Seia Tatou Toe Feiloai
Taitaiina e Perofeta Soifua
Mai le “Ua Oo Mai Se Isi Perofeta!” Ensign, Jan. 1973, 116–18. Ua faaonaponei le faasaoga.
E fetalai mai i taimi uma le Atua i tagata e ala i perofeta soifua.
O se perofeta fou a le Atua … o se tasi i le faasologa o tamalii musuia na valaauina faalelagi e auauna atu i le taimi lenei e aumai se faaaliga fou mai le lagi i alii, tamaitai, ma tamaiti uma o e o le a faalogo.
O le tofiaina o [se] perofeta fou e matuai taua tele i tagata uma o e talitonu i le Atua, ae maise lava i tagata uma e talitonu i le Alii o Iesu Keriso. …
O taimi uma lava na tuuina mai ai e le Alii le tagata i luga o le fogaeleele, o e na Ia taua o Ona lava tagata, na Ia taitaia ai i latou e ala i perofeta soifua o le ua Ia tuuina i ai le taitaiga mai le lagi. …
O se faasologa tutusa faapena o tamalii musuia ua faatulagaina i onaponei. Sa ausia lenei mea o se taunuuga o le Toefuataiga o le talalelei a le Alii o Iesu Keriso e ala i Lana tagata vaai o aso e gata ai, o Iosefa Samita …
E ese mai i le talitonuga taatele, o le Alii o se Atua o fesootaiga, o se Atua o faaaliga. O Ia o le Atua o le malamalama ma le poto, o le atamai ma faamatalaga. E le faifaimea o ia i le pogisa, pe faasaoina e Ia se tasi i le valea. O Lana ata atoa o le faaolataga e faavae lea i luga o le fesootaiga ma se nuu ua faamalamalamaina.
O ai e mafai ona tapuai ma le atamai pe afai e tumau i le valea?
O ai e mafai ona i ai se faatuatua anoa e aunoa ma se malamalama e uiga i le Atua?
Ma o afea o le a oo mai ai lenei malamalama pe afai e le mai le Atua lava Ia? …
Ua telegese tagata soifua ona aoao i auala o le Alii, aemaise lava i latou e faiaga ona gaoioi e talia le mea moni e faapea, e ui lava o loo naunau o Ia e fetalai mai ia i latou, o Lana auala i le faiga o lea mea, ua ala mai lea i tamalii soifua musuia o e ua Ia atofaina o ni perofeta.
O se mamanu lea ia te Ia. O Lana auala lea e fai ai, ma e lei suia lava e Ia. O Ia e tutusa lava o ananafi, o le asō, ma le faavavau, ma e faapena foi Ana faiga. …
Matou te molimau faamaoni atu, ua toefaavaeina ia fesootaiga i le va o le lagi ma le lalolagi i o tatou aso. Matou te tautino atu, e le o vavaeesea le Atua mai le lalolagi.
E le o maliu o Ia. O loo soifua o Ia.
E le o po o Ia. O loo silasila mai.
E le logonoa o Ia. O loo faafofoga mai.
E le gugu o Ia. O loo fetalai mai o Ia, ma le manino i ana perofeta soifua, ma e ala mai ia i latou e oo mai i le lalolagi atoa.
O le auala lenei o loo fetalai mai ai le Atua ia te outou i aso nei.