Mensahe sa Unang Kapangulohan
Pagkahimong Tinuod nga mga Disipulo
Ni Presidente Henry B. Eyring
Unang Magtatambag sa Unang Kapangulohan
Sa matag sakrament miting, duna kitay pribilehiyo sa pagsaad sa Langitnong Amahan nga kita sa kanunay mahinumdom sa Manluluwas ug maghupot sa Iyang mga sugo, aron kita makabaton sa Iyang Espiritu uban kanato. (tan-awa sa Moroni 4:3; 5:2; D&P 20:77, 79). Ang paghinumdom Kaniya sa kanunay moabut sa natural nga paagi kon atong dawaton ang Iyang pangalan ngari kanato. Mabuhat nato sa daghang mga paagi apan ilabi na kon kita moserbisyo sa uban pinaagi sa Iyang pangalan, mobasa sa Iyang balaan nga mga pulong, ug mag-ampo aron makahibalo unsay Iyang gusto nga atong buhaton.
Nahitabo kini nako sa dihang ako ang mibunyag sa usa ka batan-ong lalaki. Nasayud ko nga ako gitawag pinaagi sa giorden nga mga sulugoon sa Manluluwas isip usa ka misyonaryo aron sa pagtudlo sa Iyang ebanghelyo ug sa pagpamatuod Kaniya ug sa Iyang tinuod nga Simbahan. Ang akong misyonaryo nga kompanyon ug ako misaad sa batan-ong lalaki nga siya malimpyohan pinaagi sa gahum sa Pag-ula ni Jesukristo kon siya maghinulsol uban sa hugot nga pagtuo sa Manluluwas ug mabunyagan sa usa sa Iyang gitugutan nga mga sulugoon.
Sa akong paghaw-as sa batan-ong lalaki gikan sa tubig sa bunyaganan, mihunghong siya sa akong dunggan, “Limpyo na ko, limpyo na ko.” Nianang gutloa, nakahinumdom ko sa bunyag sa Manluluwas nga gibunyagan ni Juan Bautista didto sa Suba sa Jordan. Dugang pa, nakahinumdom ko nga ang akong gihimo ang makaluwas nga buhat sa nabanhaw ug buhi nga Manluluwas—nga gitambongan sa Espiritu Santo, sama ni Juan.
Alang nako ug alang sa matag usa nato, ang paghinumdom sa Manluluwas labaw pa kay sa pag-agad sa panumduman sa atong kahibalo ug mga kasinatian uban Kaniya. Makahimo kita og mga pagpili kada adlaw nga makapasuod nato ngadto Kaniya.
Ang labing yanong pagpili tingali mao ang pagbasa sa mga kasulatan. Pinaagi sa pagbuhat sa ingon, makaangkon kita og pagbati nga duol Kaniya. Alang nako, ang pagkasuod moabut sa kasagaran kon ako mobasa sa Basahon ni Mormon. Sa unang mga minuto nga mobasa ko sa mga kapitulo sa 2 Nephi, madunggan nako sa akong hunahuna ang mga tingog nila ni Lehi ug Nephi nga naghulagway sa Manluluwas ingon og sila nakaila Kaniya sa personal. Ang pagbati nga pagkasuod moabut.
Alang kaninyo, laing mga bahin sa kasulatan ang tingali makapaduol kaninyo ngadto Kaniya. Apan bisan asa ug bisan kanus-a kon kamo mobasa sa pulong sa Dios, uban sa pagpaubos ug tinuod nga katuyoan sa paghinumdom sa Manluluwas, madugangan ang inyong tinguha sa pagdala sa Iyang pangalan diha kaninyo sa inyong inadlaw nga kinabuhi.
Kana nga tinguha makapausab sa paagi sa inyong pagserbisyo sa Simbahan sa Ginoo. Mag-ampo kamo ngadto sa Langitnong Amahan alang sa panabang sa pagpalambo bisan pa sa inyong nakita nga gamay nga calling. Ang tabang nga inyong pangayoon mao ang abilidad sa pagkalimot sa inyong kaugalingon ug motutok unsay gusto sa Manluluwas alang niadtong inyong serbisyuhan.
Nabati nako ang Iyang kamot ug sa Iyang pagkasuod sa akong pagserbisyo uban sa among mga anak kon mag-ampo ko aron makahibalo unsaon sa pagtabang kanila nga makakita og kalinaw nga ang ebanghelyo lamang ang makahatag. Sa maong mga gutlo, wala kaayo ako magpakabana nga makita isip malampuson nga ginikanan, apan dako kaayo ang akong pagpakabana sa kalampusan ug kaayohan sa akong mga anak.
Ang tinguha sa paghatag niadtong atong serbisyuhan kon unsay ihatag sa Manluluwas ngadto nila mosangpot ngadto sa mga pag-ampo nga mangamuyo ngadto sa Langitnong Amahan, sa tinuod pinaagi sa pangalan ni Jesukristo. Kon mag-ampo kita nianang paagiha—pinaagi sa pangalan sa Manluluwas, uban sa hugot nga pagtuo diha Kaniya—ang Amahan motubag. Ipadala Niya ang Espiritu Santo sa paggiya, paghupay, ug pag-awhag kanato. Tungod kay ang Espiritu sa kanunay mosaksi sa Manluluwas (tan-awa sa 3 Nephi 11:32, 36; 28:11; Ether 12:41), ang atong kapasidad sa paghigugma sa Ginoo uban sa atong tibuok kasingkasing, hunahuna, ug kusog molambo (tan-awa sa Marcos 12:30; Lucas 10:27; D&P 59:5).
Ang mga panalangin sa inadlaw-adlaw ug karon nga paghinumdom moabut sa hinay ug kanunay samtang moserbisyo kita Kaniya, magbusog sa Iyang pulong, ug mag-ampo pinaagi sa hugot nga pagtuo sa Iyang pangalan. Ug kini nga paghinumdom mohimo kanato nga tinuod nga mga disipulo ni Ginoong Jesukristo sa Iyang gingharian dinhi sa yuta—ug unya uban sa Iyang Amahan sa mahimayaon nga kalibutan nga moabut.