Ang Tambag nga Dili Nako Gustong Madungog
Ngalan gipugngan
Porto Alegre, Brazil
Litrato gikan sa © Getty Images
Dihang ako ug ang akong bana mihukom nga magsugod og kaugalingon namong negosyo, ang unang tulo ka tuig lisud. Wala kami makaganansya ug nagkautang-utang pa gyud kami. Naningkamot gayud kami, apan ang dili mahunahuna nga mga problema naghimo sa maong panahon nga pinakalisud sa among kinabuhi.
Mas migrabe pa kini dihang ang akong ugangan nga babaye namatay sa adlaw pagkahuman sa Pasko ug usa ka semana lang human niadto, sa gabii sa Bag-ong Tuig, grabe kaayo ang akong sakit. Niadtong panahona, nahutdan gyud mi og kwarta, wala na ang among sakyanan, ug ang pinakangil-ad sa tanan, wala na kami health insurance.
Sa kadugayan, nadayagnos ko nga duna koy matang sa aggressive cancer nga nagtubo mga sulod na sa lima ka tuig. Seryuso kadto ug nagkinahanglan og diha-diha nga operasyon. Hapit na mapupos ang akong panahon, ug wala na mi kwarta para sa dakong gasto sa gikinahanglan nakong medikal nga pag-atiman.
Ako ug ang akong bana nakigkita sa among bishop ug nangayo og tabang. Among gipasabut nga sa tinuorayng sitwasyon kini sa kinabuhi o kamatayon. Nabalaka ang bishop, apan giingnan mi niya nga mibati siya og pag-aghat nga maghulat pa og taud-taod aron masuta kon may lain bang paagi para makakuha kami og tabang. Gipaniguro niya kanamo nga kon may igo kaming pagtuo, ihatag sa Ginoo kanako ang paagi nga makakuha og tabang nga akong gikinahanglan.
Sa una, nasuko ko ug napungot sa tubag sa bishop. Mibati ko nga siya ug ang Ginoo mitalikod kanako. Apan may pagpamatuod ko sa ebanghelyo, ug mituo ko nga ang among bishop gitawag sa Dios. Bisan nasakitan ko, nag-ampo ko nga tabangan ko sa Langitnong Amahan nga makapadayon sa paghigugma, pagtahud, ug pagsuporta sa akong bishop. Dihang kini akong giampo, nahupay ko ug mibati nga tabangan ra ko sa Ginoo sa ubang paagi.
Ang akong bana ug ako mipadayon inubanan sa pagtuo, ug nakadawat ko sa gikinahanglang mga medical test ug naiskedyul ang pag-opera, bisan sa kakulang sa kwarta. Sa adlaw sa wala pa ko maoperahi, nabaligya namo ang among negosyo sa maayo nga kantidad, nga naghimo nga mabayaran namo ang tanan namong medical nga bayranan.
Karon naklaro na nganong nagpanuko sa pagtabang ang akong bishop. Milihok siya pinaagi sa inspirasyon aron may igo akong espiritwal nga kasinatian. Kadto nga kasinatian nagtudlo kanako sa pagsalig sa Manluluwas, bisan og ang dalan daw makasagmuyo ug makahahadlok. Nagpasalamat ko sa tambag gikan sa akong bishop nga dili nako gustong madungog. Karon nahibalo na ko nga ang Dios usa ka Dios sa mga milagro ug nga Siya dili gayud motalikod kanato.