Gikan sa Unang Kapangulohan
Mahimong Mahisama ni Jesus
Ni Presidente Henry B. Eyring
Ikaduhang Magtatambag sa Unang Kapangulohan
Gikan sa “Ang Atong Hingpit nga Ehemplo,” Liahona, Nob. 2009, 70–73.
Usa ka Dominggo nagtan-aw ko sa usa ka grupo sa mga bata nga nanganta og:
Maninguha kong mahisama ni Jesus.
Sama’s Iyang paghigugma sa buhat ug sa sulti.
Kon tintalon ko nga sayop pilion,
Apan naminaw ko sa Espiritung naghunghong,
“Higugmaon ta ang usag usa.
Ang kaayo atong ipakita.
Pagbinuotan sa buhat ug sulti,
Kay sugo man Nya kini.”
Ang matag bata miyuko, nga duol na kaayo sa atubangan sa iyang lingkuranan. Makita nako ang kahayag sa ilang mga mata ug determinasyon sa ilang mga nawong. Si Jesukristo mao ang ilang ehemplo. Ang pagkahimong sama Kaniya maoy ilang tumong.
Kitang tanan mahimong sama sa Manluluwas, nga si Jesukristo, pinaagi sa pagsunod sa Iyang ebanghelyo. Manghinaut ko nga mangita kamo og mga kahigayunan sa pagbuhat sama sa Iyang gibuhat ug sa paghigugma sama sa Iyang paghigugma. Ang gugma mao ang paagi nga Siya mogiya kanato aron mahimong sama Kaniya. Walay bisan usa kanato ang hingpit. Apan kita makahibalo nga kita nagsunod sa Iyang paagi. Siya migiya kanato, ug Siya gusto nga kita mosunod Kaniya.