Sa Digital Lamang

5 ka Rason nga ang mga Dalaga o Ulitawo [Single] Kinahanglang Moapil sa mga Pagbugkos [Sealing] diha sa Templo

Alex Hugie

Mga Magasin sa Simbahan

Sa unsa nga paagi kita makabenepisyo gikan sa pag-apil sa mga pagbugkos bisan dalag o ulitawo pa kita!

Sa dihang ang mga propeta miawhag nato sa pagpahigayon sa mga ordinansa sa templo alang sa atong mga katigulangan, kini naglakip sa tanan nga gikinahanglan nga mga ordinansa sa kaluwasan. Hinoon, ang pipila ka young single adult maglikay sa mga pagbugkos, nagtuo nga kini importante lamang niadtong kinsa minyo. Apan kana dili tinuod! Adunay mga panalangin nga talagsaon sa ordinansa sa pagbugkos nga makatabang kanato karon kon kita moapil.

Daghang single adult magtuo nga ang pagpahigayon og proxy nga mga pagbugkos nga wala ang kapikas salikwaut. Apan sa kadaghanang mga ordinansa, ang atong kasinatian nagdepende sa atong pagpangandam. Kon isipon nato ang sesyon sa pagbugkos nga usa ka oportunidad sa pagkat-on, sa pagtabang sa pagtubos sa mga patay, ug mobati sa Espiritu, nan dili kita mabalaka sa marital status.

Ania ang lima lamang ka rason ngano nga kita mga single malingaw sa mga pagbugkos.

1. Makasabut ug makapasalamat sa kaimportante sa ordinansa sa pagbugkos.

   Mahimong dili kita minyo, apan kana wala magpasabut nga kita dili andam sa pagpanalangin sa mas dako nga pagsabut sa mahangturong pakigsaad sa kaminyoon. Gani, ang sundanan sa ebanghelyo alang sa atong tanan nga mga pakigsaad mao ang pagtuon mahitungod niini sa dili pa kita mohimo niini. Walay laing dapit gawas sa templo nga madungog nato ang gamhanan nga mga pulong sa ordinansa sa pagbugkos, nga adunay daghang mahinungdanong panudlo ug celestial nga mga saad. Makakat-on kita og mas daghan mahitungod “sa bag-o ug walay katapusan nga pakigsaad” (Doktrina ug mga Pakigsaad 132:19) gikan sa mga kasulatan, mga lider sa Simbahan, ug sa ubang mga materyal sa Simbahan. Apan kon kita adunay oportunidad, ang aktwal nga pag-apil sa mga pagbugkos alang sa atong mga katigulangan makatabang nato nga makasugod sa pagsabut sa kompleto, mahimayaong mga implikasyon sa mga ordinansa alang sa atong mga umaabut.

2. Ang proxy nga mga pagbugkos makatabang nga makaandam kita nga mahimong mas maayong mga kapikas.

   Bisan og ang atong kaugalingong pagbugkos hapit na o dugay pa, mas makaandam kita alang sa mahangturong kaminyoon pinaagi sa pagpalawom sa atong pagsabut niining madaugon nga ordinansa. Usa sa labing maayong mga paagi nga kita makapamilyar niadto nga mga pakigsaad nga atong himoon “alang karon ug alang sa tanan nga kahangturan” (Doktrina ug mga Pakigsaad 132:7) mao ang pagsaksi niini nga gihimo diha sa templo. Kita makapaminaw sa mga saad nga atong himoon ngadto sa atong kapikas ug ngadto sa Ginoo nga kon kita kaslon na, makahibalo kita unsay gipaabut gikan nato ug makaandam sa pagtuman niadto nga mga gipaabut. Kon kita matinud-anon, dili ihikaw kanato ang bisan unsa nga gisaad nga panalangin sa ebanghelyo. Ang pagpaminaw sa mga panalangin sa ordinansa sa pagbugkos samtang dalaga o ulitawo pa makahatag nato og talagsaon nga butang nga paabuton, inig abut na sa panahon.

3. Ang atong mga katigulangan naghulat nato nga mohimo sa mga pagbugkos alang kanila!

   Ang buhat sa templo mas maayo pa kon apilan sa family history. Nakasinati ko niini sa akong kaugalingon sa dihang akong gidala ang mga pangalan sa pamilya [family name], nga nadawat na nako ang tanang ubang mga ordinansa, aron mabugkos ngadto sa iyang mga ginikanan. Ako adunay kusog nga espirituhanon nga impresyon nga ang akong katigulangan nagtan-aw ug midawat sa buhat nga akong nahimo alang kaniya. Kini nga pagbati dili unta sama niini kon wala pa nako tiwasa ang pagbugkos.

4. Ang mga pagbugkos naghatag og talagsaon nga mga oportunidad sa pagkat-on.

   Ang matag ordinansa sa templo adunay mga simbolismo. Ang mga pagbugkos sa templo nagtudlo nato sa kamatuoran nga wala hatagi og gibug-aton sa ubang mga ordinansa pinaagi sa mga simbolo sama sa altar ug sa mga salamin nga gibutang nga nagrepresentar sa kahangturan. Makapaminaw kita sa sagrado nga mga pulong sa pakigsaad sa pagbugkos. Usahay, ang sealer mahimong motanyag og dinasig nga mga hunahuna sa kaimportante ug kahulugan kabahin sa ordinansa.

5. Ang mga pagbugkos naghatag og panglantaw sa atong kinabuhi.

   Ang pag-apil sa proxy nga mga pagbugkos dili makausab sa atong marital status, apan kini makahatag og mas klaro nga ideya sa unsay gitagana alang kanato. Ang pagtabang sa atong mga katigulangan sa paghimo niini nga pakigsaad makatabang nato sa paghimo sa atong kaugalingong plano sa pagbuhat sa ingon. Kon tan-awon nato ang mga panalangin sa kahangturan nga lisud ug dugay nga mga tumong, gihikawan nato ang atong kaugalingon sa kahigayunan sa pagsugod sa pagsinati niini karon. Ang ebanghelyo mao ang mahitungod sa pagpangandam ug pagpasidungog sa mga pakigsaad, ug ang gamhanang paagi sa paghimo niini mao ang pagpuyo nga takus ug pagpahigayon sa importante nga mga ordinansa sa templo—ang tanan niini.

Unsa Ang Akong Mahimo?

Sa sunod nga kamo mobisita sa templo, ikonsiderar ang pagpahigayon sa usa ka ordinansa nga dugay na nimo nga wala mahimo, mga ordinansa man sa pagbugkos, mga bunyag, o initiatory. Ang pag-apil sa tanan nga importante nga mga ordinansa sa templo sa tinuod makapanalangin sa inyong kinabuhi.

Pagdiskobre pa og Daghan

Makakita pa kamo og dugang nga mga artikulo mahitungod sa templo, sa garment sa templo, ug sa pagdawat sa inyong kaugalingong tuga sa seksyon sa young adult sa Marso 2019 Liahona.