Itulau o le Lotoifale
Maliu se Toa Manumanu FaaFaifeautalai i le Faasaoina o ni Tamaiti se Toalima
Ua toeitiiti atoa le tausaga talu lona maliu; ae o loo manatuaina pea Elder Aaron Ahkau Matapa Patiole o se toa manumanu i le motu o Samoa.
O Aaron Ahkau Matapa Patiole, mai Sini Ausetalia, sa i ai i lana misiona i Apia, Samoa mo le sefulutasi masina ae lavea loa i se taavale ma maliu ai.
Na savali le [faifeautalai e] 21 tausaga i le auala faatasi ma lana soa, e fesoasoani i ni tamaiti se toalima e toe foi atu i le fale i le aoauli o le Aso Sa ia Novema lea ua tea.
Na uunaia e Elder Patiole tamaiti i luga o le pa i lana soa ina ia sao, e aloese ai mai se taavale. O lena aso, na toe foi atu ai Elder Patiole i lona Tama o i le Lagi.
O le vaiaso mulimuli ane, na papatiso ai tamaiti ia e toalima ma le latou aiga e le soa faifeautalai a Elder Patiole, o Elder Timoteo mai Kalefonia, ISA.
O le alofa o Aaron i le ola ma le Alii, lona manumanu i le taimi ma le agaga na lofituina ai i matou ao matou fefaasoaai ai i le aoauli o le Aso Sa i lona aiga.
Sa fanau i Niu Sila i matua Samoa, o le lona fa o le fanau e toaono, na siitia atu le aiga o Aaron i Ausetalia ina ua tolu masina lona matua. O ona uiga fiafia ma le malie na aafia ai i latou uma na siosiomiaina o ia. Fai mai lona tuafafine e toatasi o Tagi e fiafia o ia e tausua ma faatasi ma le aiga, aemaise lava le faaaluina o le taimi ma ona tei laiti.
Ua leva ona i ai uiga faafaifeautalai o Aaron ao lei alu i lana misiona, o le tala lea a lona aiga.
I lona talavou, e fiafia Aaron i le lakapi ma le pasiketipolo, lagolagoina le Ualapi (e tusa lava pe latou te taaalo ma Niu Sila) ma o se tagata e lagolagoina le Kalapu Futipolo a Liverpool. Na faaalia e Aaron lona tomai fatufatuai, i le gaosia o ni ata maoae ao i ai i le Aoga Maualuga a St. Gregory. Na faamaeaina lana aoga i le 2015, ma e leai se masalosalo o ia o se tagata aoga atamai. Sa faigaluega Aaron mo le tausaga i le tele o galuega e sefe mo lana misiona.
Ao lei alu lana misiona, sa auai Aaron i vasega Seminare ma mulimuli ane i vasega o le Inisitituti; sa ia auai foi i savaliga faapaionia. E fiafia o ia i le talalelei ma sa ola ai lona olaga e tusa ai.
Na taunuu Sister Patiole i Samoa i le Aso Lua ao lei tupu le faalavelave ia Aaron, e asiasi i ona aiga. O le vaiaso na sosoo na ia aveina lana tama e taoto i le fanuatanu o Cawdor.
O le sauniga mo Elder Patiole na taitaiina e le Peresitene o le Eria o le Pasefika o Elder O. Vincent Haleck. E silia ma le afe tagata na auai i le falelauasiga. Na lolofi atu tagata i faapaologa e faaalia lo latou faaaloalo. Na faagaeetia le aiga o Patiole i le alofa ma le lagolago na latou mauaina i lena taimi ma o loo faaauau pea ona lagonaina. Na latou mauaina ni tusi mai le Au Peresitene o le Ekalesia ma le Au Peresitene o le Misiona; ma e vili mai i vaiaso taitasi le tina o le soa o Patiole ia Sister Patiole.
O aso taitasi, e malaga ai le tina o Aaron o Sister Patiole i Cawdor ao lei goto le la e asiasi i le tuugamau o lana tama. E faatalitali lenei tamaitai alofa mo le goto ifo o le la e ufitia ai le nofoaga ua taoto ai o ia; o se faamanatu faanoanoa ma matagofie lea na ta’ua e Sister Patiole, “ua i ai o ia i se nofoaga sili atu. Ma o le a tatou toe vaai ia te ia aua ua tatou malamalama i le ata o le faaolataga.”
Na matuai fiafia le aiga o Aaron i le iloaina na sefeina e le la tama lana molimau i lana komepiuta.
I ana lava upu, na ta’ua ai e Aaron, “Ou te iloa e eseese tagata uma . . . ua saunia e le Alii le auala mo i tatou ia tuufaatasia ai ma lagona lona alofa ma maua lena filemu ma le lotogatasi tatou te moomoo uma i ai . . .”.