Tabang Pinaagi sa Paghatag og Lapis
Nagsugod kini dihang ang akong stake mipahigayon og usa ka proyekto sa pagtabang sa mga refugee. Ganahan gyud ko sa proyekto, mao nga mihangyo ko sa akong mama sa pagsulti sa akong magtutudlo sa eskwelahan bahin niini, ug ang akong magtutudlo adunay gustong buhaton uban sa grade four. Sa pagpakita og ehemplo alang sa proyekto, ang akong igsoon, si Maddie, ug ako nanuktok sa mga kabalayan nangayo alang sa mga donasyon.
Miabut ang adlaw nga ipresentar na ang proyekto ngadto sa tanang grade four. Gikulbaan ko gamay. Sa pagkatinuod, gikulbaan ko og maayo, apan akong gihimo ang akong labing maayo. Akong gisultihan ang tanan nga naa sa grade four kon unsay gikinahanglan alang sa mga school kit para sa mga refugee. Akong gisulti kon giunsa namo pagpanuktok ang mga kabalayan, ug mihatag kanila og usa ka hagit nga mohimo og mas maayo pa kay sa akong gibuhat sa pagtigom og kwarta. Sa pagtinabangay nakatigom kami og kapin sa 100 ka mga kit! Among giparis ang mga notebook, lapis, ug ubang mga gamit sa eskwelahan. Gidugangan usab namo og usa ka sulat nga nag-ingon, “Welcome sa Germany.”
Ang akong mama ug ako midala sa mga kit ngadto sa kampo sa refugee. Dili ko moingon nga nindot ang kampo, apan adunay kadula-dulaan ug usa ka dapit para makat-on sa mga leksyon. Adunay train sa tupad sa kampo nga saba gayud kaayo, ug ang mga bata misulti kanako nga parehas kini og tingog sa naglupad nga mga jet didto sa Syria ug sa ubang mga dapit sama niana. Tingali para sa mga bata ang tingog niini sama sa mga bomba nga ilang nadungog didto sa ilang mga nasud.
Akong nahimamat ang pipila ka mga bata sa kampo nga akong kaedad, lakip ni Daniel, usa ka maayong lalaki sa chess. Wala ko makahigayon sa pakigdula niya sa chess, nga anugon kaayo kay ganahan ko og chess, apan midapit sila nako sa pagdula og foosball ug ping-pong. Ang mga batang lalaki misulti nako nga gimingaw sila sa ilang mga panimalay ug gustong mobiya sa kampo ug aron makaeskwela na usab.
Pagkahuman namo sa pagdula og foosball ug ping-pong, among gipanghatag ang mga kit. Maayo akong gibati nga nakahimo ko og usa ka butang nga mabination alang sa mga bata kinsa nagpuyo sa mga kampo.