Itulau o le Lotoifale
Faamuamua e se Fetu Samoa le Alii
A e savali e pasia Caleb Timu, e te le mafaufauina o lenei tamalii ua fai lona aiga e filemu, mategata ona uiga ma agamalu e faatoa uma ona filifilia e auai i le ‘au tele a le Ualapi e toa 32 tagata. O se tama o se fanau e toalua e fiafia lava i le lakapi, peitai, e lei faamoemoe o le a filifilia e taalo mo Ausetalia i le mavae ai o le na o le 12 taaloga mo le Queensland Reds, e lei atoa foi se taamilosaga atoa.
I le 2012, na savali ese mai ai Caleb mai lana matata ua vave ona faamanuiaina ai e auauna atu i se misiona mo le Ekalesia. Sa taalo o ia mo le Brisbane Broncos o le ‘au e i lalo ifo ma le 20 tausaga ma sa filifilia e taalo i le ‘au e i lalo ifo ma le 20 tausaga a le Maroons mo le taamilosaga o le State of Origin i lena lava tausaga, peitai sa leai se mea na sili atu ona taua ia te ia nai lo lana tapuaiga. Sa ia fai mai, “Sa avea ma se filifiliga sili ona faigata ou te lei faia lava muamua seia oo i lena taimi.”
Ina ua uma ona ma talanoa ma se fetu pupula taalo Lakapi a le AAG ma se uo o Will Hopoate, lea na feagai ma lea foi filifiliga, na filifili ai loa Caleb e auauna atu i le Alii ma savali ese mai se matata faamanuiaina faalakapi.
Mo le lua tausaga, na tuueseina ai e Caleb lana matata ae auauna atu i se misiona i Aukilani ma Rarotoga, Niu Sila.
“O le tuuto atoa atu o lou lava tagata i le galuega faafaifeautalai ma mulimuli i taimi faatulagaina a faifeautalai na fesoasoani ia te a’u e aluese ai mai le lalolagi, faalatalata atili atu i le Atua ma auauna atu i tagata na siosiomia a’u. O le galue ai i le misiona na faalelei atili ai a’u fesootaiga ma tagata talu ai e te talanoa i tagata i magaala ma i fasitepu o o latou fale i aso uma.”
I le toe foi ai i le fale na ia toe sainia ai ma le Broncos, peitai sa ia lagona le le toafimalie ona o le tele o taaloga sa faia i le Aso Sa, o se mea e taua tele i le au Kerisiano i le lalolagi atoa. O le taimi foi lea na maua ai e Caleb se valaau mai le Queensland Reds, lea na iu ina ia suia mai ai mai le Lakapi Liki i le Lakapi Iuni.
“Ua matuai ou fiafia lava i lo’u taimi ma le Queensland Reds ma le avanoa
e taalo ai i le Super Rugby i lenei taamilosaga. E tele mea ou te faafetai ai i lo’u toalua, o Pam, o le na avea ma maluapapa mo a’u ma la’u fanau tama e toalua, o Kalisi ma Etuate. Ua paleni lo’u olaga. Masalo ailoga e mafai ona ou ausia lenei mea e aunoa ma le Alii ma na tausaga e lua i le misiona. Ma mo le futipolo, ou te talitonu o le aafiaga o le lafoaiese atu ua aoao mai ai a’u ina ia talisapaia atili.”
Ua tulimatai atu Caleb ia faaauau pea ona auauna atu e avea ma se faataitaiga i le alalafaga po o atunuu ao ia laa atu i fafo i lana toniga lanu meamata ma le lanu auro mo le Ualapi, i le faaaluina pea o le taimi mo mea sili ona taua i lona olaga, o lona aiga ma lana tapuaiga.