Tatalo i le Ana
O le tausaga ua mavae na ou alu ai i se savaliga sopo ma lo’u tama ma so’u uso. Sa matou savavali sopo i le loto o le ana. Sa lei pine ae amata ona matou suesueina se alasopo i autafa. Sa matou mauaina ni ana lapopoa ma ni itu e matamata ai i ni vaiga matagofie. Sa matou fe’a’ei i luga atu o papa matagataga ma maupuepue tifato.
E lei umi lava, ae ua matou matua se lava. Ma te lei iloa po o le fea le ala e toe foi ifo ai i le taele o le ana. Sa matou utia ai i le fememea’i, ua leiloa atu le tumutumu ma le pito i lalo o le ana. Sa amata ona ou matua le fiafia. Sa ou lei iloa po o fea e o i ai, ma sa faapena foi lo’u tama!
Sa amata ona pogisa ma malulu, ma sa matua mamao foi i matou mai le sao mai i fafo. Sa ou iloa sa silafia e le Tama Faalelagi le mea e o i ai.
Sa ou faapea atu, “Afai tatou te mananao e o ese mai iinei, e tatau ona tatou tatalo!” O lea na matou tootutuli toatolu ifo ai i lalo e tatalo, ma ole atu i le Tama Faalelagi e taitai ese i matou mai le ana.
A o amata ona matou savavali, sa tau mai e se lagona ia te au a ou vaai loa i se laau sa’o umi, ona ou liliu lea i le itu tauagavale. Ina ua faliu atu i le tauagavale, sa ou vaaia le matou taavale. Sa ou iloa sa fesoasoani le Tama Faalelagi i le aveeseina mai o i matou mai le ana. Na tali mai e le Tama Faalelagi la matou tatalo, ma na iu ai ina matou toe saogalemu mai i fafo—ae o le a goto ifo le la.
Ou te matuai faafetai lava ona o le mana o le tatalo ma le faafofoga mai o le Tama Faalelagi.