លុះត្រាជួបទៀត
ក្លាហាននៅក្នុងបុព្វហេតុនៃព្រះគ្រីស្ទ
ដកស្រង់ពី Teachings of Presidents of the Church: Joseph Smith ( ឆ្នាំ ២០១១ ) ទំព័រ ៣៥២–៥៦ ។
អ្នកត្រូវធ្វើជាមនុស្សល្អ ។
ខ្ញុំគឺជាមនុស្សម្នាក់ដែលស្រឡាញ់បុព្វហេតុនៃព្រះគ្រីស្ទ និងនៃគុណធម៌ ព្រហ្មចារីភាព ព្រមទាំងលំនាំអាកប្បកិរិយាដែលខ្ជាប់ខ្ជួន និងការដើរដោយបរិសុទ្ធ ។
ខ្ញុំជឿលើការរស់នៅក្នុងជីវិតមួយដែលមានគុណធម៌ ស្លូតត្រង់ ហើយបរិសុទ្ធចំពោះព្រះ ហើយមានអារម្មណ៍ថា វាគឺជាករណីយកិច្ចរបស់ខ្ញុំដើម្បីទាក់ទាញ [ មនុស្ស ] ទាំងអស់ឲ្យអស់ពីលទ្ធភាពរបស់ខ្ញុំ ដើម្បីធ្វើរឿងដូចគ្នានេះ ដើម្បីពួកគេអាចឈប់ធ្វើអំពើអាក្រក់ ហើយរៀនធ្វើល្អវិញ ហើយបញ្ឈប់អំពើបាបដោយសេចក្ដីសុចរិត ។
តាមរយៈការពង្រឹងសេចក្ដីជំនឿរបស់យើងដោយដាក់បន្ថែមនូវរាល់គុណសម្បត្តិល្អៗដែលបំពាក់លើកូនចៅនៃព្រះយេស៊ូវដ៏មានពរ នោះយើងអាចអធិស្ឋាននៅក្នុងគ្រានៃការអធិស្ឋាន យើងអាចស្រឡាញ់អ្នកជិតខាងរបស់យើងឲ្យដូចខ្លួនយើង ហើយស្មោះត្រង់នៅក្នុងសេចក្ដីទុក្ខលំបាក ដោយដឹងថា រង្វាន់នៃកិច្ចការបែបនេះគឺធំជាងនៅក្នុងនគរស្ថានសួគ៌ ។ ឱ វាគឺជាការលួងលោមចិត្តមួយអ្វីម្ល៉េះ ! ឱ វាគឺជាអំណរមួយអ្វីម្ល៉េះ ! ចូរឲ្យខ្ញុំរស់នៅក្នុងជីវិតនៃមនុស្សសុចរិត ហើយចូរឲ្យរង្វាន់របស់ខ្ញុំបានដូចជាទ្រង់ ! …
ក្នុងនាមជាមនុស្សម្នាក់ដែលប្រាថ្នាចង់បានសេចក្ដីសង្គ្រោះដល់មនុស្សយ៉ាងខ្លាំង ចូរឲ្យខ្ញុំរំឭកដល់អ្នកទាំងអស់គ្នាឲ្យខិតខំដោយភាពរវៀសរវៃមកពីព្រះសម្រាប់គុណធម៌ បរិសុទ្ធភាព និងបទបញ្ញត្តិរបស់ព្រះអម្ចាស់ ។ ចូរធ្វើជាមនុស្សល្អ ឈ្លាសវៃ មានយុត្តិធម៌ មានសេរីភាព [ តាមមធ្យោបាយរបស់អ្នក ] ហើយសំខាន់បំផុតនោះ ចូរមានចិត្តសប្បុរស ដែលសម្បូរទៅដោយរាល់កិច្ចការល្អជានិច្ច ។ …
ចូរមានចិត្តរាបសា ហើយទន់ភ្លន់ ស្លូតត្រង់ ហើយបរិសុទ្ធ ផ្ដល់អំពើល្អជំនួសឲ្យអំពើអាក្រក់ ។ … ចូរមានចិត្តរាបសា ហើយអត់ធ្មត់នៅគ្រប់កាលៈទេសៈនៃជីវិត នោះយើងនឹងមានជ័យជំនះកាន់តែរុងរឿង ។
យើងទទួលអារម្មណ៍ឲ្យដាស់តឿនដល់បងប្អូនប្រុស [ និងបងប្អូនស្រី ] របស់យើងដោយភាពអង់អាច ឲ្យពួកគេមានចិត្តរាបសា និងប្រកបដោយការអធិស្ឋាន ឲ្យដើរដោយពិតក្នុងនាមជាកូនចៅនៃពន្លឺ និងនៃថ្ងៃ ដើម្បីឲ្យពួកគេអាចមានព្រះគុណដើម្បីទ្រាំទ្ររាល់ការល្បួង ហើយយកឈ្នះនូវរាល់អំពើអាក្រក់នៅក្នុងព្រះនាមដ៏សក្ដិសមនៃព្រះអម្ចាស់របស់យើង គឺព្រះយេស៊ូវគ្រីស្ទ ។
គំនិតដែលមនុស្សគ្រប់រូបត្រូវទទួលស្របតាមភាពឧស្សាហ៍ និងកិច្ចខិតខំជាបន្តរបស់ខ្លួនកាលនៅក្នុងចម្ការទំពាំងបាយជូរ គួរបំផុសគំនិតដល់មនុស្សគ្រប់រូបដែលត្រូវបានហៅឲ្យធ្វើជាអ្នកបម្រើម្នាក់នៅក្នុងដំណឹងដ៏រីករាយទាំងនេះ ។ …
ការទុកចិត្តរបស់យើងគឺនៅក្នុងព្រះ ហើយយើងត្រូវតាំងចិត្ត ដោយមានព្រះគុណរបស់ទ្រង់ជួយដល់យើង ដើម្បីថែទាំបុព្វហេតុនេះ ហើយនៅស្មោះត្រង់រហូតចុងបញ្ចប់ ដើម្បីយើងអាចទទួលបានមកុដនៃសិរីល្អសេឡេស្ទាល ហើយបានចូលទៅក្នុងទីសម្រាកដែលបានរៀបចំសម្រាប់កូនចៅរបស់ព្រះ ។ …
អ្នកត្រូវធ្វើជាមនុស្សល្អ ។ ភាពអត់ធ្មត់មានភាពល្អវិសេស ការគោរពប្រតិបត្តិមានភាពថ្លៃថ្នូរ ការអភ័យទោសភាពមេត្តា ហើយភាពតម្កើងឡើងមានភាពបរិសុទ្ធ ហើយជនណាដែលនៅស្មោះត្រង់ដល់ចុងបំផុតនឹងពុំបាត់បង់រង្វាន់របស់ខ្លួនឡើយ ។ បុរស [ ឬ ស្ត្រី ] ដ៏ល្អម្នាក់នឹងស៊ូទ្រាំគ្រប់ការណ៍ទាំងអស់ដើម្បីគោរពឲ្យតម្លៃដល់ព្រះគ្រីស្ទ ។