O Le Ekalesia Moni: “Mo le Faaatoatoaina o le Au Paia”
Saunia e Elder J. Devn Cornish
Fitugafulu a le Au Pulega Aoao
E oo mai i le taimi lenei, ua e maua le avanoa e faitau ai i nai uluai mataupu o le voluma 1 o le tala fou e fa voluma o le talafaasolopito o le Ekalesia, Aupaia: O Le Tala i le Ekalesia a Iesu Keriso o le Aupaia o Aso e Gata Ai. E ese le manaia o le vaaia o le auala ua fausia ai o tatou faatuatua ma faafou ai o tatou faamoemoe e le talafaasolopito a Le Ekalesia a Iesu Keriso o le Au Paia o Aso e Gata Ai, ua faamatalaina i lona anotusi e pei ona sa oo i ai i latou o e sa soifua ai. Ua matou lagona le faamanuiaina e avatu lena talafaasolopito i se auala e mafai ona malamalama ma talisapaia ai e le salafa o le lalolagi ma le Ekalesia atoa.
O lagona e maua e se tagata mai le faitauina o le talafaasolopito o le Ekalesia, e faalagolago tele lea i mea ua faamoemoe le tagata e maua i lena talafaasolopito. Ua tatou faitau i le fetalaiga a le Alii lava ia e faapea, o lenei Ekalesia “o le ekalesia moni ma ola e tasi i luga o le lalolagi atoa” (MF&F 1:30). O lea la e foliga mai o se mea talafeagai le faamoemoe e faamatala mai e le talafaasolopito o le Ekalesia ni taitai atoatoa ua faaaogaina lelei se faasologa o taitaiga na faaalia mai e faaauau atu ai i se faalapotopotoga atoatoa ua taliaina ma lagolagoina e le lautele. Ae e le o le mea lena o loo faamatala mai e tusitusiga paia, pe faatusa i ai lo tatou talafaasolopito, aua o le faaatoatoaina o le Ekalesia i le avea ai ma se faalapotopotoga sa le o le faamoemoega laualuga lea o le Alii.
O Le A le Faamoemoega o le Ekalesia?
E leai se vaipanoa o a tatou tusitusiga paia, a tatou aoaoga faavae, po o aoaoga a aposetolo ma perofeta o aso e gata ai, o aoao mai ai e faapea, o le faamoemoega a le Alii o le, ia atoatoa po o le ia laveai le Ekalesia. Ae, o le faamoemoega o le Ekalesia “ina ia faaatoatoaina ai le au paia … seia tatou oo atu o i tatou uma lava ma le loto gatasi i le faatuatua … ia fai ma tagata matua, ia oo i le fua o le ua matua, e tatau ma le tumu o Keriso” (Efeso 4:12–13). O le faamoemoega sili lava o le Alii, ia atoatoa Lana Au Paia. E fesoasoani le Ekalesia e lagolago lena faamoemoega.
O le mea lea, o le a tatou matuai fiafia ai i mea tatou te tau i ai i lo tatou talafaasolopito pe afai tatou te faamoemoe na te faaalia mai le ala o le faagasologa o le Toefuataiga e le gata ina faatuina ai le Ekalesia moni a le Alii i luga o le lalolagi, ae ua tuuina mai ai foi aafiaga ina ia mafai ai e ona taitai ma tagata auai ona ola agai atu i le atoatoa a o latou aoao mai a latou ausiga ma o latou faaletonu. O o latou aafiaga e mafai ona faateleina ai lo tatou faatuatua i le Atua ma Keriso, ma fesoasoani tatou te iloa ai le ala e mafai ona tatou suia ma tatou manuia ai, i lo tatou auai i lenei lava faagasologa e tasi o loo taitaia mai le lagi. I nisi faaupuga, o le talafaasolopito o le Ekalesia e tuuina mai ia i tatou le faamoemoe ia iu ane ua mafai foi ona tatou “faaatoatoaina ia [Keriso]” (Moronae 10:32).
O Le A Le Uiga O Le Faapea O Le Ekalesia Moni Lenei?
Afai sa mafai e taitai ma le au paia ua mavae ona faatuina le Ekalesia a Keriso e ui lava o nisi taimi sa le atoatoa ai a latou taumafaiga, ma afai sa latou faia i nisi o taimi ni measese, o le a le uiga o le faaupuga, o le Ekalesia moni lenei? O lona uiga, ia mafai ona tatou maua le talitonu mauai atoatoa i le moni o le pule o le perisitua ua toefuataiina mai, o sauniga faaola, o aoaoga faavae ua faaalia mai, o tusitusiga paia, ma korama tuufaatasi a le Au Aposetolo e Toasefululua ma le Au Peresitene Sili. O lona uiga, ia mafai ona tatou iloa o le Faaola lava Ia e taitaia le Ekalesia ma o le Agaga Paia o le a molimau atu i le au sailiili faamaoni uma e uiga i le moni o nei mea. O lona uiga, e ala i le taumafai e tausi feagaiga e faatatau i nei sauniga, ma faaauau pea ona salamo, e oo lava foi i tagata le atoatoa ae faamaoni e pei o oe ma au, o le a nonofo i le mamalu selesitila faatasi ma le Atua ma Keriso ma o tatou aiga e faavavau, e ala i le Togiola a Iesu Keriso.
Matou te lagona le faamanuiaina e faailoa atu lenei tala o le talafaasolopito O Le Ekalesia a Iesu Keriso o le Au Paia o Aso e Gata Ai, ma matou te uunaia outou e faaauau ona faitau i vaega o totoe o le faasologa pe a alu atu i tua ia voluma taitasi. E faamaoni lava i faamaumauga ma mea moni o loo maua. Matou te talitonu o se faitauga faamaoni o lenei talafaasolopito o le a faateleina ai lo tatou faatuatua i le alofa o le Tama Faalelagi ma i le mana o le Togiola a Keriso, o le a faamalosia ai a tatou molimau i le taitaiga faalelagi a le Perofeta o Iosefa Samita ma le Toefuataiga, ma e mafai ona tatou maua ai le faamoemoe e faapea, o le a tatou maua foi faamanuiaga uma ua Laua folafolaina mai i e faamaoni.
Na auauna atu Elder Cornish o se Sui Pule Sili o le Matagaluega o Talafaasolopito o le Ekalesia i le taimi na ia tusia ai lenei tala.