Pagtinguha og Mas Dako nga Pagsabut

Imahe

Salt Lake Temple filling up buckets illustration

Paghulagway pinaagi ni Toni Demuro

Usa niana ka panahon nakipag-date ako sa unang higayon sa usa ka babaye sa akong ward. Pagkasunod buntag kami rang duha ang miapil sa among temple trip sa ward. Mitanyag mi sa pagtabang sa bisan unsa nga mga ordinansa nga nagkinahanglan og mga patron … nga mao diay ang mga pagbugkos.

Gikulbaan kaayo ko, apan sa akong kasurprisa, ang paghimo og puli [vicarious] nga mga pagbugkos uban sa usa ka babaye nga walay 12 ka oras human sa among unang pakig-date dili kaayo salikwaut kay sa akong pagtuo. Kon bisan unsa, kana nga kasinatian nakahatag nako og dugang nga panglantaw kon unsa ka importante ang matag aspeto sa buhat sa templo—lakip sa mga pagbugkos (basaha pa sa akong digital nga artikulo).

Ang atong mga sitwasyon talagsaon, apan kon kita maningkamot nga mas makasabut sa mga pakigsaad nga atong gihimo sa templo, kadto nga mga ordinansa maoy mga butang nga dili nato kuhaon gikan sa atong lista sa espirituhanong butang ug mas gikinahanglan kaayo nga mga tinubdan sa “buhi nga tubig” nga makahatag nato og espirituhanong kalig-on (tan-awa sa Doktrina ug mga Pakigsaad 63:23). Ug sa gubot nga kalibutan nga atong gipuy-an, nagkinahanglan kita sa tanang kusog nga atong gikinahanglan!

Niini nga isyu, ang mga young adult mopakigbahin sa ilang mga kasinatian sa templo. Si Kealohilani mopakigbahin kon sa unsang paagi nga ang matinud-anong pagsul-ob sa garment sa templo nakapanalangin sa iyang kinabuhi (tan-awa sa pahina 44). Sa digital lamang nga artikulo, si Zariah mipakigbahin sa iyang mga kahadlok mahitungod sa pagbati og nga dili kaayo angayan nga mosulod sa templo. Kon ikaw nangandam usab sa pagsulod sa templo sa unang higayon, among gitigum ang P&T nga makatabang (sa online lamang). Ug si Mahesh naghisgot nga siya mibalik ngadto sa templo aron mas makasabut sa mga pakigsaad nga iyang gihimo didto (tan-awa sa pahina 48).

Samtang ako maningkamot nga moadto sa templo kutob sa akong mahimo sa pagpuno sa akong espirituhanong sudlanan, unsay importante mao nga ako nagtugot sa Espiritu sa pagtudlo nako ug mousab nako sa sulod ug sa gawas sa mga bong-bong niini. Dayon ang “buhing mga tubig” nga nagagikan sa templo ug pinaagi sa akong mga pakigsaad makatabang sa pagtagbaw sa akong kauhaw kada adlaw.

Salamat!

Alex Hugie

Labing Maayo nga Tambag …

Ang mga young adult nagpakigbahin sa labing maayong tambag nga ilang nadawat mahitungod sa paghimo sa templo nga kabahin sa inyong kinabuhi.

“Ang akong bishop misulti nako nga ang templo mahimong sagrado nga kasinatian nga maoy gusto nakong mahitabo. Anaa ra gayud nako ang paghukom unsay dako nga epekto sa templo sa akong kinabuhi.”

—Jasmyn Nye, Utah, USA

“Ang pagbaton og templo sa duol nindot kaayo, apan kon ang mga miyembro dili gayud moadto sa templo, nan kini layo gayud kaayo kanunay. Kinahanglan gayud kita magpaduol sa templo, bisan unsa pa kini ka layo.”

—Cole Murphy, California, USA

“Paghimo og katuyoan. Adto uban sa usa ka pangutana, trabahoa ang usa ka katigulangan, pangita og kalinaw, o paminaw sa mga pag-aghat.”

—Sydney Orton, Utah, USA

Unsa ang labing maayong tambag ang imong nadawat mahitungod sa paghimo og mga sayop ug pagpaningkamot pag-usab? Ipadala ang inyong tubag sa liahona.lds.org inig Marso 31, 2019.