Sa Digital Ra

5 ka Hiyas sa mga Pioneer Nga Makaluwas sa Atong mga Panimalay Karon

Ni Valerie Durrant

Ang tagsulat nagpuyo sa California, USA.

Ang mga hagit sa atoa karon posibling lahi, apan gikinahanglan nato ang susamang kalig-on sa karaang mga pioneer.

pioneers

Nakasulay ba mo sa paghunahuna kon ang inyong pagtuo sama ka talagsaon sa pagtuo sa mga pioneer? Ang mga Santos karon tingali dili na tawagon nga mobaktas pa og 20 ka milya (32 km) matag adlaw sulod sa daghang mga bulan, mobiya sa tanan nilang kabtangan, o moatubang og grabing pagpanggukod, apan makahimo kita og mga desisyon nga dili ganahan ang kadaghanan, makapanalipud sa atong kaugalingon batok sa makadaot sa espirituhanon nga mga sitwasyon, ug makabalibad sa walay hunong nga dili angay nga mga pasundayag nga mobalda kanato gikan sa unsay pinakaimportante.

Kon pilion nato ang pagsunod kang Kristo, kinahanglan nga magbaton kita og susama nga mga hiyas nga mihatag sa atong mga katigulangang pioneer sa ilang milagrusong mga kalig-on.

Ania ang lima lamang niadtong mga hiyas nga makalig-on kanato sa matag adlaw:

1. Pagtuo. Ang kalig-on sa mga pioneer anaa gayud sa matag indibidwal. Ang matag usa kanila sa personal gayud nahibalo nga sila mga anak sa Dios. Ikaw usab makatukod sa kaugalingon nimong pagtuo kang Kristo aron ang imong pagpamatuod mobarug nga lig-on bisan unsa pa nga mga bagyo ang moabut.

2. Kaisug. Daw layo ra kaayo nga ikumpara ang imong kaisug ngadto sa ilaha. Ang mga pioneer misagubang sa tinuod gayud nga pisikal nga kakuyaw matag adlaw, apan kinahanglan nga gamiton nato ang sama nga kaisug sa sulod kanato aron ikapaambit ang ebanghelyo ngadto sa uban ug magpakabuhi nga lahi kay sa paagi sa kalibutan. Ang paghinumdom sa kaisug sa mga pioneer makatabang nga atong mabuntog ang atong mga hagit.

3. Determinasyon. Dihang mihampak ang trahedya, pwede ra gyud unta nga magduha-duha dayon ang mga pioneer sa pagkapatas bahin sa ilang sitwasyon, apan ang ilang determinasyon nakatabang sa ilang pagsagubang niini, uban sa pagsalig nga ang tanan mamaayo ra. Karon, pwede ra nga makabaton kita sa mao gihapon nga kombiksyon ug makaamgo nga bisan unsa man ang isulti kanato sa kalibutan, “ang tanan nga mga butang nahimo diha sa kaalam kaniya kinsa nasayud sa tanan nga mga butang” (2 Nephi 2:24).

4. Sakripisyo. Ang taas nga panan-awon sa mga pioneer bahin sa unsay ilang gibuhat nakatabang aron mahimo nila ang gikinahanglang mga pagsakripisyo sa pagpadayon. Kita pwede ra usab nga mosalig sa mao gihapon nga panan-awon nga naghimo sa mga pioneer nga makapadayon—makatukod sa gingharian sa Dios—kon kinahanglan man nga mosakripisyo kita og mga butang karon.

5. Panaghiusa. Ang pagbiyahe pinaagi sa kutay sa mga karwahe nagpasabut nga ang matag usa naghunahuna sa usag usa atol sa ilang panaw padulong sa Zion. Samtang maghago kita sa pagtukod og Zion karon diha sa atong mga ward, stake, branch, panimalay, ug mga komunidad, kinahanglan usab nga paningkamutan nato ang pag-abag ug paglakip niadtong anaa sa atong palibut.

Unsay imong mahimo?

Pagpili og hiyas nga imong mapalambo. Sa unsang paagi kini makatabang sa mga hagit nga imong giatubang karon?

Pagdiskubre Pa og Dugang

Kat-uni ang dugang pa mahitungod sa pagkahimong usa ka pioneer diha sa “Hugot nga Pagtuo sa Pagpadayon” sa pahina 22, “Huptan ang Pagtuo Keeping the Faith in Isolation” sa pahina 30, ug “Mga Panaw sa Tulo ka Modernong Pioneer” sa pahina 44.