Na o Polokalama Faakomepiuta
O La’u Mafutaga Motusia Sili ona Leaga o se Tasi o O’u Faamanuiaga Aupito Silisili Moni Lava
O nisi taimi tatou te vaaia ai mafuaaga mo uunaiga a o nisi taimi tatou te le malamalama ai. Po o le a lava, e tatau a ona tatou faatinoina i le faatuatua.
Sa motusia le ma mafutaga ma la’u uo tama i se po manino o le taumafanafana.
I luma mai o lena aso, sa ma tauaimisa ai ma Kata (ua sui le igoa)---e le o se mea e le masani ai i le tolu tausaga, o la ma mafutaga e fai ma uma ma toe amata foi. Sa toetoe o mea uma lava sa ma tauaimisa ai---mai le mea e ‘ai i fuafuaga mo le lumanai. I le amataga, sa ou le amanaiaina o ma eseesega i le anaga faapea “e fetosinaa’i pe a eseese.” Ae o a ma tala tausua faaleuo i nisi taimi na i’u ina suia i se soloa’iga aasa o feeseeseaiga.
I lena po o le taumafanafana, sa ma aveina ai se telesekope i le toafa e autilotilo ai i paneta. Ae na ma vaaia o le susulu o le masina i le pouliuli o le lagi na ufitia ai le ma vaaiga. O le le fiafia, na amata ai ona ma—toe tauaimisa.
Sa iu ina ou savali ese e faatoafilemu au lava. “E le o a’u lea,” o o’u mafaufauga ia. Sa lauiloa au o se tagata faatupu filemu i o’u tei, ma sa ou tautala ma le agamalu ma le agalelei i isi a’u uo. Ae aisea la sa ou ee ai i le tama sa ou fai faapea ua ou alofa i ai?
Sa ou tilotilo a’e i le lagi pouli ma sa ou tatalo ia ou iloa pe faapefea ona faaleleia le ma mafutaga ma Kata. Sa faafuasei, ona suia lo’u ita i se filemu lofituina, ma sa ou lagonaina le uunaiga o le mea e sili ona fai mo i ma’ua uma o le faamuta o la ma mafutaga.
Sa umi se taimi o le faamalologa Sa i ai taimi sa faaosoosoina ai au e faate’a le uunaiga e motusia le mafutaga ma Kata ona sa ou misia le masaniga o la ma sootaga. O nisi taimi sa ou lagona ai le le fiafia i le Atua, ma le talitonu sa ia tapunia se faitotoa e aunoa ma le tatalaina mai o se isi. E ui o lea, sa ou maupipii pea i le fautuaga a Elder Jeffrey R. Holland o le Korama a Aposetolo e Toasefululua: “A alia’e mai na taimi ma oo mai faafitauli … ia taofi mau i mea ua uma ona outou iloa ma tutu malolosi seia oo mai se isi malamalama” (“Le Alii e Ua Ou Faatuatua,” Liahona, May 2013, 93–94).
Ou te lei mauaina lena “malamalama faaopoopo” mo le tele o masina, ma sa amata ona ou taumanatunatu pe o le a ou mauaina. Ina ua mavae se tasi tatalo ma le loto e uiga i le mafutaga ua motusia, sa uunaia lou loto e le Agaga, ma tau mai ia te au o uunaiga a le Tama Faalelagi e mo le soifua manuia o Ana fanau. O auiliiliga o Ana mafuaaga e le taua nai lo lou faatuatua ia te Ia.
O le iloa ai e i ai se fuafuaga a le Tama Faalelagi mo au na aumaia ai le faamoemoe mo lou lumanai ma sa fesoasoani ia te au e toe amata eva faamasani ai. I se tasi taeao, sa ou faitauina ai le Mataupu Faavae ma Feagaiga 88:40, o loo aoao mai ai le Alii e faapea “o le malamalama e pipii i le malamalama.” Sa vave ona ou iloaina e mafai ona faatatau lenei mataupu faavae i le eva faamasani. Sa ou iloaina o le a sili atu lou fiafia i se tasi e tutusa mea ma te faatauaina ma le malamalama.
Sa iu ina ou feiloai ia Austin. Sa vave ona mafana le ma mafutaga, mai lo ma fiafia i tako seia oo atu i misiona sa ma auauna atu ai i setete eseese. Sa foliga masani lona agaga malu ma sa ogatusa foi ma lou, ma sa iu ina ma faaipoipo. Sa le o se mafutaga o ni naunauga alofa faapei ona outou manatu ai i se ata tifaga masani alofa faavalea. O se mafutaga manaia ma le mautu---o se mea ou te talitonu o le a tumau e faavavau.
O le toatele o i tatou e mananao i se faamalamalamaga pe a tatou maua ni uunaiga faigata. Mai le mea sa ou oo i ai, sa ou aoaoina ai faapea o le faatuatua i le Alii e mafai ona fesoasoani tatou te tumau ai i le usiusitai e aunoa ma le iloa pe aisea. A o tatou faalagolago i se Atua e silafia mea uma, e mafai ona tatou lagonaina le filemu ia tatou faaiuga e faaino ia uunaiga seia tatou maua le “malamalama faaopoopo” ua Ia folafola mai i e faamaoni.