O Le Mana o le Faatuatua ma Tala o Aiga
E sili atu ona tatou maufetuutuunai i le taimi o faafitauli pe a tatou masani i luitau sa fetaiai ma o tatou lava tuaa.
Sa lagonaina i taimi uma e Rosalini Pasini se fesootaiga faapitoa i le tina, o le tina o lona tinamatua o Elisapeta Xavier Tait, ona o tala e tumu i le faatuatua sa ola ae ma Rosalini. O tala i le faatuatuaina e Elisapeta o le Alii a o malaga mai o ia mai Pomepei e agai i Livapulu ma i Siona, faapea foi ma lona tutumau i tofotofoga faamafatia loto, na tosina i ai le vaaiga faalemafaufau o Rosalini a o laitiiti.
O na foi tala sa faia se sao i le saunia o Rosalini e atinae ma faalagolago i lena lava foi ituaiga o faatuatua ina ua fetaiai o ia ma luitau faapena i lona lava olaga.
Tuua o le Aiga, Leai o se Aiga
Elispeta, vaitau o le 1850, Pomepei, Initia
O Elisapeta Xavier sa o se tamaitai talavou sa lelei ana aoaoga, o le sa fiafia i le olaga faigofie o se vaega o se aiga maumea, ma mamalu i Initia. Peitai sa fetaiai le olaga ma se suiga luitauina i le 1850 ina ua ia faaipoipo atu ia Viliamu Tait, o se taitai sa faia faatonuga i le neivi a Peretania o le sa papatisoina e Elder Parley P. Pratt i Sikotilani.
Ata na tusia e Michael T. Malm
Sa matuai le taliaina e le aiga o Elisapeta lona papatisoina. O le mamafatu o mafutaga faalealofa sa sosoo ai ma le mafatia i le maliu o lana tama tama muamua i le [gasegase o le] kolera. O le taimi lea, ao valu masina o lona maitaga ae sa faananau lava ia faatasi ma le Au Paia ma avea ma se aiga e faavavau, sa auina ese atu ai e Elisapeta ia Viliamu ma le la atalii lona lua e tapena se fale mo le latou aiga i Siona.
Ina ua uma ona fanau le pepe, sa tauanau malosi e le aiga o Elisapeta o ia e lafoai lana tane ma lana tapuaiga ae latou nonofo. Peitai ane, o le tumau i lona naunautai e mulimuli i le Faaola, sa ia tuua ai lona aiga ma lona atunuu e faavavau, ma folau atu ai mo Livapulu, Egelani.
Rosalini, 2003, Colorado, ISA
Sa ola ae Rosalini o se uii o se aiga toatele i Enterprise, o se nuu laitiiti i Iuta i Saute, ISA. Sa ia maua le tele o avanoa e molimauina ai le mana o le faatuatua ia Iesu Keriso i le aluga o ona tausaga i le fale ma i lana misiona. Ina ua uma ona faaipoipo i le malumalu, sa amatalia ai e Rosalini se malaga e tofotofoina ai lana lava molimau ina ua amata e lana tane se matata o le a atili ai lona mamao ese mai le aiga.
I le mavae ai o le siitia atu i le setete o Colorado, sa vaavaai mamao mai Rosalini a o tauivi lona tina ma le kanesa seia oo ina maliu o ia i nai tausaga mulimuli ane.
ATA MAI LE STOCK.ADOBE.COM, MA MAI LE GETTY IMAGES.
Fai mai o ia, “Semanu ou te fiafia e nofo i lo’u nuu i talaane o ou matua i lo’u olaga atoa.” “Na ta’e lo’u fatu ina ua ou tuputupu ae ma siitia ese atu. O le maliu ai o lou tina sa nutimomoia ai le olaga. E oo mai lava i le taimi nei, e leai se aso e mavae atu ou te le misia ai o ia.
“E tatau ona ou talitonu sa i ai aso sa matuai misia tele ai e Elisapeta lona aiga. Ae sa talitonu o ia ia Iesu Keriso ma faatagaina Lona mana e galue i lona olaga. Sa lava lava lena e lagolagoina ai o ia. O lena lava foi mana sa fesoasoani ou te faalagolago ai i lo’u Tama Faalelagi mo le malosi, e tusa lava pe na latalata mai lo’u aiga faalelalolagi pe leai.”
O le Tui o le Oti
Elisapeta, 1856, Livapulu, Egelani
I le malaga umi i le sami mai Initia i Egelani, sa faapea ona ma’i tigaina ai le tama teine laitiiti a Elisapeta. Sa maliu o ia ma sa tanumia i Livapulu. Sa faapea mai Elisapeta mulimuli ane, o le maliu ai o lana pepe sa matuai matuitui lava sa ia le iloa ai pe mafai ona ia faaauau pea. O le lotonutimomoia ma le tuuatoatasi, ae sa faamalosiauina e Elder Franklin D. Richards o le Korama a Aposetolo e Toasefululua, o le sa auauna atu o se peresitene o le Misiona a Europa, sa folau atu ai Elisapeta mo Boston, Massachusetts, ISA.
Rosalini, 2006, Niu Ioka, ISA
E lei lava ona siitia atu e le au Pasini lo latou aiga na faasolo ina tuputupu ae i Niu Ioka, ae faatiga fanau loa Rosalini ao lei atoa masina e tatau ona fanau ai. Sa mafaufau fomai i le taotoga e faafanau ai le pepe ona sa faiifo lava le saoasaoa o le tata o lona fatu. Ae ina ua toe foi le tata o lona fatu i le tulaga masani, sa toe foi le aiga i le fale ma le lagona o le matuu ese atu [o le popole].
