Faataupepe ma le Umi o le Tietie Vaalele ma le Upu o le Poto
Andrew Lee
Aai o Niu Taipei, Taiuani
Ata na tusia e Allen Garns
E feoloolo nai taimi o le tausaga, e manaomia ai e lau galuega ona ou malaga mai Taiuani i San Francisco, Kalefonia, ISA mo ni aoaoga faamasani. O le lave o le femalagaai i le va o nei nofoaga e lua o le 15 itula e eseese ai ia taimi. O le faataupepe ma le umi o le tietie vaalele sa ou fia moe ai i le ao, ae ou le moe ai i le po atoa.
E auai mai le aufaigaluega mai le lalolagi atoa i nei aoaoga faamasani. Sa latou fai mai ia te au, latou te taulimaina le faataupepe ma le umi o le tietie vaalele i le inuina o le kofe e faaala ai i latou ae inu le uaina mumu e fesoasoani ia latou momoe ai.
Sa ofo mai e nisi o nei aufaigaluega ia nei meainu, ae sa ou fai atu ma le faaaloalo ia i latou o a’u o se tagata O Le Ekalesia a Iesu Keriso o le Au Paia o Aso e Gata Ai, ma sa [ou] folafola atu i le Alii o le a ou le inuina se uaina po o le kofe. Sa taufaalili mai nisi o i latou ma fai mai, o poloaiga na ua faigata tele ai le olaga. E i ai taimi, ou te lagonaina ai le pei sa ulagia au e tagata i totonu o le faletele ma le ateatea i le miti a Liae (tagai 1 Nifae 8:26–27).
Ae peitai, i le aluga o taimi, sa amata ai ona pei le tausia o le Upu o le Poto o se avega faalemalie foi. I se tasi o po sa le mafai ai ona ou moe, sa ou iloa ai, ua faasolo lava ina vaivai lo’u faatuatua. O le mea e faafetai ai, sa auina mai e lo’u toalua se savali i le aso lena, sa faamalosiauina ai a’u e taofimau i lo’u faatuatua, faalagolago i le Atua, ma tausi Ana poloaiga e tusa lava po o a tulaga [e i ai]. Faatasi ai ma lana faamalosiauga, sa amata ai ona ou tatalo mo le fesoasoani ma amata ona ou vaai atu i mea i se vaaiga ese mai.
I se tasi o malaga, sa ou maitauina ai se tasi o le matou aufaigaluega na uuina mai ni ipu kofe se lua. Sa ou fesili atu ia te ia e uiga i le ipu lona lua.
Sa ia tali mai, “Ua le toe lava le malosi o le ipu e tasi e faaala ai au.”
Sa ou te’i i le maitauina, na faapena foi le moni mo i latou sa inuina le uaina. Sa latou manaomia le inuina o ni [ipu] se tele ina ia momoe ai. O nisi taimi, sa moeuumi ai ona sa tele naua la latou inu.
O le vaavaai atu i le matou aufaigaluega ua faasolo ina faalagolago tele i le ava malosi ma le kofe, na ou iloa ai le taua o le tausia o poloaiga. Ana ou filifili e le usitaia le Upu o le Poto, semanu ou te oo lava foi i le mea lena e tasi.
E lei aluese atoa lou faataupepe ma le umi o le tietie vaalele, ae ua faasolo manuia le tulaga. I se tasi taeao, sa ou ala ae i le mavae ai o se moe lelei i le po ma vaaia ai le oso ae o le la. A o susulu mai ave o le la i le faamalama, sa ou iloa ai, faatasi ma le fesoasoani a le Tama Faalelagi, e mafai ai ona ou taulimaina soo se tofotofoga e tusa lava po o le a le tele po o le laitiiti. Pau lava le mea e tatau ona ou faia o le faaauau ona usitai, tausisia le malosi o lo’u faatuatua, ma tumau seia oo i le iuga.