Hello gikan sa Italy!
Ako si Margo. Ug ako si Paolo. Nagbiyahe mi sa tibuok kalibutan aron makakat-on mahitungod sa mga anak sa Dios. Apil namo sa among pagbisita sa Italya!
Ang Italy anaa sa habagatan sa Europe. Sa mapa, mora kini og usa ka botas! Sobra sa 60 ka milyon ka tawo ang nagpuyo didto.
Kahibalo ba kamo unsaon sa pagsulti ang “Ako anak sa Dios” sa Italian? Sono un figlio di Dio. Kining batang babaye nagbasa sa Basahon ni Mormon sa Italian.
Daghang mga bata sa Italy mopauli gikan sa eskwelahan aron mokaon uban sa ilang mga pamilya atol sa pausa pranzo—tingpaniudto. Sila mokaon og pasta o humay ug karne ug mga utanon.
Sa dili pa ang panihapon, daghang mga pamilya nga Italian ganahan nga maglakaw-lakaw, o passeggiata. Magsul-ob sila og nindot nga mga sinina ug maglakaw-lakaw libut sa plaza. Tingali mohunong sila og mokaon og gelato—Italian nga ice cream. Mmmm!
Kadaghanan sa Italian nga mga tawo mga Katoliko. Samtang ang pipila sa ilang mga pagtuo lahi sa atoa, nagtuo sila sa Langitnong Amahan, ni Jesukristo, ug sa Espiritu Santo.
Karong bulana, usa ka templo ablihan didto sa Roma! Gipahibalo kini niadtong Oktubre 2008 nga kinatibuk-ang komperensya. Mao kini ang unang templo sa Italy.
“Ako nasayud nga si Jesus buhi ug nga Siya naggiya sa mga propeta. Importante kaayo nga moadto sa simbahan aron nga kita makat-on og dugang mahitungod ni Jesus. Nagsugod ko sa pagbasa sa Basahon ni Mormon kada adlaw tungod kay gusto ko nga makahibalo og dugang mga butang mahitungod sa ebanghelyo.”
Lorenzo B., edad 7, Piedmont, Italy
“Kon anaa duol sa templo, maghunahuna ko mahitungod ni Jesus ug ako mobati nga nadasig. Sa katapusan dili na kami modrayb og 12 ka oras aron makaadto sa templo. Karon ako makahimo sa pag-adto sa templo sa 50 minutos lamang! Kon ako mag-edad na og 12, makahimo na ako sa pag-adto ug maghimo og mga bunyag diha sa templo.”
Olivia G., edad 8, Lazio, Italy
Salamat sa pagsuhid sa Italy kuyog namo. Magkita ta sa sunod! Ciao!