E Maeu Le Alofa Mutimutivale o le Alii
Saunia e Elder Quentin L. Cook
O Le Korama a Aposetolo e Toasefululua
O le voluma tuufaatasi fou o le talafaasolopito o le Ekalesia o le a fesoasoani ia i tatou e tausia a tatou feagaiga e ala i le faalauteleina o lo tatou manatua o mea sa faia e le Faaola mo i tatou.
Mo le uluai taimi i le toetoe atoa le selau tausaga, sa lolomiina ai se voluma tuufaatasi fou o le talafaasolopito o le Ekalesia i lalo o le taitaiga a le Au Peresitene Sili ma le Korama a Aposetolo e Toasefululua. Ua faaulutalaina Au Paia: O Le Tala i le Ekalesia a Iesu Keriso i Aso e Gata Ai, o lenei talafaasolopito faamatala o loo ta’u mai ai le tala moni o tagata le taualoa o e na avea ma Au Paia e ala i le Togiola a Iesu Keriso (tagai Mosaea 3:19). O le voluma muamua, O Le Tagavai o le Upumoni, 1815–1846, ua maea nei ma ua faaliliuina i gagana e 14 mo le tufatufaina atu i le tele o vaega o le lalolagi.
O Le Au Paia o le tala i le ala na toefuatai mai ai e le Atua Ana feagaiga e faavavau ona o Lona alofa i Ana fanau. O loo faaalia mai ai le ala na toefuatai mai ai e le Alii Lana talalelei e aumaia ai le faamoemoe ma le filemu i taimi o le vevesi, tofotofoga, ma mafatiaga. O loo faaalia mai ai foi le ala e tau atu ai feagaiga toefuataiina i le faaeaga e ala ia Iesu Keriso.
Atonu tou te faamoemoe e amata le tala ia Iosefa Samita, ae O Le Au Paia e amata i le 1815 i le pa o se mauga mu i Initonesia, lea sa afua ai le salalau tele o le oti, faama’i, ma le vesiga. O lea amataga na filifilia ma le mafaufau i mea na faaalia mai e le Alii e uiga i le ala na Ia toefuatai mai ai feagaiga e fusia ai i tatou i le Faaola ma mafai ai e i tatou ona faatoilalo faafitauli uma o le olaga.
“O A’u o le Alii, ona ua Ou iloa le malaia o le a oo mai i luga o e o nonofo i le lalolagi, na Ou valaʼau atu ai i luga o laʼu auauna o Iosefa Samita, Laitiiti, ma tautala atu ia te ia mai le lagi, ma tuu atu ia te ia poloaiga; …
“Ina ia mafai ona faatuina la‘u feagaiga ia tumau-faavavau.” (MF&F 1:17, 22).
Mai lona vaaiga amata e oo atu i lona salalau atu i le lalolagi, O Le Au Paia o loo faailo mai ai i fanau a le Atua i soo se mea e faapea, o le tala lea o la latou feagaiga ma le Atua, o le silafia o latou luitau. E ala mai i Lana perofeta, sa toefaafou ai e le Atua feagaiga e le aveesea ai le leaga, faanoanoaga, mafatiaga, ma le valavala ai i le oti ae o loo folafola mai ai le faamalologa e ala i le Togiola a le Faaola, faapaiaina ma faaeeina o tatou olaga i le faauigaga silisili, ma faamautinoa mai ai ia i tatou na sootaga tatou te faapelepelea iinei i le lalolagi e mafai ona tumau i le faavavau, “e o faatasi ma le mamalu e faavavau” (tagai MF&F 130:2).
O mataupu muamua e valu o le O Le Tagavai o le Upumoni ua lolomi ma faasalalauina i lomiga o lenei mekasini i le tausaga atoa. O le lomiga o le masina lenei e faamuta i ai ia mataupu o loo faasolosolo mai le O Le Au Paia, ae o loo faaauau le tala i le saints.lds.org, i le Gospel Library app, ma lomiga e (oka mai i le store.lds.org). Ou te valaaulia outou e faaauau ona faitauina i soo se tasi o alaleo nei.