I se feiloaiga tulitatao ma le fomai i nai aso mulimuli ane, sa le maua ai e le fomai se tata o le fatu [o pepe]. Sa faafanau mai le la pepe tama i ni nai itula mulimuli ane—e fanau mai ua maliu.
“O le oti o la’u pepe sa matuai nutimomoia ai le loto,” o le tala lea a Rosalini. “E lei i ai se taimi na ou lagonaina ai le gaogaoii e pei ona sa ou oo i ai ina ua latou aveese atu si ona tino itiiti mai ou lima.”
Sa felelei le aiga i Iuta e tanu ai o ia i autafa o le tina o Rosalini. Mo ni vaiaso mulimuli ane, sa le mafai e Rosalini ona aluese ma agai i luma i le olaga.
“Ou te manatu ua ou malamalama teisi i le auala na mafaufau ai Elisapeta pe mafai ona ia agai i luma,” na fai mai ai Rosalini. “Ae sa ia mafaia. Atonu tatou te oo uma lava i lena tulaga i se taimi o o tatou olaga. Ae e le mafai na tatou tutu ai. Tatou te agai i luma e ala i le faateleina o le faalagolago i lo tatou Faaola nai lo o le taimi muamua, ma mulimuli ane, tatou te iloa ai sa i ai lava vavega na siomiaina i tatou.”
O Tau Malulu o le Olaga
Elisapeta, 1856, Iowa, ISA
I le uma ai o le sopoia o se vasega, sa oo ai Elisapeta i se atunuu na matuai fou atoa lava. Sa malaga o ia i le nofoaafi i Iowa, ISA, o le faaiuga o le auala nofoaafi e alu i sisifo i lena vaitaimi. Sa taunuu Elisapeta ia Iulai 1856, ma auai faatasi ai ma le vaega o taavaletosolima a Uili.
Ia Agai Pea i Luma, saunia e Joseph Brickey
O mafatiaga a vaega o taavaletosolima a Uili ma Matini ua faamaumauina lelei. Na tuai le vaitaimi o le tausaga na o ese ai vaega ma maua ai i se taumalulu na vave oo mai i Mauga Papa. O le maluluina ma le tau leai o ni meaai, sa maliliu ai le silia ma le 200 o tagata.
Sa i ai faatasi i le au laveai sa auina atu e Peresitene Polika Iaga ia le toalua o Elisapeta o Viliamu. Sa toe faatasia le ulugalii i le mafiafia o le kiona ma le savili maatiati.
Ina ua toe faasolo manuia i le Aai o Sate Leki, sa faaiu e le ulugalii le la faigamalaga i le Aai o Cedar, na o ni nai maila mai le mea sa amata atu ai Rosalini.
Rosalini, 2007, Hong Kong, Saina
E pei foi o augatupulaga a Elisapeta na muamua atu, sa vave ona iloa e Rosalini ua ia sopoia se vasega e aumau i se atunuu sa le masani ai ina ua maua e lana tane se galuega i Hong Kong.
Fai mai Rosalini, “O nisi tagata e alualu i luma ona o suiga ma mea e le mautinoa, ae sa toetoe lava a mamafa naua mo a’u.”
Sa ia toe maua foi le malosiaga i lona Faaola ma i le fuafuaga a le Atua mo ia. Faatasi ai ma le lagolago a lona aiga ma uso pele i le uarota, sa oo ai ina alofa ma faapelepele Rosalini i ona siosiomaga ma aafiaga fou.
Sa Uia Muamua Foi e Isi Lenei Auala
A o tatou taumafai e mulimuli ia Iesu Keriso, tatou te ui uma atu lava i tofotofoga—o o tatou lava laufanua valevalenoa ma vasa e sopoia ma taumalulu maatiati e faafetaiaia. Ae sa uia muamua foi e isi lenei auala. E mafai ona tatou maua le faamoemoe ma le malosi i a latou tala o le faalagolago i le Faaola.
E manatu Rosalini atonu ua nao le ogatotonu lea o lana faigamalaga ua i ai, ae o le iloa ai o le tala atoa a Elisapeta, ua le mafai ona ia faatali ae mafaufau i le faaiuga o lana lava faigamalaga.
“Atonu e i ai ni o’u uiga auaumama e pei o Elisapeta, atonu foi e leai. Ae ou te faamoemoe a vaai la’u fanau i lo’u olaga, o le a latou vaaia ai ni mea e tutusa ai—sa ma faamaoni uma seia oo i le iuga, ma sa ma faatagaina o ma’ua tofotofoga e mamanuina i ma’ua ina ia avea atili e pei o lo tatou Faaola.”
O le iloaina o le malosiaga sa ia maua mai ia i latou o e sa uia muamua le auala, ua pasi atu ai e Rosalini na tala i lana fanau.
Fai mai Rosalini, “O le iloaina o a latou tala, tatou te iloa ai sa latou faia ni mea faigata.” “Ma ua tatou iloa le pogai ma le faaosofiaga. O lenei la ua oo i lo’u taimi e tauave ai lena agaifanua o le faatuatua ia Iesu Keriso ma le tuuto i Lana talalelei, ma tuufaasolo atu i la’u lava fanau.”