“O A’u Ea o Sou Afafine?”

Camille Nelson

Iuta, ISA

E ui lava ina sa na’o ni nai taimi na ou alu ai i le lotu, ae sa asiasi mai ma le faamaoni o’u faiaoga o aiga ia te a’u. O se tasi o po sa valaau mai ai ma fai mai pe mafai ona ou faasoa atu nisi o manatu e uiga i aiga e faavavau i le vasega e sosoo ai o Mataupu Faavae o le Talalelei.

“Ioe, o le a ou fiafia e fai lena mea,” o la’u tala atu lea.

Ou te lei ano tele i ai, seia oo i le taeao na sosoo ai. O le taimi lena na ou iloa ai, sa ou malie e talanoa e uiga i aiga e faavavau i se vaega o tagata o e atonu ua uma ona latou iloaina mea uma e uiga i ai. Sa matuai ou le iloaina po o le a se mea e mafai ona ou fai atu ai ia i latou.

I le aluga o tausaga, sa ou faia ai ni filifiliga sa faapea ona vavaeeseina ai a’u mai le talalelei. E faapefea ona faasoa atu ou manatu e uiga i se mea ou te le mautinoa pe na ou talitonu i ai? Sa ou lagona le le mautonu. Ona oo mai lea i lo’u mafaufau o upu o le viiga “O Le Atua Lo’u Tama” (Viiga, nu. 184). Ua loa tausaga ou te le’i toe faalogo i na upu, ae sa ou taulotoina lava. Ona ou iloa lea: E tatau ona ou ole atu i le Atua pe o a’u moni o Sona afafine.

I le taimi lena, sa ou toe faatulagaina ai au meafale i lo’u potumoe, o lea la, faatasi ai ma lo’u moega sa faalava i le ogatotonu o le potu, sa ou tootuli ai i ona autafa ma faatalitali mo le oo mai o upu. O le a se upu e mafai ona ou fai atu i le Atua? Ou te lei mautinoa pe o i ai foi o Ia. I lena taimi, na aumai ai e le manaoga loloto o lo’u loto nei upu faatauvaa i o’u laugutu: “Le Atua e, o E i ai moni ea iina? Ma afai o loo e i ai iina, o a’u ea o Sou afafine?”

Sa vave lava ona oo mai le tali. Sa peiseai na faatalitali mai o Ia ia ou fesili atu. Sa ou lagonaina le faapea mai o le Atua, “Ioe, Camille, o loo ou iinei, ma o oe o lo’u afafine.”

Ina ua pupula ou mata, sa ou i ai lava i le gasu o lo’u potumoe. O mea uma sa siomia ai a’u sa paepae solo, ae na ou lagonaina le pei lava sa faatulaga lo’u olaga i se faatulagaga lelei atoatoa. Sa ou iloa o au o se afafine o le Atua, ma na o le pau lena o le mea e taua.

I le vasega i le Aso Sa, sa na ona ou faamatalaina o la’u tala i le auala na ou iloa ai o a’u o se afafine o le Atua. Sa ou faapea atu, “Afai o a’u o Lona afafine, e faapena foi i isi tagata uma.”

Sa alu le isi tolu ma le afa tausaga i lo’u faia o suiga lelei uma sa manaomia ona fai, ae e lei toe tutusa lava lo’u olaga. Talu mai lena aso, ou te lei toe masalosalo lava po o ai a’u. Ua ou iloa o loo i ai pea iina le Tama Faalelagi. E alofa o Ia ia te a’u aua o a’u o Lona afafine.