O Se Mamanu ma se Fuafuaga Paia
O Le Au Paia o loo faaauauina pea se mamanu paia lea e faaaoga ai e perofeta, e avea o se vaega o la latou auaunaga, le taimi ua tuanai e fesoasoani ai ia i tatou e aoaoina pe o ai i tatou ma vaai atu i faamoemoega o le Atua i o tatou olaga. I tusitusiga paia, e toatele perofeta ua amata la latou aoao atu e ala i le faamatalaina o tala e uiga i le alofa mutimutivale o le Alii i o latou augatuaa.1 Na apoapoai mai Moronae i le aufaitau o le Tusi a Mamona ia “manatua le alofa mutimutivale o le Alii” i le gasologa o le talafaasolopito “ma manatunatu i ai i o outou loto” (Moronae 10:3). O le toe manatunatu i le agalelei o le Alii e saunia ai i tatou e maua le molimau a le Agaga, lea e aoao mai ai i tatou “i mea e pei ona i ai moni lava, ma mea e pei o le a i ai moni lava” (Iakopo 4:13; tagai foi Moronae 10:4–5).
I le iloa ai sa fuafua o tatou Matua Faalelagi mo lo tatou fiafia faai’u ma le faaeaga ua aumaia ai ia te i tatou se vaaiga, ua aumaia ai ia i tatou se faasinomaga o ni fanau faapelepele a ni matua faalelagi, ma faateleina ai lo tatou talitonu mautinoa i le Alii, e oo lava i taimi o mafatiaga. O le manatuaina o le agalelei o le Alii e mafai ai foi ona puipuia i tatou mai le faamaualuga ma le faafanoga o le tamaoaiga. Na tusi Mamona e uiga i se taimi na “amata ai ona faatuputeleina le mauoa” o sa Nifae. Ae e le pei o isi vaitau i le Tusi a Mamona ina ua faatagaina e tagata le faamaualuga ma ‘oa e aumaia ai lo latou toilalo, sa latou mulimuli i ala eseese i le taimi lea: “Ae e ui ia latou oa, po o lo latou malosi, po o lo latou manuia, sa le faafefeteina i latou i le faamaualuluga o o latou mata; pe sa gese foi ona latou manatua o le Alii lo latou Atua; ae sa latou faalotomaualalalo tele lava i latou lava i ona luma.” Sa latou tausia a latou feagaiga ma tumau i le amiotonu aua “sa latou manatua mea silisili sa faia e le Alii mo i latou” (tagai Alema 62:48–50).
O Le Au Paia o loo aoao mai ai lesona e pei o nei ma le tele o isi. O le a fesoasoani ia te oe e iloa ai le aao o le Alii i lou olaga a o e feagai ma tofotofoga o le faatuatua mai itu eseese, o lototiga ma olioliga, o faaaliga ma faanaunauga a tagata e le atoatoa o e alolofa i le Alii ma e ua lagonaina Lona alofa.
A o e faitauina, o le a e iloa ai se malamalamaaga fou ma se faauigaga e oo lava i tala sa e faalogo i ai muamua. E leai se vaaiga i le talafaasolopito o le Ekalesia e sili ona lauiloa nai lo le Uluai Faaaliga Vaaia a Iosefa Samita, ae O Le Au Paia e fesoasoani tatou te malamalama atili ai pe na faapefea ona tauivi Iosefa e tuufaatasia le mea sa ia lagonaina i lona loto ma le mea sa ia manatu ai i lona mafaufau.
O le naunauga ma le loto o Iosefa ia lagonaina le faamagaloga a le Faaola sa le i faataunuuina aua sa ia faapea mai e leai se lotu sa i ai na aoaoina “le talalelei a Iesu Keriso e pei ona sa tusia ai i le Feagaiga Fou.”2 I lona mafaufau sa manatunatu loloto ai Iosefa pe o le fea ekalesia sa sa’o pe sese uma foi. I lona loto sa matuai faamoemoe o ia ma le naunautai ia sa’o se tasi o na ekalesia ina ia mafai ai ona ia maua le filemu o loo ia sailia. O le le mafai ona ia tuufaatasia o mea i lona mafaufau ma mea sa i lona loto, sa iloa ai e Iosefa sa mafai ona ia ole atu i le Atua. Sa alu o ia i le togavao e tatalo ai. O iina na ia vaai ai i le Tama ma le Alo, o le sa faamagaloina o ia ma foia lana faafitauli i se ala na te lei mafaufauina lava.3
O Iosefa, o lona aiga, ma le toatele o isi tagata o e sa taliaina le feagaiga ua toefuataiina mai a le Alii, sa mananao ia lagonaina le alofa o le Atua mo i latou, aoao pe mafai faapefea ona latou faalatalata atili atu ia te Ia, ma faamalolo ia sootaga ma e pele ia i latou. Ua faamatala mai e le O Le Au Paia a latou tala.
