“Sa Tinuod Lang, Usa ko ka Mormon”
Abby Thorne
Utah, USA
Paghulagway pinaagi ni Bradley Clark
Mao pa lang gyud ang paglingkod nako sa bus dihang usa ka tawo atbang sa agianan miharag paingon nako ug miingon, “Duna kay matahum nga kalag.”
Siyempre, nakalitan ko. Wala pa ko sukad masultihi og ingon niana kaniadto. Wala ko kasiguro unsay akong itubag, miingon lang ko, “Salamat.”
Kadtong tawhana misulti nako nga mahibaloan niya tungod sa iyang trabaho sa iyang relihiyuso nga pundok. Naminaw ko niya samtang iya kong gitambagan kon unsaon sa paghimo sa akong kalag nga matahum.
Dihang mihunong na ang bus, namarug kami aron manganaog ug mipaambit siya og katapusang pagtulun-an ngari nako: “Siguroa lang nga dili ka maminaw nianang mga Mormons.”
Daw mihunong sa makadiyot ang oras. Kining tawhana nakakita og butang nga espesyal sa akong panagway, apan wala siyay ideya nga kadto tungod sa akong relihiyon.
Unsay angay nakong reaksyon? Sa pagkatinuod, ang una nakong gihunahuna mao ang paghilum na lang ug magpakaaron ingnon nga wala ko makadungog niya. Nabalaka ko nga kon tug-anan nako siya nga ako miyembro sa Simbahan, basin dili maayo ang iyang isulti o gani mangisog.
Apan usa ka kasulatan ang misantop sa akong hunahuna “Kay wala ko igakaulaw ang ebanghelyo [ni Kristo]: kay kini mao ang gahum sa Dios alang sa kaluwasan sa matag usa nga nagatuo” (Mga Taga-Roma 1:16). Akong naamguhan nga wala ko maulaw sa ebanghelyo, ug nasayud ko nga ang akong kalag pweding dili mosanag alang sa uban kon dili ko mobarug nga usa ka saksi. Pinaagi sa nabag-o nakong desisyon, gitan-aw nako ang tawo ug miingon, “Sa tinuod, usa ko ka Mormon.”
Gitutukan ko sa tawo ug gitutukan nako siya og balik. Sa akong katingala, mikatawa siya ug miingon nga dili siya makapasakop sa Simbahan tungod kay ganahan kaayo siya og kape. Mikatawa pud ko, ug nagbulag kami sa pagpanglakaw.
Hangtud karon nalipay ko sa pagpili nga akong gihimo. Nasayud ko nga posibling lisud ang pagbarug isip miyembro sa Simbahan. Usahay makahadlok! Apan kon mobarug kita alang sa Dios, ang atong kalag mosanag isip mga kahayag sa kalibutan.