Ako misugod sa pagkakita sa Basahon ni Mormon sa lahi nga paagi.
Sa mga bulan nga misunod, mas sigurado ko nga nasayud nga ang Basahon ni Mormon sukad mao ang pulong sa Dios. Ang impresyon nga akong gibati sa makadaghan nga higayon pinaagi sa tingog sa Espiritu mao nga “Kini tinuod, kini tinuod, kini tinuod.”
Nagbasa gihapon ko sa Basahon ni Mormon hapit kada adlaw, ug matag higayon, ako makadungog niini nga mga pulong: “Kini tinuod.”