Faalagolago i le Alii i taimi o Tofotofoga
O le Voluma 1 o le O Le Au Paia e aofia ai le tala faa-momoiloto ia Amanada Barnes Samita ma lona aiga, o e sa usiusitai i poloaiga a le Alii ma sa latou faia Lona finagalo.4 Sa fasiotia mataga ia le toalua o Amanda ma se tasi o lana fanau tama faatasi ai ma isi Au Paia o Aso e Gata Ai e toa 15 sa tolauapi i se pitonuu laitiiti i luga o le Alia o Shoal i Misuri. Sa tausia e le Alii ia Amanda i lenei aafiaga matautia, sa tali atu i ana tatalo, avatu ia te ia le lototele, ma sa mafai ai e ia ona faamalolo lana tama tama sa matuia ona manu’a.5
O loo faaalia i le O Le Au Paia le ala na aoao ai e Amanda le faalagolago i le Alii i puapuaga matuia. O loo faamatala mai ai foi le mea sa aoaoina e Iosefa Samita e uiga i le agalelei o le Atua e oo lava i taimi o puapuaga. O loo faaalia a faapea o fesootaiga a le Alii tatou te maua ai se vaaiga e faavavau, fesoasoani tatou te vaai atu ai i mea e pei ona i ai moni ma o le a i ai, ma fesoasoani tatou te faaaoga ai le faatuatua faapea o le a fesoasoani mai le Alii ia i tatou i taimi faigata.
Ina ua iloa e le Perofeta o Iosefa le mea sa tupu i le aiga o Amanda ma isi o le Alia o Shoal, sa ia lagonaina e sili ai lona alu i le falepuipui pe fasiotia o ia nai lo le fasiaina o le Au Paia. O le aso na sosoo ai sa ia taumafai ai e soalaupule se vaifofo toafilemu ma le vaegaau faaauupegaina a Misuri, lea sa foufou e osofaia le pitonuu autu o le Au Paia o Fa Uesi. Nai lo lena, sa pueina Iosefa ma taofia faapagota.
Toetoe ina atoa le lima masina mulimuli ane, sa faapagotaina pea Iosefa, i se sela malulu, fe’oma’i i Liperate, Misuri. Sa ia taumanatunatu pe o fea sa lafi ai le Atua ma pe o le a foi le umi e mafai ona ia tatalia ai le faalogologo atu i le tagi mai a fafine ua oti a latou tane ma tamaiti matuaoti. Sa ia tatalo, “Le Alii e, o le a le umi latou te mafatia ai i nei sese ma sauaga lē tusa ai ma le tulafono, ae lei faamaluluina lou finagalo ia te i latou, ma uunaia ai lou loto i le agaalofa ia te i latou?” (MF&F 121:3).
O loo aoao mai e le O Le Au Paia i tatou e faapea o mafatiaga e le o se faailoga o se le fiafia o le Alii, po o se aveesega o Ana faamanuiaga. O le faafeagai o se vaega o le afi faamama e sauniaina i tatou mo se taunuuga e faavavau i le selesitila (tagai 2 Nifae 2:11). Sa aoaoina e Iosefa e faapea o puapuaga e le mafuatiaina o le Faaola ua mafai ai e Ia ona fesoasoani ia i tatou pe a tatou puapuagatia ma iu ai ina faaeaina i tatou (tagai Alema 7:11–13). I le tali atu i le tagi faanoanoa a Iosefa, sa lisi mai ai e le Alii ituaiga uma o luitau a o lei faaiuina:
“Afai e tatala faamaga lautele mai e auvae lava o seoli le gutu ia te oe, ia e iloa, loʼu atalii e, o nei mea uma e te maua ai le poto masani, ma o le a avea mo ou lelei.
“Na oo ifo i lalo o mea uma le Atalii o le Tagata. Pe sili ea oe i lo ia?” (MF&F 122:7–8).
O lo tatou oo foi o i tatou lava i nei mea e mafai ona faaeeina ai i tatou i le agaalofa faaKeriso mo i latou o e puapuagatia. “O le a atili momomo pea lava lo’u loto pe a mavae lenei mea nai lo le mea sa i ai muamua,” sa iloa ai e Iosefa a o i ai i le falepuipui. Sa ia moomoo maimau e pe ana mafai ona mafuta ma le Au Paia e faamafanafanaina ma faana i latou. “Semanu e le mafai lava ona ou lagonaina e pei ona lagonaina i le taimi nei,” sa ia faamalamalama mai ai, “pe ana ou le’i mafatia i mea sese sa ou pagatia ai.”6
O se tasi mafuaaga sa faatonuina ai ma faamaonia e le Au Peresitene Sili ma le Korama a Aposetolo e Toasefululua le O Le Au Paia ina ia mafai ai ona fesoasoani ia i tatou taitotasi ia iloa nei mea e ala i tala o isi. E mafai ona tatou aoao mai ia Amanda e tusa lava pe na silafia e le Atua e fetaui ma Lona poto e le mafuatiaina e aua nei papuipuia mai mea leaga po o mafatiaga, e alofa lava o Ia ia i tatou ma o loo silafia lelei i tatou e Ia. E faafofoga mai o Ia ia tatou tatalo ma e alofa mutimutivale, ma agalelei.
O Faamanuiaga Toefuataiina o le Malumalu
E leai se isi mea e sili atu o loo faaalia ai lena alofa mutimutivale ma le agalelei ia i tatou nai lo totonu o le malumalu. O le mea moni lava, O Le Au Paia o le tala e uiga i faamanuiaga toefuataiina o le malumalu. O le voluma muamua o loo faauma a o mauaina e le fiaafe o le Au Paia o Aso e Gata Ai ia sauniga paia i le Malumalu o Navu i le 1846. O le voluma lona lua o le a taualuga i le faapaiaga o le Malumalu o Sate Leki ma amatalia ona maua e le Au Paia o sauniga iina i le 1893. O le voluma lona tolu o le a faaiu i le Au Paia Europa ua amata ona faapotopoto atu i le malumalu i Suitiselani i le 1955. O le voluma lona fa o le a aumaia ai le tala e oo mai i le taimi nei, o le taimi ua salalau ai malumalu i le lalolagi ma ua maua e le Au Paia i le salafa o le kelope ia sauniga o le faaeaga, e pei ona sa valoia e perofeta i aso ua leva.
I totonu o le maota o le Alii tatou te osia ai feagaiga ma faaeeina ai i le mana e faatoilalo ai aafiaga o le Pau, e aofia ai mea leaga ma mafatiaga i lenei lalolagi. Tatou te maua le puipuiga ma taualuga i le mana e tulai mai ai i le Toetutu, ua faamauina ia tatou pele e faavavau.
O le a fesoasoani le O Le Au Paia ia i tatou e tausia feagaiga e ala i le faalauteleina o o tatou manatua i ala faafaamanatuga. O le a fesoasoani ai ia te i tatou e manatua mea sa faia e le Faaola mo i tatou. A aunoa ma faamaumauga o fesootaiga a le Atua i taimi ua tuanai, e le mafai ona tatou “manatua le alofa mutimutivale o le Alii i le fanauga a tagata” (Moronae 10:3). O mafuaaga nei ua tatou nofoaitalafu ai i le Alii ma i le Au Paia o e sa tusifaamaumauina o latou aafiaga o Lona alofa mo i latou. Sa poloaiina Iosefa Samita e le Alii e tusifaamaumau ona aafiaga (tagai MF&F 21:1). Na Ia poloaiina se tusitalafaasolopito o le Ekalesia sa galue i lalo o le taitaiga a Iosefa ia “tausia e lē aunoa le talafaamaumau ma le talafaasolopito o le ekalesia” (MF&F 47:3). Na Ia poloaiina faapea o lena talafaasolopito e aofia ai “mea uma mo le lelei o le ekalesia, ma mo tupulaga faia’e” (MF&F 69:8).
Faatasi ai ma nei faaaliga ma le folafolaga o le feagaiga ia manatua pea le Faaola, sa amata fuafua ai e le Au Peresitene Sili ma le Korama a Aposetolo e Toasefululua le O Le Au Paia i le 10 tausaga talu ai. O lenei matou te fautuaina outou e faitau i ai, talitonu o le a fesoasoani ia te oe e malamalama ai i le fuafuaga a le Atua, ma vaai atu ai i le tele o le alofa mutimutivale o le Alii, tumau ma le faamaoni i taimi lelei ma taimi leaga, ma maua le agaalofa faaKeriso mo isi, ma tausia feagaiga e tau atu ai i le faaeaga.